ଟୋକିଓ: କୋଭିଡ ସଂକ୍ରମଣର ନୂଆ ଷ୍ଟ୍ରେନକୁ ଦୃଷ୍ଟିରେ ରଖି ଦେଶରେ ପୁଣି ଥରେ ରାଜ୍ୟ ଜରୁରୀ କାଳୀନ ସ୍ଥିତି ଘୋଷଣା କରିବା ପାଇଁ ନିଷ୍ପତ୍ତି ନେଇ ପାରନ୍ତି ଜାପାନ ସରକାର । ଗଣମାଧ୍ୟମକୁ ସୂଚନା ଦେଇ ଏହା କହିଛନ୍ତି ଜାପାନ ମୁଖ୍ୟ କ୍ୟାବିନେଟ ସଚିବ । ସେ ସୂଚନା ଦେଇ କହିଛନ୍ତି ଯେ କରୋନା ସଂକ୍ରମଣର ଦ୍ବିତୀୟ ଲହରୀକୁ ଦୃଢ ମୁକାବିଲା ରଣନୀତି ପ୍ରସ୍ତୁତ କରିବାକୁ ଯୋଜନା କରୁଛନ୍ତି ଜାପାନ ସରକାର ।
ଏଥିରେ ଭୟଭୀତ ହେବାର କିଛି ଆଶଙ୍କା ନଥିବାବେଳେ ଲୋକମାନେ କେବଳ ଜରୁରୀ କାମ ବ୍ୟତୀତ ସର୍ବସାଧାରଣ ସ୍ଥାନକୁ ନ ବାହାରିବା ପାଇଁ ନିବେଦନ କରାଯାଇଛି । ସେହିପରି କର୍ମଜୀବୀମାନେ କାର୍ଯ୍ୟାଳୟ ପରିବର୍ତ୍ତେ ଘରେ ରହି କାମ କରିବାକୁ ମଧ୍ୟ ଜାପାନ ସରକାର ନିବେଦନ କରିଛନ୍ତି ।
ନୂଆ କରି ଜାରି ହେବାକୁ ଥିବା ଏହି କଟକଣାରେ ହୋଟେଲ ଓ ରେସ୍ତାେରାଁ ଗୁଡିକୁ ରାତି 8ଟା ପର୍ଯ୍ୟନ୍ତ ଖୋଲା ରଖିବାକୁ ଅନୁମତି ମିଳିଛି । ସେହିପରି ସ୍କୁଲ, ଜିମ, କ୍ଲବ ଗୁଡିକ ସାମାଜିକ ଦୂରତା ବଜାୟ ରଖି ଖୋଲା ରଖିବାକୁ ନିର୍ଦ୍ଦେଶ ରହିଛି । ବର୍ତ୍ତମାନ ମଧ୍ୟ ଦେଶରେ ପ୍ରତିଦିନ 3 ହଜାରରୁ ଊର୍ଦ୍ଧ୍ବ କୋରୋନା ଆକ୍ରାନ୍ତ ଚିହ୍ନଟ ହେବା ନୂଆ ଚିନ୍ତାର କାରଣ ପାଲଟିଛି ।
ମଙ୍ଗଳବାର ସୁଦ୍ଧା କେବଳ ରାଜଧାନୀ ଟୋକିଓରେ 1278 ନୂଆ ଭାଇରସ ଦ୍ବାରା ଆକ୍ରାନ୍ତଙ୍କୁ ଚିହ୍ନଟ କରାଯାଇଛି । ଜାପାନ ସ୍ବାସ୍ଥ୍ୟ ବିଭାଗ ଦ୍ବାରା ମିଳିଥିବା ତଥ୍ୟ ଅନୁସାରେ ଦେଶରେ 2 ଲକ୍ଷ 40 ହଜାର ଆକ୍ରାନ୍ତଙ୍କ ପଞ୍ଜୀକରଣ କରାଯାଇଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
