ଲଣ୍ଡନ: ଇଂଲଣ୍ଡରେ ହେବାକୁ ଥିବା 50ଟି ମୁଖ୍ୟ ସ୍କୁଲ ଗୃହ ନିର୍ମାଣ କାର୍ଯ୍ୟରେ 1.23ବିଲିୟନ ଡଲାର ଖର୍ଚ୍ଚ କରିବା ନେଇ ପ୍ରତିଶୃତି ଦେଇଛନ୍ତି ପ୍ରଧାନମନ୍ତ୍ରୀ ବୋରିସ ଜନଶନ । ଚଳିତ ବର୍ଷ ଶେଷ ସୁଦ୍ଧା ଏହି ପ୍ରକଳ୍ପର କାର୍ଯ୍ୟ ଆରମ୍ଭ ହେବାକୁ ଥିବା ବେଳେ 2021 ସେପ୍ଟେମ୍ବରରେ ଏହି ସ୍କୁଲଗୁଡିକ କାର୍ଯ୍ୟକ୍ଷମ ହେବାର ଯୋଜନା ରହିଛି । ଏଥିସହ ଆଗାମୀ ଶିକ୍ଷାବର୍ଷ ପାଇଁ ସ୍କୁଲରେ ମରାମତି କାର୍ଯ୍ୟ ଓ ଉନ୍ନତିକରଣ ପାଇଁ ଅତିରିକ୍ତ 560 ମିଲିୟନ ପାଉଣ୍ଡ ଖର୍ଚ୍ଚ କରିବା ନେଇ ମଧ୍ୟ ବୋରିସ ସୂଚନା ଦେଇଛନ୍ତି ।
ଏଥିସହ ଏହି ବଜେଟରେ ଅତିରିକ୍ତ 200 ମିଲିୟନ ଡଲାର କେବଳ ଉଚ୍ଚ ଶିକ୍ଷା ବ୍ୟବସ୍ଥାର ଉନ୍ନତିକରଣ ପାଇଁ ଅଟକଳ ହୋଇଥିବା ସୂଚନା ରହିଛି । ଏହା ପଛରେ ମୂଳ ଉଦ୍ଦେଶ୍ୟ କ’ଣ ପଚରା ଯିବାରୁ ବୋରିସ କହିଥିଲେ ଯେ ସେ ଦେଶକୁ ଏପରି ଢଙ୍ଗରେ ବିକଶିତ କରିବାକୁ ଚାହୁଁଛନ୍ତି ଯେଉଁଠାରେ ସମସ୍ତଙ୍କ ବିକାଶ ପାଇଁ ଭରପୂର ସୁଯୋଗ ମହଜୁଦ ରହିବ । ଶିକ୍ଷା ସମସ୍ତ ବିକାଶର ମୂଳଦୂଆ ହୋଇଥିବାରୁ ଦେଶରେ ଶିକ୍ଷା ଭିତ୍ତିଭୂମିର ବିକାଶ ସବୁଠାରୁ ଗୁରୁତ୍ବପୂର୍ଣ୍ଣ ବୋଲି ସେ କହିଥିଲେ ।
ତେବେ ବୋରିସଙ୍କ ଏହି ଘୋଷଣା ପରେ ଜନୈକ ପ୍ରଧାନଶିକ୍ଷକ କହିଥିଲେ କି ଜାତୀୟ ଅଡିଟ କାର୍ଯ୍ୟାଳୟର ସୂଚନା ମୁତାବକ ଇଂଲଣ୍ଡରେ ଥିବା ସମୁଦାୟ 21,000 ସ୍କୁଲର ମରାମତି ପାଇଁ ଅତିରିକ୍ତ 6.7 ବିଲିୟନ ପାଉଣ୍ଡର ଆବଶ୍ୟକତା ରହିଛି । କିଛି ସ୍କୁଲ ଏହି ପଦକ୍ଷେପକୁ ସ୍ବାଗତ କରି ଏହା ଅତି ଜରୁରୀ ଓ ଦୀର୍ଘ ସମୟ ଧରି ଅପେକ୍ଷା କରାଯାଉଥିବା ପଦକ୍ଷେପ ବୋଲି ପ୍ରକାଶ କରିଛନ୍ତି ।
@IANS
