ସମ୍ବଲପୁର: ସହରରେ ଘଟିଛି ପୁଣି ଏକ ହତ୍ୟାକାଣ୍ଡ । ଧନୁପାଲି ଥାନା ସାକ୍ଷୀପଡା ଅଞ୍ଚଳରେ ଜଣେ ଯୁବକଙ୍କୁ ପିଟିପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି । ମୃତ ଯୁବକ ବିଜୟ ନାଏକ ହୋଇଥିବା ସୂଚନା ।
ପୂର୍ବ ଶତ୍ରୁତାକୁ କେନ୍ଦ୍ର କରି 2 ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିଲା । ମଙ୍ଗଳବାର ରାତିରେ ସାକ୍ଷୀପଡା ସ୍ଥିତ ହନୁମାନ ମନ୍ଦିର ପାଖରେ କୌଣସି କାରଣରୁ ଦୁଇଟି ଗୋଷ୍ଠୀ ମଧ୍ୟରେ ଯୁକ୍ତିତର୍କ ଓ ପରେ ଝଗଡା ହୋଇଥିଲା । ଏହାପରେ ଧାରୁଆ ଅସ୍ତ୍ରରେ ଅପର ଗୋଷ୍ଠୀର ଲୋକମାନେ ବିଜୟଙ୍କ ଉପରକୁ ଆକ୍ରମଣ କରିଥିଲେ ।
ବିଜୟ ଗୁରୁତର ହୋଇଯିବାରୁ ତାଙ୍କୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଛି । ତେବେ ଆକ୍ରମଣରେ ବିଜୟଙ୍କର ଗୋଟିଏ ଆଖି ନଷ୍ଟ ହୋଇଯାଇଥିବା ଦେଖିବାକୁ ମିଳିଛି ।
ସେପଟେ ଘଟଣାସ୍ଥଳରେ ପୋଲିସ ପହଞ୍ଚିବା ସହ ତଦନ୍ତ ଆରମ୍ଭ କରି ହତ୍ୟାକାରୀମାନଙ୍କୁ ଖୋଜୁଥିବା ଜଣାପଡିଛି । ସୂଚନାଥାଉକି, ଏହି ହତ୍ୟାକାଣ୍ଡକୁ ମିଶାଇ ଗତ 10 ଦିନରେ ସମ୍ବଲପୁର ସହରରେ 3ଟି ହତ୍ୟା ହୋଇଛି ।
ସମ୍ବଲପୁରରୁ ବାଦଶାହ ଜୁଶ୍ମନ ରଣା, ଇଟିଭି ଭାରତ
