ମୁମ୍ବାଇ: ମୋହିତ ସୁରୀଙ୍କ ନିର୍ଦ୍ଦେଶିତ ମଲ୍ଟିଷ୍ଟାରର ଫିଲ୍ମ 'ମଲଙ୍ଗ'କୁ ନେଇ ଅନେକ ଚର୍ଚ୍ଚା ଚାଲିଥିବାବେଳେ ନିକଟରେ ଆରମ୍ଭ ହୋଇଛି ଫିଲ୍ମର ସୁଟିଂ । ଫିଲ୍ମନିର୍ମାତା ସୋସିଆଲ ମିଡିଆରେ ଏହି ଘୋଷଣା କରିଥିବାବେଳେ ପୁଣିଥରେ ଧମାଲ କରିବାକୁ ପ୍ରସ୍ତୁତ ଆଶୀକୀ 2 ଫେମ ମୋହିତ ସୁରୀ ଓ ଆଦିତ୍ୟ ରୟ କପୁର...
ଫିଲ୍ମ 'ମଲଙ୍ଗ'ର ସୁଟିଂ ମୋହିତ ଓ ଆଦିତ୍ୟ ସେଟରେ ପୂଜା କରି ଆରମ୍ଭ କରିଥିବାବେଳେ ଆଦିତ୍ୟଙ୍କ ସହ ନଜର ଆସିବେ ଅଭିନେତ୍ରୀ ଦିଶା ପଟାନୀ । ଫିଲ୍ମରେ ଆଦିତ୍ୟ ଓ ଦିଶାଙ୍କ ଛଡା ଅନିଲ କପୁର, କୁନାଲ ଖେମୁ ମଧ୍ୟ ନଜର ଆସିବେ । ଏହି ଫିଲ୍ମ ପୂର୍ବରୁ ମୋହିତ ସୁରୀ ବକ୍ସଅଫିସକୁ ଅନେକ ରୋମାଣ୍ଟିକ ଡ୍ରାମା ଭେଟି ଦେଇସାରିଛନ୍ତି । ସେଗୁଡିକ ମଧ୍ୟରୁ କଲିୟୁଗ ହାଫ ଗର୍ଲଫ୍ରେଣ୍ଡ, ହମାରୀ ଅଧୁରୀ କାହାନୀ, ଆଶିକୀ 2 ଆଦି ଅନ୍ୟତମ ।
ଫିଲ୍ମଟି ଭୂଷଣ କୁମାରଙ୍କ ଟି-ସିରିଜ ଓ ଲଭ ରଞ୍ଜନଙ୍କ ମିଳିତ ସହଯୋଗରେ ପ୍ରଯୋଜିତ ଓ ଏହା 2020 ଫେବୃୟାରୀ 14ତାରିଖରେ ରିଲିଜ ହେବାକୁ ଯାଉଛି । ଆଦିତ୍ୟ ରୟ କପୁର ଏବେ ଫିଲ୍ମ 'କଲଙ୍କ'ର ପ୍ରମୋଶନରେ ବ୍ୟସ୍ତ ଥିବାବେଳେ ଦିଶା ପଟାନୀ ସଲମାନ ଖାନଙ୍କ ସହ ଫିଲ୍ମ 'ଭାରତ'ର ସୁଟିଂରେ ବ୍ୟସ୍ତ ।
