କାନବେରା: ମାନବ ଶରୀରରେ ଶ୍ବାସକ୍ରିୟାଜନିତ ସଂକ୍ରମଣ ଯେ କେତେ ମାରାତ୍ମକ ହୋଇପାରେ ଏବଂ ଏହାର କିପରି ନିରାକରଣ ହୋଇପାରିବ, ସେନେଇ ଅଷ୍ଟ୍ରେଲିଆର ଏକ ଲ୍ୟାବ୍ରେ ପ୍ରସ୍ତୁତ ହୋଇଛି ନୂଆ ଫୁସଫୁସ ସେଲ । ସିଏସଆଇଆରଓ (କମନୱେଲଥ ସାଇଣ୍ଟିଫିକ ଆଣ୍ଡ ଇଣ୍ଡଷ୍ଟ୍ରିଆଲ ରିସର୍ଚ୍ଚ ଅର୍ଗାନାଇଜେସନ)ର ଲ୍ୟାବ୍ରେ ଏହି ମାନବ ଶରୀରର ଫୁସଫୁସ ପରି ଏକ ଏୟାରୱେ ସେଲ ପ୍ରସ୍ତୁତ କରାଯାଇଛି । ଫଳରେ ମଣିଷର ସହଯୋଗ ବିନା ଏହି ସେଲରେ ବିଭିନ୍ନ ପରୀକ୍ଷଣ କରାଯାଇ ଏହାର କାର୍ଯ୍ୟକାରିତା ଦେଖାଯାଇପାରେ । ଏଥିରେ କୋରୋନା ଭୂତାଣୁକୁ ମଧ୍ୟ ଅଧ୍ୟୟନ କରାଯାଇପାରିବ । ଯାହା କୋରୋନାରେ ନିରାକରଣରେ ଗୁରୁତ୍ବପୂର୍ଣ୍ଣ ତଥ୍ୟ ଯୋଗାଇବ ବୋଲି ଗବେଷକମାନେ ମତ ଦେଇଛନ୍ତି ।
ଅଷ୍ଟ୍ରେଲିଆର ଏହି ଜାତୀୟ ସଂସ୍ଥାରେ ପ୍ରସ୍ତୁତ ସେଲ ମଣିଷ ଶରୀରର ବାସ୍ତବ ଗଠନ ପରି ତିଆରି କରାଯାଇଛି । ଯାହା ମାନବ ଶରୀରର ଅବିକଳ ନକଲ ବୋଲି କହିଲେ କିଛି ଭୁଲ ହେବ ନାହିଁ । ଏନେଇ ଅଧ୍ୟୟନର ମୁଖ୍ୟ ଡ଼ଃ ଏଲିଜାବେଥ ଫାରୋଙ୍କ କହିବା ଅନୁଯାୟୀ କୌଣସି ପ୍ରତିଷେଧକର ମାନବ ଶରୀର କିମ୍ବା ପଶୁଙ୍କ ଦେହରେ ପରୀକ୍ଷା ଏକ ସମୟ ସାପେକ୍ଷ ଓ ଖର୍ଚ୍ଚାନ୍ତ ପ୍ରକ୍ରିୟା । ଏହା ଦ୍ବାରା ଚିକିତ୍ସା ପାଇଁ ନୂଆ ପଦକ୍ଷେପ ବିକାଶରେ ମଧ୍ୟ ସମୟ ଅପଚୟ ହୋଇଥାଏ । ଏହାକୁ ରୋକିବା ସହ ସମୟ ବଞ୍ଚାଇବା ପାଇଁ ଲ୍ୟାବ୍ରେ ପ୍ରସ୍ତୁତ ଏୟାରୱେ ସେଲ ଅତି ଜରୁରୀ ଆବିଷ୍କାର ।
ଏହି ସେଲ ବ୍ୟବହାରରେ କମ ସମୟ ମଧ୍ୟ ଅଧିକ ପରକ୍ଷୀ ନିରୀକ୍ଷା କରିହେବ । କେବଳ ସେତିକି ନୁହେଁ ଲ୍ୟାବ୍ରେ ମଧ୍ୟ ପରୀକ୍ଷଣ ପାଇଁ ଏକ ସୁରକ୍ଷିତ ପରିବେଶ ସୃଷ୍ଟି କରାଯାଇଛି । ବର୍ତ୍ତମାନ କୋରୋନା ମହାମାରୀର କୌଣସି ସ୍ଥାୟୀ ପ୍ରତିକାର ବାହାରି ପାରିନଥିବା ବେଳେ ଦିନକୁ ଦିନ କୋଭିଡ-19 ଭୂତାଣୁର ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ଏମିତିରେ ଲ୍ୟାବର ସୁରକ୍ଷିତ ପରିବେଶରେ ସେଲ୍ର ବ୍ୟବହାର କରି ଭୂତାଣୁର ଅଧିକ ଅଧ୍ୟୟନ କରାଯାଇପାରେ ।
ଡ଼ଃ ଫାରୋ ଏହା ମଧ୍ୟ କହିଛନ୍ତି କି ତିନି ମାସ ମଧ୍ୟରେ ଏହି ଏୟାରୱେ ସେଲରେ 100ଟି ଆଣ୍ଟିଭାଇରାଲର କାର୍ଯ୍ୟକାରିତା ପରୀକ୍ଷା କରାଯାଇପାରେ । ଏଥିସହ ଏହି ସେଲରେ ରୋବୋଟିକ ଟେକ୍ନୋଲୋଜି ବ୍ୟବହାର କରି ଅଧିକ ଅଧ୍ୟୟନ ମଧ୍ୟ କରାଯାଇପାରେ । ହେଲେ କୌଣସି ଜଟିଳ ପରୀକ୍ଷଣ ଓ ଅଧ୍ୟୟନ ପାଇଁ ସେଲ ବର୍ତ୍ତମାନ ସେତେ ବିକଶିତ ହୋଇନାହିଁ ବୋଲି ମଧ୍ୟ ଡ଼ଃ ଫାରୋ ସ୍ପଷ୍ଟ କରିଛନ୍ତି ।
ତେଣୁ ଏହା ମଧ୍ୟ କୁହାଯାଇପାରେ କି କୋରୋନା ମୁକାବିଲା ପାଇଁ ଏହି ସେଲ ଏକ ବରଦାନ ସଦୃଶ । ଏହାର ବ୍ୟବହାର କରାଯାଇ କୋରୋନା ଭୂତାଣୁର ଗୁଣ ଅଧ୍ୟୟନ କରାଯାଇପାରେ । ଯାହା ଆଗକୁ ଏହାର ପ୍ରତିଷେଧକ ପ୍ରସ୍ତୁତିରେ ସହାୟକ ହେବ ନିଶ୍ଚୟ । ମାନବ ଶରୀରରେ ଫୁସଫୁସରେ ବିଷାକ୍ତ ପଦାର୍ଥକୁ ଶୋଷିବା ପାଇଁ ଯେପରି ଗବଲେଟ ରହିଥାଏ ସେହିପରି ଏହି ସେଲରେ ମଧ୍ୟ ଗବଲେଟର ନିର୍ମାଣ କରାଯାଇଛି । ସେହିପରି ଶରୀର ମଧ୍ୟ ରକ୍ତ କଣିକାର ପ୍ରବାହ ପାଇଁ ମ୍ୟୁକସ ମଧ୍ୟ କ୍ଷରଣ କରିଥାଏ । ତେଣୁ ଏହା ମାନବ ଶରୀର ସଂରଚନାର ଅବିକଳ ନକଲ ଆକାରରେ ପ୍ରସ୍ତୁତ କରାଯାଇଛି ବୋଲି କୁହାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
