ୱାଶିଂଟନ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଆମେରିକା ରାଷ୍ଟ୍ରପତି ଜୋ' ବାଇଡେନଙ୍କ ସହ ଡିନର୍/ରାତ୍ରିଭୋଜନ କରିବେ । ମୋଦିଙ୍କ ସମ୍ମାନରେ ହ୍ବାଇଟ୍ ହାଉସ ପକ୍ଷରୁ ରାଜକୀୟ ନୈଶ୍ୟଭୋଜନର ଆୟୋଜନ କରାଯାଇଛି । ଏଥିପାଇଁ ୪୦୦ ବିଶେଷ ଅତିଥିଙ୍କୁ ଆମନ୍ତ୍ରିତ କରାଯାଇଛି । ତେବେ ଡିନର ପୂର୍ବରୁ ଖାଦ୍ୟସୂଚୀ ଏବଂ ପ୍ରସ୍ତୁତି ସମ୍ପର୍କରେ ବାଇଡେନ ଗଣମାଧ୍ୟମକୁ ସୂଚନା ଦେଇଛନ୍ତି । ଖାଦ୍ୟ ମେନୁରେ ଶାକାହାରୀ ଭୋଜନ ସହ ଏଥିରେ ମିଲେଟକୁ ସାମିଲ କରାଯାଇଛି । ମେନୁରେ ମାରିନେଟେଡ ମିଲେଟ, ଗ୍ରୀଲ୍ଡ କର୍ନ କର୍ନେଲ, ଛତୁ, ଟାଞ୍ଜି ଆଭାକାଡୋ ସସ୍ ଇତ୍ୟାଦି ବ୍ୟଞ୍ଜନ ରହିଛି । ଆମେରିକାର ଜଣେ ପ୍ରସିଦ୍ଧ ସେଫ୍ ଏହି ଖାଦ୍ୟସବୁ ପ୍ରସ୍ତୁତ କରିବେ ।
ପ୍ରଧାନମନ୍ତ୍ରୀ ମୋଦି ଶାକାହାରୀ ହୋଇଥିବାରୁ ଆମେରିକାର ପ୍ରଥମ ମହିଳା ଜିଲ୍ ବାଇଡେନ କାର୍ଲିଫର୍ଣ୍ଣିଆର ଜଣାଶୁଣା ସେଫ୍ ନିନା କର୍ଟିସଙ୍କୁ ହ୍ବାଇଟ ହାଉସ କର୍ମଚାରୀଙ୍କ ସହ ମିଶି ଚମତ୍କାର ସୁସ୍ବାଦୁ ଶାହାହାରୀ ବ୍ୟଞ୍ଜନ ପ୍ରସ୍ତୁତ କରିବାକୁ କହିଛନ୍ତି । କାରଣ ସେଫ୍ ନିନା ସୁସ୍ବାଦୁ ଶାହାହାରୀ ଭୋଜନ ତିଆରି କରିବାରେ ପାରଙ୍ଗମ ଅଟନ୍ତି । ତେବେ ଅତିଥିମାନଙ୍କ ପାଇଁ ମେନ କୋର୍ସରେ ଆମିଷ ବିକଳ୍ପ ଭାବେ ମାଛ ରଖାଯାଇଛି । ଅନ୍ୟ ଅତିଥିମାନେ ଚାହିଁଲେ ମାଛ ଖାଇପାରିବେ ।
ରାଜକୀୟ ରାତ୍ରିଭୋଜନରେ କ'ଣ ସବୁ ଖାଦ୍ୟ ରହିଛି:
ନୈଶ୍ୟଭୋଜନର ଷ୍ଟାର୍ଟରରେ ମାରିନେଟେଡ ମିଲେଟ, ଗ୍ରୀଲ୍ଡ କର୍ନ କର୍ନେଲ ସାଲାଡ, ତରଭୁଜ, ଟାଙ୍ଗି ଆଭାକୋଡା ସସ୍ ରଖାଯାଇଛି । ସେହିପରି ମେନ କୋର୍ସରେ ଷ୍ଟଫ୍ଡ ପୋଟେବେଲୋ ମସ୍ରୁମ୍, ୟୋଗଟ୍ ସସ୍, ମିଲେଟ କେକ୍, ସାଫ୍ରନ୍ ଇନଫିଉଜଡ ରିସୋଟୋ ଏବଂ ମିଠାରେ ରୋଜ୍ ଓ ଷ୍ଟ୍ରବେରୀ ସର୍ଟକେକ ରହିଛି ।
ରାଜକୀୟ ରାତ୍ରିଭୋଜନ ସମ୍ପର୍କରେ ସୂଚନା ଦେଇ ଜିଲ୍ ବାଇଡେନ କହିଛନ୍ତି, ଆଜି ରାତିରେ ହ୍ବାଇଟ ହାଉସର ସାଉଥ ଲନ୍ରେ ସ୍ବତନ୍ତ୍ର ଅତିଥିମାନଙ୍କ ସମାଗମ ହେବ । ନୈଶ୍ୟଭୋଜନ ପାଇଁ ୪୦୦ରୁ ଅଧିକ ଅତିଥିମାନଙ୍କୁ ଆମନ୍ତ୍ରିତ କରାଯାଇଛି । ଏଥିପାଇଁ ତ୍ରିରଙ୍ଗା ଥିମରେ ସାଉଥ ଲନର ପାଭିଲିୟନକୁ ସୁସଜ୍ଜିତ କରାଯାଇଛି । ସେଫ୍ ନିନା କର୍ଟିସ କହିଛନ୍ତି, ଆମେରିକାର ଫାଷ୍ଟ୍ ଲେଡିଙ୍କ ସହ କାମ କରିବାକୁ ସୁଯୋଗ ପାଇ ମୁଁ ଅତ୍ୟନ୍ତ ଆନନ୍ଦିତ । ଆମେ ଏପରି ମେନୁ ତିଆରି କରିଛୁ ଯେଉଁଥିରେ ଆମେରିକାର ସବୁଠୁ ଭଲ ବ୍ୟଞ୍ଜନ ସାମିଲ କରାଯିବା ସହ ଭାରତୀୟ ଉପାଦନ ଓ ସ୍ବାଦ ରହିଛି । ଭାରତ ଅନ୍ତର୍ଜାତୀୟ ମିଲେଟ୍ ବର୍ଷ ପାଳନର ନେତୃତ୍ବ ନେଉଥିବାରୁ ମେନୁରେ ମାରିନେଟ ମିଲେଟକୁ ସ୍ଥାନିତ କରାଯାଇଛି ।
