କଲମ୍ବୋ: ପାଖାପାଖି 3 ମାସର ବନ୍ଦ ପରେ ଏବେ ପୁଣି ସ୍ବାଭାବିକ ହେବା ପାଇଁ ଚେଷ୍ଟା ଆରମ୍ଭ କରିଛି ଶ୍ରୀଲଙ୍କା । ଏହି କ୍ରମରେ ଦୋକାନ ବଜାର, ବ୍ୟବସାୟିକ ଅନୁଷ୍ଠାନ ଓ କାର୍ଯ୍ୟାଳୟ ଆଦି ଖୋଲିବା ଆରମ୍ଭ ହୋଇଥିବା ବେଳେ ଦେଶର ବିଦ୍ୟାଳୟ ମଧ୍ୟ ଧିରେ ଧିରେ ଖୋଲିଛି । କୋରୋନା ସଂକ୍ରମଣରେ ବର୍ତ୍ତମାନ ସାମୟିକ ନିୟନ୍ତ୍ରଣ କରାଯାଇଥିବା ବେଳେ ବିଦ୍ୟାଳୟ ସବୁରେ ସମ୍ପୂର୍ଣ୍ଣ ସୁରକ୍ଷା ପଦକ୍ଷେପ ଗ୍ରହଣ କରାଯାଇଥିବା ଜଣା ପଡିଛି ।
କେନ୍ଦ୍ର ଶିକ୍ଷା ମନ୍ତ୍ରୀଙ୍କ ସୂଚନା ଅନୁଯାୟୀ ସୋମବାର ଠାରୁ ଦେଶରେ ବିଦ୍ୟାଳୟ ଆଦି ଖୋଲାଯାଇଥିବା ବେଳେ ପ୍ରାଥମିକ ପର୍ଯ୍ୟାୟରେ କେବଳ ତ୍ରୟୋଦଶ, ଏକାଦଶ ଓ ପଞ୍ଚମ ଶ୍ରେଣୀର ଛାତ୍ରଛାତ୍ରୀଙ୍କୁ ଆସିବାକୁ ଅନୁମତି ମିଳିଛି । ଏଥିସହ ପ୍ରାଥମିକ ପର୍ଯ୍ୟାୟରେ ପ୍ରାୟ 8 ଲକ୍ଷ ଛାତ୍ରଛାତ୍ରୀ ସ୍କୁଲ ଫେରିବା ନେଇ ଆକଳନ କରାଯାଇଛି । ତେବେ ସ୍କୁଲରେ ପ୍ରବେଶ କରିବା ସ୍ଥାନରେ ଛାତ୍ରଛାତ୍ରୀଙ୍କର ଶରୀରର ତାପମାତ୍ରା ପରୀକ୍ଷା କରାଯିବ । ଏଥିସହ ସ୍କୁଲରେ ମାସ୍କ ବ୍ୟବହାର ବାଧ୍ୟତାମୂଳକ ରଖାଯିବା ସହ ନିର୍ଦ୍ଧିଷ୍ଟ ସମୟ ବ୍ୟବଧାନରେ ହାତ ଧୋଇବା ପାଇଁ ନିର୍ଦ୍ଦେଶ ଦିଆଯାଇଛି ।
ସ୍କୁଲରେ ଛାତ୍ରଛାତ୍ରୀଙ୍କ ବସିବା ପାଇଁ 1ମିଟର ବ୍ୟବଧାନରେ ଡେସ୍କ ଓ ଚେୟାରର ରଖାଯିବା ସହ କଥାବାର୍ତ୍ତା ବେଳେ ଏକାଠି ନହୋଇ ଦୂରତା ବଜାୟ ରଖିବା ପାଇଁ ଛାତ୍ରଛାତ୍ରୀ ତଥା ଶିକ୍ଷକ ଶିକ୍ଷୟିତ୍ରୀଙ୍କୁ ପରାମର୍ଶ ଦିଆଯାଇଛି । ଆଗାମୀ କିଛି ଦିନ ପରେ ଅର୍ଥାତ ଜୁଲାଇ 20ରୁ ଦଶମ ଓ ଦ୍ବାଦଶ ଶ୍ରେଣୀର ଛାତ୍ରଛାତ୍ରୀଙ୍କୁ ସ୍କୁଲ ଡକାଯିବାର ବ୍ୟବସ୍ଥା କରାଯିବ । ଏହାପରେ ଜୁଲାଇ 27ରୁ କେବଳ ପ୍ରଥମ ଓ ଦ୍ବିତୀୟ ଶ୍ରେଣୀର ଛାତ୍ରଛାତ୍ରୀଙ୍କୁ ଛାଡି ବଳକା ଶ୍ରେଣୀର ପାଠପଢା ଆରମ୍ଭ କରାଯିବାର ଯୋଜନା ରହିଛି ।
ଶ୍ରୀଲଙ୍କାରେ ବର୍ତ୍ତମାନ ସୁଦ୍ଧା 2078 ଜଣ କୋରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ସେମାନଙ୍କ ମଧ୍ୟରୁ 90 ପ୍ରତିଶତ ହାରରେ 1917 ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ସେପଟେ 161ରୁ କମ ଜଣଙ୍କ ଚିକିତ୍ସା ଜାରି ରହିବା ସହ ଏଯାବତ୍ 11 ଜଣଙ୍କ ମୃତ୍ୟୁ ହୋଇସାରିଛି ।
@IANS
