କାନବେରା: ଅଷ୍ଟ୍ରେଲିଆରେ କୋରୋନା ସ୍ଥିତି ଓ ଲକଡାଉନ କୋହଳ ପ୍ରକ୍ରିୟାର ସମୀକ୍ଷା କରିବା ପାଇଁ ଶୁକ୍ରବାର ଆୟୋଜିତ ହୋଇଥିଲା ଜାତୀୟ କ୍ୟାବିନେଟ ବୈଠକ । ଏହି ବୈଠକରେ ପ୍ରଧାନମନ୍ତ୍ରୀ ସ୍କଟ ମୋରିସନଙ୍କ ସମେତ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ମୁଖ୍ୟମାନେ ସାମିଲ ହୋଇଥିଲେ । ସ୍ଥିତି ସମୀକ୍ଷା ପରେ ଦେଶରେ ତୃତୀୟ ପର୍ଯ୍ୟାୟରେ ଲକଡାଉନ କଟକଣା କୋହଳ କରିବା ପାଇଁ ଆଲୋଚନା ହୋଇଥିଲା ।
ତୃତୀୟ ପର୍ଯ୍ୟାୟର ନିୟମ ମୁତାବକ ଦେଶରେ ସାର୍ବଜନୀନ ସ୍ଥାନରେ ଜଣଙ୍କ ପିଛା 4 ବର୍ଗ ମିଟର ଜାଗା ଛାଡିବା ପାଇଁ କୁହାଯାଉଛି । ଏହି କ୍ରମରେ ଦେଶରେ ଥିବା ବଡ ବଡ ଷ୍ଟାଡିୟମର କ୍ଷମତାକୁ 40,000ରୁ 10,000କୁ କମାଇ ଦିଆଯାଇଛି । ସେପଟେ ଦେଶରେ ଲକଡାଉନ କାରଣରୁ ବନ୍ଦ ପଡିଥିବା କ୍ରୀଡା ଅଭ୍ୟାସ କ୍ଷେତ୍ରଗୁଡିକୁ ସ୍ବତନ୍ତ୍ର ସୁରକ୍ଷା ନିୟମ ସହ ପୁଣି ଖୋଲିବା ପାଇଁ ନିର୍ଦ୍ଦେଶ ଦିଆଯାଇଛି ।
ପ୍ରଧାନମନ୍ତ୍ରୀ ମୋରିସନ ବିସ୍ତୃତ ସୂଚନା ଦେଇ କହିଛନ୍ତି କି ଦେଶରେ ଲୋକଙ୍କୁ ବର୍ତ୍ତମାନ ବାହାରକୁ ବାହାରିବାର ଅନୁମତି ଅଛି । ହେଲେ ଏଥିପାଇଁ ଲୋକଙ୍କ ସାମାଜିକ ଦୂରତା ପ୍ରତି ବିଶେଷ ଧ୍ୟାନ ଦେବାକୁ ହେବ । ସେହିପରି ଲକଡାଉନ ପରେ ଖୋଲୁଥିବା ସ୍ପୋର୍ଟସ କମ୍ପ୍ଲେକ୍ସ ଗୁଡିକରେ ମଧ୍ୟ ସାମାଜିକ ଦୂରତା ବଜାୟ ରଖିପାରିବା ଭଳି ବ୍ୟବସ୍ଥା ଗ୍ରହଣ କରିବା ପାଇଁ ନିର୍ଦ୍ଦେଶ ରହିଛି । ଦେଶରେ ତିନି ସ୍ତରରେ ଲକଡାଉନ କୋହଳ ହେବାର ଯୋଜନା ରହିଥିବା ବେଳେ ଜୁଲାଇ ସୁଦ୍ଧା ଦେଶରେ ସ୍ଥିତି ସ୍ବାଭାବିକ ହେବା ନେଇ ଆଶା ରହିଛି ।
ସୂଚନା ମୁତାବକ ଅଷ୍ଟ୍ରେଲିଆରେ ବର୍ତ୍ତମାନ ସୁଦ୍ଧା 7285 ଜଣ ଆକ୍ରାନ୍ତ ରହିଛନ୍ତି ଓ 102 ଜଣଙ୍କ ମୃତ୍ୟୁ ହୋଇ ସାରିଛି ।
@IANS
