ଢାକା: ମଝି ନଈରେ ଅଘଟଣ । ଲଞ୍ଚରେ ନିଆଁ ଲାଗିବାରୁ (bangladesh as packed ferry catches fire) ୩୨ ଜଣ ପ୍ରାଣ ହରାଇବାବେଳେ ଅନେକ ଆହତ ହୋଇଛନ୍ତି । ବାଂଲାଦେଶର ରାଜଧାନୀ ଢାକା ଠୁ ୨୫୦ କିଲୋମିଟର ଦୂର ଦକ୍ଷିଣ ସହର ଝାଲୋକାଟିର ଏକ ନଦୀରେ ଘଟିଛି ଏହି ଅଘଟଣ । ଲଞ୍ଚରେ ପାଖାପାଖି ୫୦୦ରୁ ଅଧିକ ଲୋକ ଥିଲେ ।
୩ ଥାକିଆ ମୋଟର ଲଞ୍ଚରେ ନିଆଁ ଲାଗିଛି । ନିଆଁ ଏତେ ଭୟଙ୍କର ଥିଲା ଯେ ଜୀବନ ବଞ୍ଚାଇବାକୁ ଲୋକ ପାଣିକୁ ଡେଇଁ ପଡିଥିଲେ । ଉଦ୍ଧାର କାର୍ଯ୍ୟ ଜାରି ରହିଛି । ମୃତ୍ୟୁ ସଂଖ୍ୟା ବଢିବା ଆଶଙ୍କା ରହିଛି । ଆଜି ସକାଳୁ ସକାଳୁ ଏହି ଅଘଟଣ ଘଟିଛି । ସ୍ଥାନୀୟ ପୋଲିସ ମହାନିର୍ଦ୍ଦେଶକ ମୋଇନୁଲ ଇସଲାମ ଦୁରଘଟଣା ନେଇ ସୂଚନା ଦେଇଛନ୍ତି । ଜାହାଜର ଇଞ୍ଜିନ ରୁମରେ ଅଗ୍ନିକାଣ୍ଡି ହୋଇଛି । ଏହାପରେ ସମ୍ପୂର୍ଣ୍ଣ ଜାହାଜକୁ ନିଆଁ ବ୍ୟାପିଥିଲା । ପାଖାପାଖି ୧୦୦ ଆହତ ଲୋକଙ୍କୁ ହସ୍ପିଟାଲ ପଠାଯାଇଛି । ଜାହାଜର ଭୁଲ ପରିଚାଳନା ପାଇଁ ଦୁର୍ଘଟଣା ଘଟିଥିବା ଅନୁମାନ କରାଯାଉଛି ।
ଏହାପୂର୍ବରୁ ମଧ୍ୟ ଏକ ଦୁର୍ଘଟଣା ଘଟିଥିଲା । ଯାତ୍ରୀବାହୀ ଡଙ୍ଗା ଏକ କାର୍ଗୋ ସିପରେ ପିଟି ହୋଇଯିବା ଫଳରେ ୨୧ ଜଣଙ୍କ ଜୀବନ ଚାଲିଯାଇଥିଲା । ଏପ୍ରିଲ ଓ ମେଁ ମାସରେ ଦୁଇଟି ପୃଥକ ପୃଥକ ଦୁର୍ଘଟଣାରେ ୫୪ଜଣଙ୍କ ମୃତ୍ୟୁ ହୋଇଥିଲା । ଗତବର୍ଷ ଜୁନରେ ଏକ ଦୁର୍ଘଟଣାରେ ୩୨ ଜଣ ଓ ୨୦୧୫ରେ ୭୮ଜଣ ଲୋକ ଜୀବନ ହରାଇଥିଲେ ।
