ଲଣ୍ଡନ: କୋରୋନା ସ୍ଥିତି ସତ୍ତ୍ବେ ଦେଶର ଅର୍ଥନୀତିକୁ ପୁଣି ସ୍ବାଭାବିକ କରିବା ପାଇଁ ଯୋଜନା ଆରମ୍ଭ କରିଛନ୍ତି ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନଶନ । ଏନେଇ ଦେଶବାସୀଙ୍କୁ ନିଜ ସୁବିଧା ମୁତାବକ କର୍ମକ୍ଷେତ୍ରକୁ ଫେରିବା ପାଇଁ ବୋରିସ ଆହ୍ବାନ ଦେଇଛନ୍ତି । କୋରୋନା ସଂକ୍ରମଣକୁ ଏଡାଇବା ପାଇଁ ଦେଶରେ ଆବଶ୍ୟକୀୟ ସମସ୍ତ ପଦକ୍ଷେପ ନିଆଯାଉଥିବା ବେଳେ ଲୋକଙ୍କୁ ଏବେ ଏହି ପରିସ୍ଥିତି ସହ ଖାପ ଖୁଆଇ ନିଜ ଜୀବନ ଜିଇଁବା ଆରମ୍ଭ କରିବାକୁ ହେବ ବୋଲି ବୋରିସ ପ୍ରକାଶ କରିଛନ୍ତି ।
ଦେଶବାସୀଙ୍କୁ କର୍ମକ୍ଷେତ୍ରକୁ ଫେରିବା ନେଇ ଆହ୍ବାନ ଦେବା ସହ ଦେଶରେ ଲାଗୁ କୋରୋନା କଟକଣା ଧିରେ ଧିରେ କୋହଳ ହେବାକୁ ଯାଉଥିବା ନେଇ ବୋରିସ ଇଙ୍ଗିତ କରିଛନ୍ତି । ଅନଲାଇନ ପ୍ଲାଟଫର୍ମରେ ଜନତାଙ୍କ ପ୍ରଶ୍ନର ଉତ୍ତର ଦେଇ ବୋରିସ ଏନେଇ ଘୋଷଣା କରିଛନ୍ତି । ସେ ଏହା ମଧ୍ୟ କହିଛନ୍ତି କି ଲୋକେ ଘରୁ ବାହାରିବା ସହ କେତୋଟି ନିର୍ଦ୍ଦିଷ୍ଟ ନିୟମ ଯଥା ମାସ୍କ ଓ ଫେସ ସିଲ୍ଡର ବ୍ୟବହାର ଆଦିକୁ ବାଧ୍ୟତାମୂଳକ କରାଯାଇଛି । ତେଣେ କର୍ମକ୍ଷେତ୍ରକୁ ଫେରିବାର ଅର୍ଥ ନୁହେଁ କି ଘରଠାରୁ ବାହାରେ ସ୍ଥିତି ସ୍ବାଭାବିକ ହୋଇଯାଇଛି । ଏହାର ଅର୍ଥ ଲୋକେ ନିଜ ଦାୟିତ୍ବ ବୁଝି ନିଜେ ସତର୍କ ହେବା ସହ ପୂର୍ବ ଧାରା ଅନୁଯାୟୀ ଜୀବନ ଶୈଳୀ ସ୍ବାଭାବିକ କରିବେ ।
ତେବେ ସମସ୍ତ ନାଗରିକ କର୍ମକ୍ଷେତ୍ରକୁ ନ ଫେରି କେବଳ ସୁସ୍ଥ ନାଗରିକଙ୍କୁ କର୍ମକ୍ଷେତ୍ରକୁ ଫେରିବା ପାଇଁ ବୋରିସ ଆହ୍ବାନ ଦେଇଛନ୍ତି । ଏନେଇ ସେ ପୂର୍ବରୁ ଦିଆଯାଉଥିବା ସ୍ଲୋଗାନ ‘ଷ୍ଟେ ଆଟ୍ ହୋମ ଇଫ ୟୁ କ୍ୟାନ’କୁ ପରିବର୍ତ୍ତନ କରି ‘ଗୋ ବ୍ୟାକ ଟୁ ୱାର୍କ ଇଫ ୟୁ କ୍ୟାନ’ର ନାରା ଦେଇଛନ୍ତି । ଏହା ପଛରେ କାରଣ ହେଉଛି ପୂର୍ବରୁ ଅବସ୍ଥା ଭୟଙ୍କର ଥିବାରୁ ଘରୁ ବାହାରକୁ ବାହାରିବା ପାଇଁ ଲୋକଙ୍କୁ ମନା କରାଯାଉଥିଲା । ଯାହା ନା ଯେ ନାଗରିକଙ୍କୁ ମାନସିକ ବରଂ ଆର୍ଥିକ ରୂପରେ ମଧ୍ୟ କ୍ଷତି ପହଞ୍ଚାଇଛି । ଏଥିରୁ ବଞ୍ଚିବାକୁ ହେଲେ ଲୋକଙ୍କ ଏହି ନୂଆ ପରିବର୍ତ୍ତନକୁ ଗ୍ରହଣ କରି ସାଧାରଣ ଜୀବପଯାପନ ଆଡକୁ ଗତି କରିବାକୁ ହେବ ବୋଲି ବୋରିସ ମତ ଦେଇଛନ୍ତି ।
ସେପଟେ ଯଦି କାର୍ଯ୍ୟାଳୟମାନଙ୍କରେ କୋରୋନାରୁ ସୁରକ୍ଷା ପାଇଁ ଜାରି ହୋଇଥିବା ଗାଇଡଲାଇନର ପାଳନ କରାଯାଉଛି ତାହେଲେ କର୍ମଚାରୀମାନେ କର୍ମକ୍ଷେତ୍ରକୁ ଫେରି ପାରିବେ ବୋଲି ସେ ସବୁଜ ସଙ୍କେତ ଦେଇଛନ୍ତି । ଏହାଛଡା ଯେଉଁ କାର୍ଯ୍ୟାଳୟମାନଙ୍କରେ ଗାଇଡଲାଇନର ପାଳନ ହେଉନାହିଁ ସେଠାରେ ଏସବୁ ନିୟମ ଯଥାଶୀଘ୍ର କାର୍ଯ୍ୟକାରୀ କରିବା ପାଇଁ ବୋରିସ ନିର୍ଦ୍ଦେଶ ଦେଇଛନ୍ତି ।
@IANS
