କାବୁଲ: ପୁଣି ଆଫଗାନିସ୍ତାନରେ ଭୂମିକମ୍ପ ଝଟକା । ଗତକାଲି(ସୋମବାର) ବିଳମ୍ବିତ ରାତିରେ ଆଫଗାନିସ୍ତାନର ରାଜଧାନୀ କାବୁଲରେ ଏହି ଭୂକମ୍ପ ଝଟକା ଅନୁଭୂତ ହୋଇଛି । ରିକ୍ଟର ସ୍କେଲରେ ଏହାର ତୀବ୍ରତା 4.1 ରେକର୍ଡ କରାଯାଇଛି । ତେବେ ଏହି ଭୂମିକମ୍ପରେ କୌଣସି ମୃତାହତ କିମ୍ବା କ୍ଷୟକ୍ଷତି ହୋଇନଥିବା ସୂଚନା ରହିଥିଲେ ମଧ୍ୟ ଲୋକମାନଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିଲା ।
ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ରର ସୂଚନା ଅନୁଯାୟୀ, ମଙ୍ଗଳବାର ରାତି 12ଟା 03 ସେକେଣ୍ଡରେ ଆଫଗାନିସ୍ତାନରେ ଏହି ଭୂକମ୍ପ ଝଟକା ଅନୁଭୂତ ହୋଇଥିଲା । ରିକ୍ଟର ସ୍କେଲରେ ଏହାର ତୀବ୍ରତା 4.1 ରେକର୍ଡ ଯାଇଥିବା ବେଳେ ଏହାର କେନ୍ଦ୍ର କାବୁଲରେ 73 କିମି ଗଭୀରତା ଥିବା ଜଣାପଡିଛି । ଏହାର ଅକ୍ଷାଂଶ 35.07 ରହିଥିବା ବେଳେ ଏହାର ଦ୍ରାଘିମା 63.38 ରହିଛି ।
ଏହାମଧ୍ୟ ପଢନ୍ତୁ.. Afghanistan Earthquake: ଦୁଇ ଥର ଭୂକମ୍ପ ଝଟକାରେ ଥରିଲା ଆଫଗାନିସ୍ତାନ
ପ୍ରକାଶ ଥାଉକି, ଏହାପୂର୍ବରୁ ଅକ୍ଟୋବର ମାସର ଆରମ୍ଭରେ ଆଫଗାନିସ୍ତାନରେ ପ୍ରକୃତିର ତାଣ୍ଡବ ଦେଖିବାକୁ ମିଳିଥିଲା । ଲଗାତର ଭାବେ ସେଠାରେ ଭୂକମ୍ପ ଝଟକା ଅନୂଭୁତ ହୋଇଥିଲା । ଗତ ୭ ତାରିଖରେ ଆଫଗାନିସ୍ତାନରେ ୧ ଘଣ୍ଟା ମଧ୍ୟରେ ୩ ଥର ଭୂକମ୍ପ ହୋଇଥିଲା । ଭୂକମ୍ପର କେନ୍ଦ୍ରସ୍ଥଳୀ ହେରାତ ସହର ହୋଇଥିବାବେଳେ ତାହାର କମ୍ପନ ପ୍ରାୟ ୭.୭ କିମି ଗଭୀରରେ ହୋଇଥିଲା । ପ୍ରଥମ ଝଟ୍କାର ତୀବ୍ରତା ୬.୩ ମ୍ୟାଗ୍ନିଚ୍ୟୁଡ୍ ଥିଲା । ପରେ ପୁଣିଥରେ ୫.୯ ତୀବ୍ରତାର କମ୍ପନ ମଧ୍ୟ ହୋଇଥିଲା ।
ତେବେ ସେହି ପ୍ରଳୟଙ୍କାରୀ ଭୂକମ୍ପ ଯୋଗୁଁ ୨୦୦୦ରୁ ଅଧିକ ଲୋକଙ୍କ ଜୀବନ ଯାଇଥିବା ବେଳେ ୯୦୦୦ରୁ ଅଧିକ ଲୋକ ଆହତ ହୋଇଥିଲେ ଏବଂ ୧୩୦୦ରୁ ଅଧିକ ଘର ନଷ୍ଟ ହୋଇଯାଇଥିଲା । ସେହିପରି ଗତ ମାସରେ ଆଫଗାନିସ୍ତାନରେ ଲଗାତାର ୨ଥର ବଡ ଧରଣର ଭୂକମ୍ପ ଝଟକା ଅନୁଭୂତ ହୋଇଥିଲା । ପ୍ରଥମେ 6.2 ତୀବ୍ରତାର ଭୂକମ୍ପ ହୋଇଥିବା ବେଳେ ପରେ 5.4 ତୀବ୍ରତାର ଭୂକମ୍ପ ହୋଇଥିଲା ।
କିଭଳି ମପାଯାଏ ଭୂମିକମ୍ପର ତୀବ୍ରତା: ତେବେ ଭୂକମ୍ପ ମାପିବା ପାଇଁ ରିକ୍ଟର ସ୍କେଲ ରହିଥାଏ । ଏହି ରିକ୍ଟର ସ୍କେଲକୁ ମାଗ୍ନିଚ୍ୟୁଡ ସ୍କେଲ କୁହାଯାଏ । ରିକ୍ଟର ସ୍କେଲରେ ଭୂକମ୍ପକୁ 1ରୁ 9 ଆଧାରରେ ମପାଯାଏ । ଭୂକମ୍ପକୁ ଏହାର କେନ୍ଦ୍ର ଅର୍ଥାତ ଏପିସେଣ୍ଟରରେ ମପାଯାଏ । ଭୂକମ୍ପ ସମୟରେ ମାଟି ମଧ୍ୟରୁ ଏକ ଶକ୍ତି ବାହାରିଥାଏ । ଯାହାର ତୀବ୍ରତାକୁ ମପାଯାଏ । ଏହି ତୀବ୍ରତାରୁ ଭୂକମ୍ପ ଝଟକାର ଭୟବହତାର ଆକଳନ କରାଯାଏ ।
