ଲଣ୍ଡନ: ଘଡିକେ ଘୋଡା ଛୁଟିବା ପରି ବଦଳୁଛି ୟୁକେର କ୍ବାରେଣ୍ଟାଇନ ନିୟମ । କେବେ ୟୁକେ ସୁରକ୍ଷିତ ଦେଶର ତାଲିକା ପ୍ରସ୍ତୁତ କରି ସେହି ଦେଶର ବିମାନ ଯାତ୍ରୀଙ୍କୁ କ୍ବାରେଣ୍ଟାଇନ ନିୟମରୁ ବାଦ ଦେଉଥିବା ବେଳେ କେତେବେଳେ ପୁଣି ନୂଆ ନୂଆ ରାଷ୍ଟ୍ର ପାଇଁ ଲାଗୁ ହେଉଛି ନିୟମ । ଏମିତିରେ ୟୁରୋପୀୟ ରାଷ୍ଟ୍ରମାନଙ୍କ ପ୍ରତି ୟୁକେର ଆଭିମୁଖ୍ୟ ସବୁବେଳେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ କୋରୋନା କଟକଣା କୋହଳ କରିବା ସହ ୟୁକେକୁ ଆସୁଥିବା ବିମାନଯାତ୍ରୀଙ୍କ ପାଇଁ ପ୍ରଥମେ କ୍ବାରେଣ୍ଟାଇନ ନିୟମକୁ ବାଧ୍ୟତାମୂଳକ କରିଥିଲା ୟୁକେ । ହେଲେ ଧିରେ ଧିରେ ଏହି କଟକଣା ପରିସରରୁ ଅନେକ ରାଷ୍ଟ୍ରଙ୍କୁ ବାଦ ଦେଇଥିଲା ଦେଶ । ଏବେ କିନ୍ତୁ ସ୍ପେନ ପାଇଁ ପୁଣି କ୍ବାରେଣ୍ଟାଇନ ନିୟମ କଡାକଡି କରିଛି ୟୁକେ । ଏହି ନିୟମ ଅନୁଯାୟୀ ସ୍ପେନରୁ ୟୁକେ ଆସୁଥିବା ଯାତ୍ରୀମାନଙ୍କୁ 14 ଦିନିଆ କ୍ବାରେଣ୍ଟାଇନରେ ରହିବାକୁ ହେବ । ୟୁରୋପିଆନ ରାଷ୍ଟ୍ରମାନଙ୍କରେ ସଂକ୍ରମଣର ମାତ୍ରା ବଢୁଥିବାରୁ ଏପରି ନିଷ୍ପତ୍ତି ନିଆଯାଇଥିବା ୟୁକେ ସରକାର ସ୍ପଷ୍ଟ କରିଛନ୍ତି ।
କେବଳ ସ୍ପେନ ନୁହେଁ ବରଂ କାନାରି ଦ୍ବୀପ ଓ ବାଲେରିକ ଦ୍ବୀପର ମାଜୋର୍କା ଓ ଲିବିଜାରୁ ଆସୁଥିବା ଯାତ୍ରୀମାନଙ୍କ ପାଇଁ ଏବେ 14 ଦିନିଆ କ୍ବାରେଣ୍ଟାଇନକୁ ବାଧ୍ୟତାମୂଳକ ଘୋଷଣା କରିଛନ୍ତି ୟୁକେ ସରକାର । ସେପଟେ ୟୁକେରୁ ଯେଉଁମାନେ ସ୍ପେନ ଯାତ୍ରା କରିଛନ୍ତି ସେମାନଙ୍କୁ ମଧ୍ୟ ପରିବହନ ମନ୍ତ୍ରଣାଳୟ ସେଠାକାର ନୀତି ନିୟମ ମାନିବା ପାଇଁ ପରାମର୍ଶ ଦେଇଛି ।
ସ୍ପେନରେ ଗତ ଶୁକ୍ରବାର କେବଳ 900 ମାମଲା ସାମ୍ନାକୁ ଆସିବା ପରେ ଜରୁରୀ ନଥିଲେ ସେଠାକୁ ୟାତ୍ରା ନକରିବା ପାଇଁ ବୈଦେଶିକ ମନ୍ତ୍ରଣାଳୟ ସୂଚନା ଦେଇଛି । ତେବେ ଏହି ନୂଆ ନିୟମ ଦ୍ବାରା ପ୍ରଥମେ ପରିବହନ ବିଭାଗ ସଚିବ ଗ୍ରାଣ୍ଟ ସେପ୍ସ ପ୍ରଭାବିତ ହୋଇଛନ୍ତି । ଛୁଟି ବିତାଇବା ପାଇଁ ସେ ଶନିବାରଠାରୁ ସ୍ପେନ ଗସ୍ତ କରିଛନ୍ତି । ଛୁଟି ବିତାଇ ଫେରିବା ପରେ ସେ ନିଜକୁ 14 ଦିନ ପାଇଁ ଆଇସୋଲେସନରେ ରଖିବା ନେଇ ସ୍ପଷ୍ଟ କରିଛନ୍ତି । ଅନ୍ୟପଟେ ସରକାରଙ୍କ ଏହି ନିଷ୍ପତ୍ତିକୁ ବିରୋଧ କରି ବ୍ରିଟିଶ ଏୟାରୱେ ଏହାକୁ ଏକ ନୈରାଶ୍ୟଜନକ ପଦକ୍ଷେପ ବୋଲି ଆକ୍ଷେପ କରିଛି ।
@IANS
