ଡାମାସ୍କସ: ସିରିଆରେ ଥମିବାର ନାଁ ନେଉନାହିଁ ଜିହାଦୀ କାର୍ଯ୍ୟକଳାପ । ସାଧାରଣ ଲୋକଙ୍କ ଜୀବନ ଏଠାରେ ପ୍ରତି ମୁହୂର୍ତ୍ତରେ ବାଜିରେ ଲାଗିଛି। ଘନ ଘନ ବିସ୍ପୋରଣ, ଗୁଳି ଗୋଳା ବର୍ଷାରେ ଅନେକ ନିରୀହ ପ୍ରାଣ ହରାଉଛନ୍ତି। ଦେଶର ଉତ୍ତର-ପଶ୍ଚିମ ଭାଗରେ ଅବସ୍ଥିତ ଇଦଲିବ ସହରରେ ଦୁଇଟି ବୋମା ବିସ୍ଫୋରଣ ଘଟିବାରୁ 24 ଜଣ ପ୍ରାଣ ହରାଇଛନ୍ତି।
ଏହି ବିସ୍ପୋରଣରେ 4 ଜଣ ଶିଶୁଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ସିରିଆ ମାନବାଧିକାର ନିରୀକ୍ଷକଙ୍କ କହିବାନୁଯାୟୀ, ଇଦଲିବ ସହରରେ ମୁଖ୍ୟ ଭାଗରେ ହିଁ ଏହି ବିସ୍ଫୋରଣ ହୋଇଛି। ପ୍ରଥମେ ଏକ କାର ମଧ୍ୟରେ ଥିବା ବୋମା ହଠାତ୍ ବିସ୍ଫୋରଣ ହୋଇଥିଲା । ଖବର ପାଇ ଘଟଣାସ୍ଥଳରେ ତୁରନ୍ତ ଆମ୍ବୁଲାନ୍ସ ପହଞ୍ଚିବା ସହ ମୃତାହତଙ୍କୁ ହସ୍ପିଟାଲ ନେବା କାର୍ଯ୍ୟ ଜାରି ରଖିଥିଲା। ଠିକ ଏହି ସମୟରେ ଅନ୍ୟ ଏକ ବିସ୍ଫୋରଣ ହୋଇଥିଲା। ଦ୍ୱିତୀୟ ବୋମାଟି ଏକ ବାଇକରେ ଖଞ୍ଜା ହୋଇଥିବାର ଖବର ମିଳିଛି।
ମୋଟ 24 ଜଣଙ୍କର ଜୀବନ ଏହି ବିସ୍ଫୋରଣରେ ଯାଇଥିବା ବେଳେ ଏଯାଏଁ କୌଣସି ସଙ୍ଗଠନ ନିଜକୁ ଦାୟୀ କରିନାହାନ୍ତି। ତେବେ ଇଦଲିବ ହେଉଛି ସିରିଆର ଏକ ପ୍ରମୁଖ ସ୍ଥାନ ଯାହା ଏପର୍ଯ୍ୟନ୍ତ ରାଷ୍ଟ୍ରପତି ବସର-ଅଲ୍ -ଅସଦଙ୍କ ନିୟନ୍ତ୍ରଣାଧିନ ହୋଇପାରିନାହିଁ।
