ମୁମ୍ବାଇ: ବଲିଉଡରେ ଚାଲିଛି ହାଇଭୋଲଟେଜ୍ ଡ୍ରାମା । କାରଣ କମିବାର ନାଁ ନେଉନାହିଁ ସେଲିବ୍ରିଟିଙ୍କ ସମସ୍ୟା । ଗତ କିଛି ମାସରୁ ବି-ଟାଉନର ଫେମସ କଳାକାର ପରସ୍ପର ଉପରେ ଅଭିଯୋଗ ଆଣିବାରେ ଲାଗିଛନ୍ତି । ଏହି କ୍ରମରେ ସାମିଲ ଅଛନ୍ତି ଲୋକପ୍ରିୟ ନିର୍ମାତା ଅନୁରାଗ କଶ୍ୟପ । ନିକଟରେ ତାଙ୍କ ବିରୋଧରେ ଅଭିନେତ୍ରୀ ପାୟଲ ଘୋଷ ଯୌନ ଶୋଷଣ ଅଭିଯୋଗ ଆଣିଥିଲେ । ଯାହାକୁ ନେଇ ଖୁବ୍ ସମାଲୋଚନାର ଶିକାର ହୋଇଛନ୍ତି ସେ । ଆଉ ଏବେ ଅନୁରାଗ ତାଙ୍କ ବିରୋଧରେ ଲିଗାଲ୍ ଆକ୍ସନ ନେବାକୁ ଯୋଜନା କରୁଛନ୍ତି ବୋଲି ଚର୍ଚ୍ଚା ।
ଅନୁରାଗଙ୍କ ଜଣେ ଘନିଷ୍ଠ ବନ୍ଧୁ ଏହି ସୂଚନା ଦେଇ କହିଛନ୍ତି, ‘ସେ ନିଜ ପାଇଁ ଚିନ୍ତିତ ନାହିଁନ୍ତି । ହେଲେ ତାଙ୍କୁ ନେଇ ପରିବାର ସଦସ୍ୟଙ୍କୁ ଯେଉଁ ସମସ୍ୟା ହେଉଛି ତାହା ପାଇଁ ସେ ବିରକ୍ତ ହେଉଛନ୍ତି । ଆଉ କହିଛନ୍ତି ଯେ ଏହା ତାଙ୍କ ବିଷୟରେ ନୁହେଁ ବରଂ ଏହା ତାଙ୍କ ଭାବମୂର୍ତ୍ତି ବିଷୟରେ । ଅନୁରାଗ ଶକ୍ତିଶାଳୀ ମହିଳାଙ୍କ ପରିବାରରୁ ଆସିଛନ୍ତି। ଏପରି ପରିସ୍ଥିତିରେ ମହିଳାମାନଙ୍କୁ ସମ୍ମାନ ଦେବା ତାଙ୍କର ସ୍ବଭାବ । ସେ ଏହି ମାମଲାକୁ ଏକ ଯୁକ୍ତିଯୁକ୍ତ ସିଦ୍ଧାନ୍ତରେ ନେବାକୁ ଚାହାଁନ୍ତି କାରଣ ଏହି ଅଭିଯୋଗ ଗୁଡିକ ସେହି ଜିନିଷକୁ ଚ୍ୟାଲେଞ୍ଜ କରେ ଯାହା ପାଇଁ ସେ ତାଙ୍କ ଜୀବନସାରା ଛିଡା ହୋଇଥିଲେ । ଅନୁରାଗ ବର୍ଷ ବର୍ଷ ଧରି ନାରୀବାଦୀ ଫିଲ୍ମ ନିର୍ମାତା ଭାବରେ ଜଣାଶୁଣା । ମିଥ୍ୟା ଅଭିଯୋଗ ହେତୁ ସେ ନିଜର ପ୍ରତିଷ୍ଠା ହରାଇ ପାରିବେ ନାହିଁ । ସେ ନ୍ୟାୟ ପାଇବା ପାଇଁ ଲଢିବେ।
ପ୍ରକାଶ ଥାଉକି ଗତ ମାସରେ ଅନୁରାଗଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗରେ ଏଫଆଇଆର ରୁଜୁ କରିଥିଲେ ପାୟଲ । ଯାହା ପରେ ମୁମ୍ବାଇ ପୋଲିସ ଅନୁରାଗଙ୍କୁ 8 ଘଣ୍ଟା ଧରି ପଚରାଉଚରା କରିଥିଲା।
