ଲଣ୍ଡନ: ଇଂଲଣ୍ଡରେ ଲକଡାଉନ ନିୟମ କୋହଳ ପ୍ରକ୍ରିୟାର ପରବର୍ତ୍ତୀ ପର୍ଯ୍ୟାୟ ନେଇ ମଙ୍ଗଳବାର ଗୁରୁତ୍ବପୂର୍ଣ୍ଣ ଘୋଷଣା କରିପାରନ୍ତି ପ୍ରଧାନମନ୍ତ୍ରୀ ବୋରିଶ ଜନଶନ । ଦେଶରେ ସମସ୍ତ ବାର, ପବ୍ ଓ ରେସ୍ତୋରାଁ ଆଦି ଜୁନ 22ରୁ ଖୋଲିବା ନେଇ ପୂର୍ବରୁ ସୂଚନା ରହିଥିଲା । ହେଲେ ଦେଶରେ ନୂଆ ସଂକ୍ରମଣ ଚିହ୍ନଟ ସହ ଏହି ନିଷ୍ପତ୍ତି ଲାଗୁ ହେବ କି ନାହିଁ, ତାହା ବୋରିଶ ସ୍ପଷ୍ଟ କରିବେ ।
ଏଥିସହ ମଙ୍ଗଳବାର ସଂସଦରେ ପ୍ରଧାନମନ୍ତ୍ରୀ ଆଗମୀ ପର୍ଯ୍ୟାୟ ଲକଡାଉନ କୋହଳ ପ୍ରକ୍ରିୟା ଉପରେ ମଧ୍ୟ ଆଲୋଚନା କରିବାର ଯୋଜନା ରହିଛି । ସେପଟେ ବିରୋଧୀ ଦଳ ନେତାମାନେ ଦେଶରେ ଲାଗୁ 2ମିଟର ସାମାଜିକ ଦୂରତ୍ବ ନିୟମର ପୁନଃସମୀକ୍ଷା ପାଇଁ ଦାବି କରିଥିଲେ । ଏହି କ୍ରମରେ ବୋରିଶଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ସମୀକ୍ଷା କାର୍ଯ୍ୟକ୍ରମ ଜାରି ରହିଥିଲା । ଏହାର ନିଷ୍କର୍ଶ ମଧ୍ୟ ମଙ୍ଗଳବାର ସ୍ପଷ୍ଟ ହେବ । ଏହି ଦୃଷ୍ଟିରୁ ଦେଖିବାକୁ ମଙ୍ଗଳବାର ଇଂଲଣ୍ଡ ପାଇଁ ଅତି ଗୁରୁତ୍ବପୂର୍ଣ୍ଣ ରହିବ ।
ଦେଶରେ ଲକଡାଉନ କୋହଳ ପ୍ରକ୍ରିୟାରେ ଆଉ ପାଦେ ଆଗେଇବା ପାଇଁ ସ୍ବାସ୍ଥ୍ୟ ସଚିବ ମ୍ୟାକ ହ୍ୟାନକକ୍ ମଧ୍ୟ ସବୁଜ ସଙ୍କେତ ଦେଇଛନ୍ତି । ତେବେ ଦେଶରେ ଅନଲାଇନ ମାଦକ ଦ୍ରବ୍ୟ ଅର୍ଡର କରିବା ପ୍ରସଙ୍ଗରେ ବୋରିଶଙ୍କୁ ପଚରାଯିବାରୁ ସେ କହିଥିଲେ ଏ ସମ୍ପର୍କରେ କୌଣସି ଆଲୋଚନା କିମ୍ବା ଯୋଜନା ନାହିଁ । ଏଥିସହ ଦେଶରେ ଲାଗୁ ସାମାଜିକ ଦୂରତ୍ବ କଟକଣାରେ ପରିବର୍ତ୍ତନ ହେବାର ମଧ୍ୟ ସମ୍ଭାବନା ରହିଥିବା ବୋରିଶ ଇଙ୍ଗିତ କରିଛନ୍ତି । ଦେଖିବାକୁ ବାକି ରହିଲା ବୋରିଶ କ’ଣ ନିଷ୍ପତ୍ତି ନେଉଛନ୍ତି ।
@IANS
