ମୁମ୍ବାଇ: 2020 ବର୍ଷକୁ ଖୁସିରେ ବିଦାୟ ଦେବାକୁ ପ୍ରସ୍ତୁତି ଚଳାଇଛନ୍ତି ବଲିଉଡର ପପୁଲାର ଲଭବାର୍ଡ ରଣବୀର କପୁର ଓ ଆଲିୟା ଭଟ୍ଟ । କାରଣ ଏହି ଯୋଡି ଆଜି ନିର୍ବନ୍ଧ କରିବେ । ମଙ୍ଗଳବାର ଜୟପୁର ଗସ୍ତ କରିଥିଲେ ରଣବୀର ଓ ଆଲିୟା । ରାଜସ୍ଥାନର ରାନ୍ଥମ୍ବବୋରରେ ଥିବା ବିଳାସପୂର୍ଣ୍ଣ ହୋଟେଲରେ ଆୟୋଜନ ହେବ ଦୁଇଜଣଙ୍କ ନିର୍ବନ୍ଧ ଫଙ୍କ୍ସନ ।
ସେହିପରି ମଙ୍ଗଳବାର ସକାଳେ ଆଲିୟା, ଭଉଣୀ ରିଦ୍ଧିମା ସାହାନି ଓ ମା' ନୀତୁ କପୁର ସହ ମୁମ୍ବାଇ ଏୟାରପୋର୍ଟରେ ନଜର ଆସିଥିଲେ ରଣବୀର । ଏହାବ୍ୟତୀତ ଭଟ୍ଟ ଫ୍ୟାମିଲି ମଧ୍ୟ ରାଜସ୍ଥାନର ଯାତ୍ରା କରିସାରିଛନ୍ତି । ଲୋକପ୍ରିୟ ନିର୍ମାତା କରନ ଜୋହର ମଧ୍ୟ ଦୁଇଜଣଙ୍କ ନିର୍ବନ୍ଧ ଫଙ୍କ୍ସନରେ ଯୋଗ ଦେବେ ।
ପ୍ରକାଶ ଥାଉକି ରଣବୀର ଓ ଆଲିୟାଙ୍କ ସହ ପୁରା ଫ୍ୟାମିଲି ବର୍ତ୍ତମାନ ରାନ୍ଥମ୍ବବୋରର ଅମନ ହୋଟେଲରେ ଅଛନ୍ତି । ଆଉ ବନ୍ଧୁବାନ୍ଧବ ଏବଂ ପରିବାର ସଦସ୍ୟଙ୍କ ସାମ୍ନାରେ ନିର୍ବନ୍ଧ ମୁଦି ପିନ୍ଧାଇବେ ଏହି ଯୋଡି । ସେହିପରି ଏହି ଅବସରରେ ନୀତୁ ମଙ୍ଗଳବାର ରାତିରେ ପୁରା ପରିବାର ସହ ନିଜର ଏକ ସେଲ୍ଫି ଫଟୋ ମଧ୍ୟ ଇନଷ୍ଟାଗ୍ରାମରେ ସେୟାର କରିଥିଲେ ।
ସେହିପରି ବୁଲଗେରିଆରେ ‘ବ୍ରହ୍ମାସ୍ତ୍ର’ର ସୁଟିଂ ସମୟରେ ରଣବୀର ଏବଂ ଆଲିୟାଙ୍କ ମଧ୍ୟରେ ଥିବା ରୋମାନ୍ସ କଥା ସମସ୍ତଙ୍କୁ ଜଣାପଡିଥିଲା । 2018ରେ ହୋଇଥିବା ଅଭିନେତ୍ରୀ ସୋନମ କପୁରଙ୍କ ବିବାହ ଫଙ୍କ୍ସନରେ ଦୁହେଁ ଏକାଠି ନଜର ଆସିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
