ମୁମ୍ବାଇ: ହିନ୍ଦୀ ସିନେମାର ଆକ୍ସନ ହିରୋ ସନ୍ନି ଦେଓଲ ବଲିଉଡରେ ଦେଖାଇଥିଲେ ଦମଦାର ଆକ୍ସନ । ଗୋଟିଏ ପରେ ଗୋଟିଏ ଦମଦାର ଫିଲ୍ମ କରି ଦର୍ଶକଙ୍କ ମନ କିଣିଥିଲେ ସେ । ଏହି ଫିଲ୍ମରେ ସାମିଲ ଅଛି ତାଙ୍କ ସୁପରଡୁପର ହିଟ୍ ଫିଲ୍ମ ‘ଘାୟଲ’ । ଯାହା ତାଙ୍କୁ ବଲିଉଡରେ ଦେଇଥିଲା ଆକ୍ସନ ହିରୋର ପରିଚୟ । ନିକଟରେ ଏହି ଫିଲ୍ମ ରିଲିଜକୁ 30 ବର୍ଷ ପୂରଣ ହୋଇଥିଲା । ସେହିପରି ଆଜି ସନ୍ନିଙ୍କ 64ତମ ଜନ୍ମ ଦିନ । ତେବେ ଏହି ଅବସରରେ ଜାଣିବା ‘ଘାୟଲ’ ଫିଲ୍ମର କିଛି ଖାସ୍ କଥା...
ରାଜକୁମାର ସନ୍ତୋଷୀ ଏହି ଫିଲ୍ମର ନିର୍ଦ୍ଦେଶନା ଦାୟିତ୍ବ ତୁଲାଇଥିଲେ । ଯାହାଦ୍ବାରା ସେ ନିର୍ଦ୍ଦେଶନା ଦୁନଆରେ ପଦାର୍ପଣ କରିଥିଲେ । ପ୍ରଥମ ସେ ଫିଲ୍ମର କାହାଣୀ ସନ୍ନିଙ୍କୁ କହିଥିଲେ । ଆଉ କାହାଣୀ ଶୁଣି ଫିଲ୍ମ ପାଇଁ ସଙ୍ଗେ ସଙ୍ଗେ ରାଜି ହୋଇଥିଲେ ସନ୍ନି । ରାଜ୍ ନୂଆ ନିର୍ଦ୍ଦେଶକ ଥିବାରୁ ଫିଲ୍ମ ପାଇଁ ନିର୍ମାତା ମିଳିବା କଷ୍ଟଦାୟକ ଥିଲା । ଯାହା ପାଖକୁ ସନ୍ନି ଓ ରାଜ୍ ଫିଲ୍ମ କାହାଣୀ ନେଇକି ଯାଉଥିଲେ ସମସ୍ତେ ଗୋଟିଏ କଥା କହୁଥିଲେ କି ଏ ଫିଲ୍ମ ଚାଲିବ ନାହିଁ ।
ସବୁ ସ୍ଥାନରୁ ହତାଶ ହେବା ପରେ ସନ୍ନି ନିଜ ପିତା ତଥା ଅଭିନେତା ଧର୍ମେନ୍ଦ୍ରଙ୍କ ପାଖକୁ ଯାଇଥିଲେ । ଫିଲ୍ମର କାହାଣୀ ଧର୍ମେନ୍ଦ୍ରଙ୍କୁ ପସନ୍ଦ ଆସିବାରୁ ସେ ଫିଲ୍ମ ନିର୍ମାଣ କରିବାକୁ ସ୍ଥିର କରିଥିଲେ । ଏହା ଦେଖି ସନ୍ନି ଓ ରାଜ୍ ଖୁସି ପାଗଳ ହୋଇ ଉଠିଥିଲେ ।
ଏକଦା ସନ୍ନି ଫିଲ୍ମ ବିଷୟରେ ଆଲୋଚନା କରି କହିଥିଲେ, ‘ପିତା ଆମ ଉପରେ ଭରସା କରି ଫିଲ୍ମ ନିର୍ମାଣ କରିବାକୁ ରାଜୁ ହୋଇଥିଲେ । ଏଥି ପାଇଁ ଆମେ ଫିଲ୍ମରେ ଶାନଦାର କାମ କରିବାକୁ ଚେଷ୍ଟା କରିବା ସହ କଡା ପରିଶ୍ରମ ମଧ୍ୟ କରିଥିଲୁ । ଏହି କାରଣ ପାଇଁ ଫିଲ୍ମଟି ବକ୍ସ ଅଫିସରେ ସୁପରହିଟ୍ ହେବା ସହ ଦର୍ଶକଙ୍କ ମନ କିଣିଥିଲା ।’
ପ୍ରକାଶ ଥାଉକି ଫିଲ୍ମରେ ସନ୍ନିଙ୍କ ରୋମାନ୍ସ କରିଥିଲେ ସୁନ୍ଦରୀ ଅଭିନେତ୍ରୀ ମୀନାକ୍ଷୀ ସେଷାଦ୍ରୀ । ସେହିପରି ଅଭିନେତା ରାଜ୍ ବବ୍ବର, ମୌସମୀ ଚାଟର୍ଜୀ ଓ ଅମରିଶ ପୁରୀଙ୍କ ଜବରଦସ୍ତ ଅଭିନୟ ଦେଖିବାକୁ ମିଳିଥିଲା । ଏହି ଫିଲ୍ମ ପାଇଁ ସନ୍ନି ଜାତୀୟ ଫିଲ୍ମ ପୁରସ୍କାରରେ ସ୍ବତନ୍ତ୍ର ଜୁରି ପୁରସ୍କାର ପାଇଁ ମନୋନୀତ ହୋଇଥିଲେ |
ଫିଲ୍ମ ହିଟ୍ ହେବା ପରେ ସନ୍ନି ଓ ରାଜ୍ ଫେମସ ଫିଲ୍ମ ‘ଦାମିନୀ’ ଏବଂ ‘ଘାତକ’ରେ ଏକାଠି କାମ କରିଥିଲେ। ଆଉ 2016ରେ ସନ୍ନି ନିଜ ନିର୍ଦ୍ଦେଶନାରେ ନିର୍ମାଣ କରିଥିଲେ ‘ଘାୟଲ ୱାନ୍ସ ଅଗେନ।’
ବ୍ୟୁରୋ ରିପୋର୍ଟ, ଇଟିଭି ଭାରତ
