ମୁମ୍ବାଇ: କଙ୍ଗନା ରାଣାୱତ ଗତ କିଛି ଦିନ ହେବ ବିବାଦରେ ରହିଆସୁଛନ୍ତି । ନିକଟରେ ମୁମ୍ବାଇ ପୋଲିସ କଙ୍ଗନା ଏବଂ ତାଙ୍କ ଭଉଣୀ ରଙ୍ଗୋଲୀ ଚାନ୍ଦେଲଙ୍କୁ ଏକ ମାମଲାରେ ପଚରାଉଚରା ପାଇଁ ପୋଲିସ ଷ୍ଟେସନରେ ହାଜର ହେବାକୁ ଡାକିଥିଲା କିନ୍ତୁ ସେତେବେଳେ ଉଭୟ ଭଉଣୀ କହିଥିଲେ ଯେ ସେମାନେ ନିଜ ଭାଇଙ୍କ ବିବାହରେ ବ୍ୟସ୍ତ ଅଛନ୍ତି ତେଣୁ ପୋଲିସ ଷ୍ଟେସନରେ ହାଜର ହୋଇପାରିବେ ନାହିଁ । ଏହାପରେ ପୋଲିସ ପୁଣିଥରେ ତାଙ୍କୁ ନୋଟିସ୍ ପଠାଇଥିଲା । ଯେଉଁଥିରେ କୁହାଯାଇଥିଲା ଏମାସ 10 ତାରିଖରେ ତଥା ମଙ୍ଗଳବାରେ ବୟାନ ରେକର୍ଡ କରିବା ପାଇଁ ପୋଲିସ ଷ୍ଟେସନରେ ହାଜର ହେବେ । ଏଥର ମଧ୍ୟ ଏହାକୁ ବେଖାତିରି କରି ଉପସ୍ଥିତ ହେବାକୁ ମନା କରିଦେଇଛନ୍ତି ସେ ।
ସୋସିଆଲ ମିଡିଆରେ ଦେଇଥିବା ମନ୍ତବ୍ୟ ମାଧ୍ୟମରେ ସମ୍ପ୍ରଦାୟ ମଧ୍ୟରେ ଶତ୍ରୁତାକୁ ପ୍ରୋତ୍ସାହିତ କରୁଥିବା ଅଭିଯୋଗରେ ଏହି ଦୁଇ ଭଉଣୀଙ୍କୁ ଏକ ମାମଲାରେ ହାଜର ହେବାକୁ କୁହାଯାଇଥିଲା । ଏହାପୂର୍ବରୁ ବାନ୍ଦ୍ରା ପୋଲିସ କଙ୍ଗନା ଓ ରଙ୍ଗୋଲୀଙ୍କୁ ଅକ୍ଟୋବର 21ରେ ସେମାନଙ୍କ ବୟାନ ରେକର୍ଡ କରିବାକୁ ନୋଟିସ ପଠାଇଥିଲା, କିନ୍ତୁ ତା’ପରେ ସେମାନଙ୍କ ଓକିଲ ଏକ ଷ୍ଟେଟଣେଣ୍ଟ ଜାରି କରିଥିଲେ ଯେ କଙ୍ଗନା ବର୍ତ୍ତମାନ ହିମାଚଳ ପ୍ରଦେଶରେ ଅଛନ୍ତି ଏବଂ ତାଙ୍କ ଭାଇଙ୍କ ବିବାହ ପ୍ରସ୍ତୁତିରେ ବ୍ୟସ୍ତ ଅଛନ୍ତି । ଏଥିପାଇଁ ସେ ଆଉ କିଛି ଦିନ ସମୟ ମାଗୁଛନ୍ତି ପୋଲିସ ଷ୍ଟେସନରେ ହାଜର ହେବାକୁ ।
ପ୍ରକାଶ ଥାଉକି କଙ୍ଗନା ନିଜ ବିରୋଧରେ ରୁଜୁ ହୋଇଥିବା ମାମଲାରେ ବୟାନ ଦେବାକୁ ଦ୍ବିତୀୟଥର ମନା କରିଦେଇଛନ୍ତି । ଆଉ କହିଛନ୍ତି ସେ ଏବେ ମଧ୍ୟ ଭାଇଙ୍କ ବିବାହରେ ବ୍ୟସ୍ତ ଅଛନ୍ତି । ଆସନ୍ତା 15 ତାରିଖରେ ସେ ବୟାନ ଦେବେ ।
ସେହିପରି କଙ୍ଗନାଙ୍କ ବିରୁଦ୍ଧରେ ଆଇପିସିର ଧାରା 153 ଏ (ବିଭିନ୍ନ ଧର୍ମ ଆଧାରରେ ବିଭିନ୍ନ ଗୋଷ୍ଠୀ ମଧ୍ୟରେ ଅସଙ୍ଗତିକୁ ପ୍ରୋତ୍ସାହିତ କରିବା), 295 ଏ (ଉଦ୍ଦେଶ୍ୟମୂଳକ ଭାବରେ ଧାର୍ମିକ ଭାବନାକୁ ଆଘାତ କରୁଥିବା କାର୍ଯ୍ୟ), 124 ଏ (ଦେଶଦ୍ରୋହ), 34 (ଅଂଶୀଦାର) ଉଦ୍ଦେଶ୍ୟରେ ଏଫଆଇଆର ରୁଜୁ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
