ଭୁବନେଶ୍ବର: ଦିଲ୍ଲୀ, ବେଙ୍ଗାଲୁରୁ, ଭୁବନେଶ୍ବର ପରେ ଧରାପଡିଲେ ଲୁଟେରା । ଭାଇଜାଗର ଏକ ଏଟିଏମରୁ 9ଲକ୍ଷ ଟଙ୍କା ଲୁଟ ପରେ ଧରିଲା ପୋଲିସ । ଭାଇଜାଗରୁ ଗିରଫ ପରେ ପୂରା ଗ୍ୟାଙ୍ଗର ହେଲା ପର୍ଦ୍ଦାଫାସ ।
ଗତ 10 ତାରିଖରେ ଭୁବନେଶ୍ବର ପଟିଆ ପିଏନବି ଏଟିଏମରୁ ଲୁଟ୍ କରିଥିଲେ 27 ଲକ୍ଷ ଟଙ୍କା । ପଞ୍ଜାବର ସମରଜୋତ ସିଂ ଓ କେରଳର ଜାଫର ସାଦିକ ଏଭି ଏଟିଏମରୁ ଲୁଟି ନେଇଥିଲେ ଟଙ୍କା ।
ସାଧାସିଧା ବେଶରେ ଗତ 5 ତାରିଖରେ କୋଲକାତାରୁ ଭୁବନେଶ୍ବରରେ ପହଞ୍ଚିଥିଲେ ଏହି 2 ଲୁଟେରା । ହାଇପ୍ରୋଫାଇଲ ଏରିଆ ଇନଫୋସିଟରେ ଏଣ୍ଟ୍ରି ମାରିଥିଲେ । ଦୁଇ ଜଣ ଦୁଇଟି ହୋଟେଲରେ ରହିଥିଲେ । ପଟିଆରେ ଏକ ବାଇକ ଭଡାରେ ନେଇ ବିଭିନ୍ନ ଏଟିଏମକୁ ଯାଇଥିଲେ ।
ପରେ ହୋଟେଲ ପାଖ ଦୋକାନରୁ ଗ୍ୟାସ କଟର ଆଣି 10 ତାରିଖ ରାତି 1ଟାରେ ଲୁଟ ଅପରେସନ ଆରମ୍ଭ କରିଥିଲେ । ସେହିଦିନ କ୍ୟାସ ଲୋଡ ହୋଇଥିବା ପିଏନବି ଏଟିଏମରୁ ଗ୍ୟାସ କଟରରେ ତାଡି 27 ଲକ୍ଷ 84 ହଜାର ଟଙ୍କା ଲୁଟ କରିଥିଲେ । ପରେ 11 ତାରିଖ ସକାଳ 7ଟାରୁ ଫ୍ଲାଇଟ ଯୋଗେ ଭୁବନେଶ୍ବରରୁ ଦିଲ୍ଲୀ ପଳାଇଥିଲେ ।
ଗଞ୍ଜେଇ ବେପାରୀରୁ ହାଇପ୍ରୋଫାଇଲ ଲୁଟେରା
ଟଙ୍କା ରୋଜଗାର କରିବାର ନିଶା ଏମାନଙ୍କୁ ଲୁଟେରା ସଜାଇଦେଇଛି । ପ୍ରଥମେ ଗଞ୍ଜେଇ ବେପାର ଓ ଏବେ ହାଇପ୍ରୋଫାଇଲ ଲୁଟ୍ କରୁଛନ୍ତି ଏମାନେ । ଏନଡିପିଏସ ଆକ୍ଟରେ ଗିରଫ ହୋଇ ଜେଲରେ ଥିବାବେଳେ ଲୁଟ୍ର କୌଶଳ ଶିଖି ଏହାକୁ ପେଶା କରିଦେଇଥିଲେ ଏହି ଲୁଟେରା ।
ବେଙ୍ଗାଲୁରୁରୁ 2ଟି ଏଟିଏଏମ, ଦିଲ୍ଲୀ, ହାଇଦ୍ରାବାଦ ଓ ଭୁବନେଶ୍ବର ପରେ ଭାଇଜାଗରୁ ଗୋଟିଏ ଲେଖାଏଁ ଏଟିଏମ ଲୁଟ କରିଛନ୍ତି ଏମାନେ ।
ଗତ 21 ତାରିଖରେ ଭାଇଜାଗରେ ହୋଇଥିବା ଲୁଟରେ ସେଠାକାର ପୋଲିସ ଏମାନଙ୍କୁ ଗିରଫ କରିବା ପରେ ସମସ୍ତ ତଥ୍ୟ ସାମ୍ନାକୁ ଆସିଛି । ତେବେ ଓଡିଶାର ଭଦ୍ରକ ଓ ବାଲେଶ୍ବରରେ ବି ଏମାନେ ବୁଲିଥିବା ଜଣାପଡିଛି । ଯାହାକୁ ନେଇ ତନାଘନା ଚଳାଇଛି ପୋଲିସ ।
ସେପଟେ ଏତେ ପରିମାଣର ଟଙ୍କା ନେଇ କେମିତି ଫ୍ଲାଇଟରେ ଗଲେ । ବ୍ୟାଗେଜ ସ୍କାନର ଓ ଡିଆରଆଇ ସ୍କାନରରୁ କେମିତି ଖସିଲେ ସେନେଇ ପୋଲିସ ତନାଘନା କରୁଛି ।
ଅନ୍ୟପଟେ ଏହାର ତଦନ୍ତ କରିବା ପାଇଁ ସ୍ପେଶାଲ ସ୍କ୍ବାଡ ଏସିପିଙ୍କ ନାମ ଗୃହମନ୍ତ୍ରାଳୟକୁ ସୁପାରିଶ ଯୋଜନା କରାଯାଇଥିବା ଜଣାପଡିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
