ଇସଲାମାବାଦ: ଆଫଗାନିସ୍ତାନର ଶହ ଶହ ନାଗରିକ ନିଜ ଦେଶ ଛାଡି ପାକିସ୍ତାନରେ ଗଢିଛନ୍ତି ନିଜର ଘର । ହେଲେ ଲକଡାଉନ ପାଇଁ ଏବେ ନିଜ ଦେଶ ଓ ଘରକୁ ଫେରି ନପାରି ପାକିସ୍ତାନରେ ଫସିଯାଇଛନ୍ତି ଅନେକ ଆଫଗାନୀ । ଏମାନଙ୍କ କଥା ଚିନ୍ତା କରି ପାକିସ୍ତାନ ସରକାର 3915 ଆଫଗାନୀମାନଙ୍କୁ ଘରକୁ ପଠାଇବାର ବନ୍ଦୋବସ୍ତ କରିଥିଲେ । ଏନେଇ ଗତ ଏପ୍ରିଲ 28ରେ ତୋରଖାମ ସୀମା ଦେଇ ଏମାନଙ୍କୁ ଘରକୁ ଫେରିବା ପାଇଁ ଦେଇଥିଲେ ଅନୁମତି ।
ହେଲେ ଏହି ନିଷ୍ପତ୍ତି ନେଇ କୌଣସି ସରକାରୀ ଘୋଷଣା କରିନଥିଲେ ପାକିସ୍ତାନ ସରକାର । ସେପଟେ ଘରକୁ ଫେରିବାର ବନ୍ଦୋବସ୍ତ ହୋଇସାରିଛି ଶୁଣି ପାକିସ୍ତାନ ଛାଡିବା ପାଇଁ ପ୍ରସ୍ତୁତ ହୋଇଥିଲେ ଶହ ଶହ ଆଫଗାନୀ । ସଭିଏଁ ନିଜ ଜିନିଷପତ୍ର ନେଇ ତୋରଖାମ ସୀମାରେ ପହଞ୍ଚିଥିଲେ ସତ, ହେଲେ ସୀମା ଖୋଲିବା ନେଇ ସରକାରୀ ଘୋଷଣା ହୋଇନଥିବାରୁ ଆଫଗାନୀମାନଙ୍କୁ ସୀମାପାର କରିବାକୁ ଅନୁମତି ଦେଇନଥିଲେ ବିଭାଗୀୟ ଅଧିକାରୀ । ଘଟଣାରେ ମର୍ମାହତ ହୋଇ ବର୍ତ୍ତମାନ ଆଫଗାନୀମାନେ ନିକଟସ୍ଥ ରେଲୱେ ଟନେଲ, ମସଜିଦ ଓ ଆଖପାଖର ଖାଲି ଦୋକାନ ଘରେ ବାନ୍ଧିଛନ୍ତି ଅସ୍ଥାୟୀ ବସା ।
କିଛି ସ୍ଥାନୀୟ ଲୋକେ ମଧ୍ୟ ଏନେଇ ଆଫଗାନୀମାନଙ୍କୁ ସହାୟତାର ହାତ ବଢାଇଥିବା ଦେଖିବାକୁ ମିଳିଛି । ବର୍ତ୍ତମାନ ଦୋକାନ ବଜାର ବନ୍ଦ ଥିବାରୁ ଲୋକେ ନିଜ ଖାଲି ଦୋକାନ ଘରେ ଏହି ବେସାହାରା ଆଫଗାନୀମାନଙ୍କୁ ଆଶ୍ରୟ ଦେବାକୁ ପ୍ରସ୍ତୁତ ହୋଇଛନ୍ତି । କିଛି ଆଫଗାନୀ ନିକଟସ୍ଥ ବନ୍ଧୁଙ୍କ ଘରେ ଆଶ୍ରୟ ନେଇଥିବା ବେଳେ ଆଉ କିଛି ଲାନ୍ଦୀ କୋଟାଲ ବାଜାରସ୍ଥିତ ଦୁଇଟି ମସଜିଦରେ ଆଶ୍ରୟ ନେଉଥିବା ଜଣା ପଡିଛି ।
@IANS
