ମୁମ୍ବାଇ: ଧିରେ ଧିରେ କରି ଏବର୍ଷ ନିର୍ମାତା ନିଜ ଆଗାମୀ ଫିଲ୍ମ ରିଲିଜ କରିବା ଆରମ୍ଭ କରିଦେଇଛନ୍ତି । ଗତ ବର୍ଷ କୋରୋନା ପ୍ରକୋପ ପାଇଁ କୌଣସି ଫିଲ୍ମ ବଡ ପରଦାରେ ରିଲିଜ ହୋଇନଥିଲା । ଆଉ ଚଳିତ ବର୍ଷ ସବୁ ସାମାନ୍ୟ ହେବା ପରେ ବଡ ପରଦାରେ ଫିଲ୍ମ ରିଲିଜ ହେବ । ଏହି କ୍ରମରେ ଅନେକ ବିଗ୍ ବଜେଟ ଫିଲ୍ମ ସାମିଲ ଅଛି । ହେଲେ ମୁଖ୍ୟ କଥା ହେଲା ଯେ ଏଥର ମଧ୍ୟ ସୁପରଷ୍ଟାର ଅକ୍ଷୟ କୁମାରଙ୍କ ବ୍ୟାକ ଟୁ ବ୍ୟାକ ଫିଲ୍ମ ଦେଖିବାକୁ ପାଇବେ ଦର୍ଶକ। ବଲିଉଡ ବକ୍ସ ଅଫିସରେ ସେ ଅନେକ ସୁପରଷ୍ଟାରଙ୍କ ସହ ମୁହାଁମୁହିଁ ହେବାକୁ ଥିବା ବେଳେ ହଲିଉଡ ଷ୍ଟାର୍ସଙ୍କୁ ମଧ୍ୟ ମାତ୍ ଦେବାକୁ ପ୍ରସ୍ତୁତ ଅଛନ୍ତି । ତେବେ ଆସନ୍ତୁ ଅକ୍ଷୟଙ୍କ ଫିଲ୍ମ ସହ କେଉଁ କେଉଁ ଫିଲ୍ମ ରିଲିଜ ହେବ...
ମେ 28ରେ ଅକ୍ଷୟଙ୍କ ବହୁ ଚର୍ଚ୍ଚିତ ଫିଲ୍ମ ‘ବେଲ ବଟମ’ ସିନେମାହଲରେ ରିଲିଜ ହେବ । ଫିଲ୍ମରେ ତାଙ୍କ ସହ ବାଣୀ କପୁର, ହୁମା କୁରୈଶୀ, ଲାରା ଦତ୍ତା ଓ ଆଦିଲ ହୁସୈନ ନଜର ଆସିବେ । ସେପଟେ ହଲିଉଡର ପପୁଲାର ଫିଲ୍ମ ‘ଫାଷ୍ଟ ଆଣ୍ଡ ଫ୍ୟୁରିୟସ’ ପାର୍ଟ 9 ମଧ୍ୟ ମେ 28ରେ ରିଲିଜ ହେବ । ଆଉ ଅକ୍ଷୟ ଓ ୱିନ ଡିଜଲଙ୍କ ମଧ୍ୟରେ କଡା ଟକ୍କର ଦେଖିବାକୁ ମିଳିବ । ସେପଟେ ‘ଫାଷ୍ଟ ଆଣ୍ଡ ଫ୍ୟୁରିୟସ’ର ଫ୍ୟାନ୍ସ କେବଳ ଭାରତରେ ନୁହେଁ ପୁରା ବିଶ୍ବରେ ଅଛନ୍ତି ।
ସେହିପରି 1983ରେ କ୍ରିକେଟ ୱାର୍ଲ୍ଡ କପ୍ ଉପରେ ଆଧାରି ସ୍ପୋର୍ଟ୍ସ ଡ୍ରାମା ଫିଲ୍ମ ‘83’ ନେଇ ପରଦାକୁ ଫେରିବେ ଲୋକପ୍ରିୟ ଅଭିନେତା ରଣବୀର ସିଂ, । ଜୁନ 4ରେ ରିଲିଜ ହେବ ଫିଲ୍ମ । କ୍ରିକେଟ କିମ୍ବଦନ୍ତୀ କପିଲ ଦେବ ଭୂମିକାରେ ଅଭିନୟ କରିଛନ୍ତି ଅଭିନେତା । ଯାହାର ନିର୍ଦ୍ଦେଶନା ଦାୟିତ୍ବ କବୀର ଖାନ ତୁଲାଇଛନ୍ତି ।
‘ବେଲ ବଟମ’ ବ୍ୟତୀତ ଅକ୍ଷୟଙ୍କ ଆଉ ଏକ ରୋମାଣ୍ଟିକ ଡ୍ରାମା ଫିଲ୍ମ ‘ଅତରଙ୍ଗୀ ରେ’ ଅଗଷ୍ଟ 6ରେ ରିଲିଜ ହେବ । ଯେଉଁଥିରେ ଚୁଲବୁଲି ଅଭିନେତ୍ରୀ ସାରା ଅଲ୍ଲୀ ଖାନଙ୍କ ସହ ସାଉଥ ସୁପରଷ୍ଟାର ଧନୁଷ ନଜର ଆସିବେ ।
ଅନ୍ୟପଟେ ଅମିତାଭ ବଚ୍ଚନଙ୍କ ଫିଲ୍ମ ‘ଝୁଣ୍ଡ’ ମଧ୍ୟ ଜୁନ 14ରେ ରିଲିଜ ହେବାକୁ ଯାଉଛି । ଏହା ଏକ ସ୍ପୋର୍ଟ୍ସ ଡ୍ରାମା ଫିଲ୍ମ । ସେହିପରି ଶାହିଦ କପୁରଙ୍କ ଫିଲ୍ମ ‘ଜର୍ସି’ ଅକ୍ଷୟଙ୍କ ଫିଲ୍ମ ‘ପୃଥ୍ବୀରାଜ’ ସହ ମୁହାଁମୁହିଁ ହେବ । ଦିୱାଲୀ ଅବସରରେ ଏହି ଦୁଇ ଫିଲ୍ମ ଏକାଠି ରିଲିଜ ହେବ ।
