ବେଜିଂ: କୋରୋନା ସ୍ଥିତିରେ ସାମାନ୍ୟ ସୁଧାର ପରେ ଚୀନରେ ସ୍ବାଭାବିକ ହଇଛି ହୋଟେଲ ବ୍ୟବସାୟ । ଏନେଇ ମଙ୍ଗଳବାର ମ୍ୟାରିଅଟ ଇଣ୍ଟରନ୍ୟାସନାଲ ଦେଶରେ ନିଜର ଆମେରିକାନ ହୋଟେଲ ଚେନ ଖୋଲିବା ନେଇ ସ୍ପଷ୍ଟ କରିଛି । ସେପଟେ କୋରୋନା ଆତଙ୍କ ସମୟରେ ବି ବ୍ୟବସାୟଗତ ଯାତାୟତରେ ଏହି କମ୍ପାନୀ ସୁଧାର ଆସିଥିବା ପରିଲକ୍ଷିତ କରିଛି । ବିଶ୍ବର ତୃତୀୟ ସର୍ବବୃହତ ହୋଟେଲ ଚେନ ଥିବା ମ୍ୟାରିଅଟର ଚାନରେ 350 ଆଉଟଲେଟ ରହିଛି ।
ଗତ ସପ୍ତାହ ମ୍ୟାରିଅଟ କମ୍ପାନୀ ଏକ ବିସ୍ଫୋରକ ବୟାନ ଦେଇ କହିଥିଲା କି 9/11ର ଆକ୍ରମଣ ଓ 2008 ମସିହାର ଆର୍ଥିକ ସଙ୍କଟଠାରୁ ମଧ୍ୟ ଅଧିକ କ୍ଷତି ଏହି କୋରୋନା ଲକଡାଉନରେ ହୋଇଛି । ଏହି ସମୟରେ ବୃତ୍ତି ହାର 40 ପ୍ରତିଶତ ରହିଥିବା ନେଇ ମଧ୍ୟ କମ୍ପାନୀ କହିଛି । ଏଥିସହ ଦେଶରେ ପୂର୍ବ ପରି ବ୍ୟବସାୟିକ ଉଡାଣ ଆରମ୍ଭ ହୋଇଛି । ଯାହା ଅର୍ଥନୀତିକୁ ପୁଣି ସଶକ୍ତ କରିବା ନେଇ ଆଶା ସଞ୍ଚାର କରିଛି ।
ଏହି ହୋଟେଲ ଗ୍ରୁପ ଅଧିକୃତ 30ଟି ବ୍ରାଣ୍ଡ ଯଥା ରିଟଜ-କାର୍ଲଟନ, ସେଣ୍ଟ ରେଗିସ ଓ ସେରାଟନ ଆଦି କମ୍ପାନୀ ନିଜ କର୍ମଚାରୀଙ୍କ ପାଇଁ ଛୁଟିର ଅବଧିକୁ ବୃଦ୍ଧି କରିଛନ୍ତି । ଏଥିସହ ଅକ୍ଟୋବର ମାସରୁ ସାପ୍ତାହିକ କାର୍ଯ୍ୟ ଦିବସର ସଂଖ୍ୟା କମାଇବାକୁ ମଧ୍ୟ ନିଷ୍ପତ୍ତି ନେଇଛନ୍ତି । ତେବେ ମ୍ୟାରିଅଟର ଆକଳନ ମୁତାବକ 2021 ସୁଦ୍ଧା ବ୍ୟବସାୟ ସ୍ବାଭାବିକ ସ୍ଥିତିରେ ପହଞ୍ଚିପାରେ । ଏଥିପାଇଁ ଆବଶ୍ୟକସ୍ଥଳେ ପରିବର୍ତ୍ତରନ କରିବା ପାଇଁ କମ୍ପାନୀ ପ୍ରସ୍ତୁତ ଥିବା ଦର୍ଶାଇଛି ।
ତେଣେ ମ୍ୟାରିଅଟର ପ୍ରତିଦ୍ବନ୍ଦୀ ହିଲଟନ ଦେଶରେ ଥିବା ନିଜର 255ଟି ହୋଟେଲକୁ ଦୁଇ ସପ୍ତାହ ତଳେ ଖୋଲିବାର ନିଷ୍ପତ୍ତି ନେଇଥିଲା । ବର୍ତ୍ତମାନ ସୁଦ୍ଧା ଦେଶରେ 84,154 ଜଣ ଆକ୍ରାନ୍ତ ରହିଥିବା ବେଳେ ମୃତ୍ୟୁ ସଂଖ୍ୟା 4638ରେ ସ୍ଥିର ରହିଛି ।
@IANS
