ଲଣ୍ଡନ: ମଙ୍ଗଳବାର ଡାଉନିଂ ଷ୍ଟ୍ରିଟରେ ହେଉଥିବା ଦୈନିକ ବିବରଣୀରେ ଚାନ୍ସେଲର ରିଶି ସୁନାକ କରିଛନ୍ତି ଏକ ଗୁରୁତ୍ବପୂର୍ଣ୍ଣ ଘୋଷଣା । ଏହି ଘୋଷଣା ଆଧାରରେ ବର୍ତ୍ତମାନ ୟୁକେରେ ଲାଗୁ ରହିଥିବା ଫରଲଫ ସ୍କିମର ଅବଧି ଜୁନରେ ସରିବାକୁ ଥିବା ବେଳେ ଏହାକୁ ପୁଣି ଅକ୍ଟୋବର ଯାଏଁ ବୃଦ୍ଧି କରାଯାଇଛି । ଏହା ଆଧାରରେ ବର୍ତ୍ତମାନ ଘରେ ରହି କାର୍ଯ୍ୟ କରୁଥିବା ଓ ଛୁଟିରେ ରହିଥିବା କର୍ମଚାରୀମାନଙ୍କୁ ଆସନ୍ତା ଅକ୍ଟୋବର ମାସ ପର୍ଯ୍ୟନ୍ତ ସରକାର ଦରମା ପ୍ରଦାନ କରିବେ ।
କୋରୋନା ଲକଡାଉନ ପାଇଁ ଦେଶରେ ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ ବନ୍ଦ ରହିଥିବା ବେଳେ ଘରେ ରହି କାର୍ଯ୍ୟ କରିବାକୁ ବାଧ୍ୟ ହେଉଥିଲେ କର୍ମଚାରୀ । ହେଲେ କିଛି ଦିନ ତଳେ କୋରୋନା ସ୍ଥିତିରେ ସାମାନ୍ୟ ସୁଧାର ଆସିବା ପରେ ପ୍ରଧାନମନ୍ତ୍ରୀ ବୋରିଶ ଜନଶନ ଦେଶବାସୀଙ୍କୁ ଅଫିସ ଯିବା ପାଇଁ ଗ୍ରାନ ସିଗନାଲ ଦେଇଥିଲେ । ଏହାପରେ ଅଫିସମାନଙ୍କରେ ଭାରୀ ମାତ୍ରାରେ ଭିଡ ପରିଲକ୍ଷିତ ହୋଇଥିଲା । ଯାହା ଏକ ବଡ ଚିନ୍ତାର କାରଣ । ସାମାଜିକ ଦୂରତା ବର୍ତ୍ତମାନ ପ୍ରାଥମିକତା ଥିବା ବେଳେ କର୍ମକ୍ଷେତ୍ରରେ ଏପରି ଭିଡ ବିପଦର ସଙ୍କେତ । ଏନେଇ ପ୍ରଧାନମନ୍ତ୍ରୀ ପୁଣି ଦେଶବାସୀଙ୍କୁ ଅନୁରୋଧ କରିଛନ୍ତି କି ନିହାତି ଅସୁବିଧା ନହେବା ଯାଏଁ ଘରେ ରହି ସୁସ୍ଥ ପରିବେଶରେ କାମ କରନ୍ତୁ ।
ତେଣେ ସ୍କିମ ଅବଧି ବୃଦ୍ଧି ଘୋଷଣା କରିବା ସହ ସୁନାକ କହିଛନ୍ତି କି ପୂର୍ବପରି କର୍ମଚାରୀମାନଙ୍କୁ ସରକାର ସେମାନଙ୍କୁ ଦରମାର 80 ପ୍ରତିଶତ ପ୍ରଦାନ କରାଯିବ । ଏନେଇ କମ୍ପାନୀମାନଙ୍କୁ ନିଜ ଶେୟାର ଅଗଷ୍ଟ ମାସରେ ଦେବାକୁ ହେବ । ତେବେ ବର୍ତ୍ତମାନର ପରିସ୍ଥିତି ଦେଖି ସ୍ବାସ୍ଥ୍ୟ ସଚିବ ମ୍ୟାଟ ହ୍ୟାନକକ କହିଛନ୍ତି କି ଯଥା ସମ୍ଭବ ଘରେ ରହି କାର୍ଯ୍ୟ କରନ୍ତୁ । ଯଦି ଆପଣ ଅଫିସ ଯାଉଥାଆନ୍ତି ତେବେ ସ୍ବାସ୍ଥ୍ୟ ପରୀକ୍ଷା କରାଇବା ସହ ଆବଶ୍ୟକୀୟ ସୁରକ୍ଷା ପଦକ୍ଷେପ ନିଶ୍ଚିତ ଗ୍ରହଣ କରନ୍ତୁ । ବର୍ତ୍ତମାନ ସୁଦ୍ଧା ୟୁକେରେ 2,24,332ଟି ମାମଲା ସାମ୍ନାକୁ ଆସିଥିବା ବେଳେ ମୃତ୍ୟୁ ସଂଖ୍ୟା 32,141ରେ ପହଞ୍ଚିଛି ।
@IANS
