ଲଣ୍ଡନ: ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକଙ୍କୁ ଝଟକା । ଦିନକୁ ଦିନ ସେ ସମସ୍ୟା ଭିତରେ ଛନ୍ଦି ହେଉଥିବା ବେଳେ ଏବେ ତାଙ୍କ ଘନିଷ୍ଠ ସହଯୋଗୀ ତଥା ଉପ-ପ୍ରଧାନମନ୍ତ୍ରୀ ଡୋମିନିକ ରାବ ଇସ୍ତଫା ଦେଇଛନ୍ତି । ଏନେଇ ସେ ଗତକାଲି(ଶୁକ୍ରବାର) ଘୋଷଣା କରିଛନ୍ତି । କାର୍ଯ୍ୟ ସମୟରେ ସେ କର୍ମଚାରୀଙ୍କୁ ଖରାପ ବ୍ୟବହାର କରିବା ଅଭିଯୋଗ ହେବା ପରେ ଡୋମିନିକ ଏହି ନିଷ୍ପତ୍ତି ନେଇଛନ୍ତି । ମାମଲାରେ ତାଙ୍କ ବିରୋଧରେ ରିପୋର୍ଟ ଆସିବା ପରେ ସେ ଇସ୍ତଫା ଦେଇଛନ୍ତି ।
ଅନ୍ୟପଟେ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି ୪୯ ବର୍ଷୀୟ ଡୋମିନିକ ରାବ । ଏନେଇ ସେ କହିଛନ୍ତି, " ମୁଁ ତଦନ୍ତ ରିପୋର୍ଟ ଗ୍ରହଣ କରିବାକୁ ବାଧ୍ୟ । କିନ୍ତୁ ମୁଁ କୌଣସି ପ୍ରକାର ଭୁଲ କରି ନାହିଁ କିମ୍ବା କାହାକୁ ଖରାପ ବ୍ୟବହାର କରି ଧମକ ଦେଇନାହିଁ । ସବୁ ସମୟରେ ମୁଁ ପେଶାଦାର ବ୍ୟବହାର କରିଛି । ମୁଁ ମଧ୍ୟ ବିଶ୍ୱାସ କରେ ଯେ ଉଭୟ ପ୍ରତିକୂଳ ଫଳାଫଳ ଭୁଲ ଅଟେ ଏବଂ ଏହା ଉତ୍ତମ ସରକାରର ଆଚରଣ ପାଇଁ ବିପଦପୂର୍ଣ୍ଣ ଉଦାହରଣ ସୃଷ୍ଟି କରୁଛି । ତଦନ୍ତ ପାଇଁ ମୁଁ ନିଜେ ଦାବି କରିଥିଲି । ତେଣୁ ମୋ ବିରୋଧରେ ରାୟ ଆସିବା ପରେ ମୁଁ ନିଜେ ହିଁ ଇସ୍ତଫା ଦେଉଛି । ନିଜ କଥା ରଖିବାକୁ ମୁଁ ବେଶ ଗୁରୁତ୍ବ ଦିଏ । "
ପ୍ରକାଶଥାଉ କି, ଡୋମିନିକ ରାବ ୨୦୧୦ ମସିହାରେ ପ୍ରଥମେ ବ୍ରିଟେନ ସାଂସଦକୁ ନିର୍ବାଚିତ ହୋଇଥିଲେ । ପ୍ରଥମେ ନ୍ୟାୟ ସଚିବ ଏବଂ ବିଦେଶ ସଚିବ ରହିଥିଲେ । ତେବେ ବୋରିସ ଜନସନଙ୍କ ସମୟରେ ଉପ-ପ୍ରଧାନମନ୍ତ୍ରୀ ହୋଇଥିଲେ । ଏହାରି ଭିତରେ ୨୦୨୦ ମସିହାରେ ଜନସନଙ୍କ ଅସୁସ୍ଥତା କାରଣରୁ ସେ ପ୍ରଧାନମନ୍ତ୍ରୀ ଦାୟିତ୍ବ ମଧ୍ୟ ସମ୍ଭାଳିଥିଲେ । ସେବେ ଠାରୁ ସେ ଉପ-ପ୍ରଧାନମନ୍ତ୍ରୀ ଭାବେ ଦାୟିତ୍ବ ତୁଲାଇ ଆସୁଥିବା ବେଳେ ତାଙ୍କ ବିରୋଧରେ ଗତ ନଭେମ୍ବର ମାସରେ ଅଭିଯୋଗ ଆସିଥିଲା । ୩ଟି ବିଭାଗର ଅଧିକାରୀଙ୍କୁ ରାବ ଖରାପ ବ୍ୟବହାର ସହ ଧମକ ଚମକ ଦେଇଥିବା ନେଇ ଅଭିଯୋଗ ହୋଇଥିଲା । ସରକାରୀ ଅଧିକାରୀମାନେ ହିଁ ଏହି ଅଭିଯୋଗ ଆଣିଥିଲେ । ତେବେ ଅଭିଯୋଗକୁ ଆଧାର କରି ଉପଯୁକ୍ତ ତଦନ୍ତ କରାଯାଉ ବୋଲି ସେ କହିଥିଲେ । ହେଲେ ତାଙ୍କ ବିପକ୍ଷରେ ରାୟ ଆସିବା ପରେ ସେ ଶୁକ୍ରବାର ଇସ୍ତଫା ଦେଇଛନ୍ତି ।
କହିରଖିଛୁ ଯେ, ଋଷି ସୁନକଙ୍କ ସରକାରରେ ରାବଙ୍କୁ ମିଶାଇ ୬ ମାସରେ ୩ ବରିଷ୍ଠ ଅଧିକାରୀ ଇସ୍ତଫା ଦେଇଛନ୍ତି । ତେବେ ଉପପ୍ରଧାନମନ୍ତ୍ରୀ ଡୋମିନିକ ରାବଙ୍କର ଇସ୍ତଫା ସୁନକ ପାଇଁ ଏକ ବଡ ଝଟକା ସାବ୍ୟସ୍ତ ହୋଇପାରେ ।
