ଲଣ୍ଡନ: ୟୁକେରେ ଧିରେ ଧିରେ ଲକଡାଉନ ନିୟମ କୋହଳ ହେବାରେ ଲାଗିଥିବା ବେଳେ ଏହା ଖୁବ ତରବରିଆ ଭାବେ ହେଉଥିବା ଚେତାବନୀ ଦେଇଛନ୍ତି ବୈଜ୍ଞାନିକ । ସେମାନଙ୍କ କହିବା ଅନୁଯାୟୀ ଦେଶରେ ପର୍ଯ୍ୟାୟ କ୍ରମେ କୋହଳ ହେଉଥିବା ଲକଡାଉନ କଟକଣା ଏକ ତରବରିଆ ନିଷ୍ପତ୍ତି । ଦେଶରେ ବର୍ତ୍ତମାନ ସୁଦ୍ଧା କୋରୋନା ପରିସ୍ଥିତିରେ ସୁଧାର ଆସିନାହିଁ । ଏମିତିରେ କଟକଣାରେ କୋହଳ ଅଧିକ ସଂକ୍ରମଣ ପାଇଁ ଦାୟୀ ହୋଇପାରେ ।
ଚଳିତ ସପ୍ତାହ ଦେଶରେ କଟକଣାର ଶେଷ ସପ୍ତାହ ହୋଇଥିବା ବେଳେ ଆସନ୍ତା ସୋମବାରଠାରୁ ଲାଗୁ ହେବ ନୂଆ ନିୟମ । ଏହି ନୂଆ ନିୟମ ଆଧାରରେ ସୋମବାରଠାରୁ ଦୁଇ ଜଣରୁ ଅଧିକ ଲୋକେ ବାହାରେ ଦେଖା କରିପାରିବେ । ଏତଦ୍ ବ୍ୟତୀତ ବିଭିନ୍ନ ସ୍କୁଲ ଓ କଲେଜ ମଧ୍ୟ ଖୋଲିବାର ନିଷ୍ପତ୍ତି ନିଆଯାଇଛି । ଲୋକେ ଏହାର ସୁଯୋଗ ନେଇ ଘରେ ଘରେ ଏକାଠି ହେବାର ଚେଷ୍ଟା କରିବେ ନିଶ୍ଚୟ । ହେଲେ ଲୋକେ ଏହା ଜାଣିବା ଦରକାର କି କେବଳ ପବନରେ ଭୂତାଣୁ ରହିବ ତାହା ନୁହେଁ, ଖାଦ୍ୟ ସାମଗ୍ରୀ ଓ ଅନ୍ୟ ନିର୍ଜୀବ ଆସବାବପତ୍ରରେ ମଧ୍ୟ ଭୂତାଣୁ ରହିପାରନ୍ତି । ଏନେଇ ଚେତାଇଛନ୍ତି ସାଇଣ୍ଟିଫିକ ଆଡଭାଇଜରି ଗ୍ରୁପ ଫର ଏମର୍ଜେନ୍ସିସ (ସେଜ୍)ର ସଦସ୍ୟ ତଥା ୱେଲକମର ନିର୍ଦ୍ଦେଶକ ଜେରେମି ଫରାର ।
ସେହପରି ଲଣ୍ଡନ ସ୍କୁଲ ଓ ଟ୍ରୋପିକାଲ ହାଇଜିନ ଓ ମେଡିସିନର ପ୍ରଫେସର ଜନ ଏଡମଣ୍ଡଙ୍କ କହିବା ଅନୁଯାୟୀ ଏହି ରାଜନୈତିକ ନିଷ୍ପତ୍ତି ସାଧାରଣ ଲୋକଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇପାରେ । ଅନ୍ୟ ବୈଜ୍ଞାନିକମାନେ ମଧ୍ୟ ଏହି ନିଷ୍ପତ୍ତିକୁ ନେଇ ଆପତ୍ତି ଦର୍ଶାଇଛନ୍ତି । ବର୍ତ୍ତମାନ ଦେଶରେ କୋରୋନା ଆକ୍ରାନ୍ତ ସଂଖ୍ୟା 2,72,607ରେ ପହଞ୍ଚିଥିବା ବେଳେ ମୃତ୍ୟୁ ସଂଖ୍ୟା 38,243ରେ ପହଞ୍ଚିଛି ।
@IANS
