ମୁମ୍ବାଇ: ସୁଶାନ୍ତ ସିଂ ରାଜପୁତ ଓ ଶ୍ରଦ୍ଧା କପୁରଙ୍କ ଅଭିନୀତ ଫିଲ୍ମ ‘ଛିଛୋରେ’ ବକ୍ସ ଅଫିସରେ ଶାନଦାର ପ୍ରଦର୍ଶନ କରିବାରେ ଲାଗିଛି । ‘ଦଙ୍ଗଲ’ ଫିଲ୍ମ ପରେ ନିର୍ଦ୍ଦେଶକ ନିତେଶ ତିୱାରୀଙ୍କ ନିର୍ଦ୍ଦେଶିତ ଏହି ଫିଲ୍ମ ମଧ୍ୟ ସୁପରଡୁପର ହିଟ୍ ସାବ୍ୟସ୍ତ ହୋଇଛି । ଫିଲ୍ମଟି 100 କୋଟି କ୍ଲବରେ ସାମିଲ ହୋଇସାରିଲାଣି । ତଥାପି ଆୟ ମାମଲାରେ ମାଡି ଚାଲିଛି ଫିଲ୍ମ ।
ଦ୍ବିତୀୟ ସପ୍ତାହରେ ଆୟୁଷ୍ମାନ ଖୁରାନା ଓ ନୁସରତ ଭାରୁଚାଙ୍କ ଫିଲ୍ମ ‘ଡ୍ରିମ ଗାର୍ଲ’ ତୁଳନାରେ ଏହାର କଲେକ୍ସନ ଟିକେ ଧିମା ପଡିଯାଇଥିଲା । କିନ୍ତୁ ତୃତୀୟ ସପ୍ତାହରେ ରିଲିଜ ହୋଇଥିବା ‘ପଲ ପଲ ଦିଲ କେ ପାସ୍’, ‘ଦ ଜୋୟା ଫ୍ୟାକ୍ଟର’ ଏବଂ ‘ପ୍ରସ୍ଥାନମ’ ଅପେକ୍ଷା ‘ଛିଛୋରେ’ର କଲେକ୍ସନ ଜବରଦସ୍ତ ରହିଥିଲା ।
ଶୁକ୍ରବାର ପର୍ଯ୍ୟନ୍ତ ଏହି ମଲ୍ଟି ଷ୍ଟାରର ଫିଲ୍ମଟି 108.59 କୋଟି ଟଙ୍କା ଆୟ କରିବାରେ ସଫଳ ହୋଇଥିଲା । ଏବେ ଫିଲ୍ମକୁ ନେଇ କ୍ରିଟିକ୍ସଙ୍କ ଗଣନା ଆରମ୍ଭ ହୋଇଯାଇଛି । ଆଉ ଯଦି ଏହି ପରି ‘ଛିଛୋରେ’ର କଲେକ୍ସନ ଲାଗି ରହିଲା ତେବେ ଫିଲ୍ମଟି ଆୟୁଷ୍ମନାଙ୍କ ରାଷ୍ଟ୍ରୀୟ ପୁରସ୍କାର ବିଜେତା ଫିଲ୍ମ ‘ବଧାଇ ହୋ’ର ରେକର୍ଡ ଭାଙ୍ଗିପାରେ । ଯାହା ରିଲିଜର ତୃତୀୟ ସପ୍ତାହରେ 134 କୋଟି ଆୟ କରିଥିଲା ।
ପ୍ରକାଶ ଥାଉକି ‘ଛିଛୋରେ’ ଫିଲ୍ମଟି କଲେଜ ଲାଇଫକୁ ନେଇ ଆଧାରିତ । ଯେଉଁଥିରେ ବନ୍ଧୁମାନଙ୍କ ମସ୍ତି ସହ ଜୀବନର ଅନ୍ୟ କାହାଣୀକୁ ଦେଖିବାକୁ ପାଇଛନ୍ତି ଦର୍ଶକ । ଫିଲ୍ମରେ ସୁଶାନ୍ତ ଓ ଶ୍ରଦ୍ଧାଙ୍କ ବ୍ୟତୀତ ବରୁଣ ଶର୍ମା, ନବୀନ ପୋଲିସେଟ୍ଟୀ, ପ୍ରତୀକ ବବ୍ବର, ତୁଷାର ପାଣ୍ଡେ ଓ ତାହିର ବାସିନ ମଧ୍ୟ ମୁଖ୍ୟ ଭୂମିକାରେ ଅଭିନୟ କରିଛନ୍ତି ।
