ସିଓଲ: ଦୀର୍ଘ 20 ଦିନର ବିରତି ପରେ ଶନିବାର ଜନସାଧାରଣଙ୍କ ସାମ୍ନାକୁ ଆସି ନିଜ ମୃତ୍ୟୁ ଗୁଜବରେ ଲଗାମ ଲଗାଇଥିଲେ ଦକ୍ଷିଣ କୋରିଆ ସର୍ବୋଚ୍ଚ ନେତା କିମ ଜଙ୍ଗ ଉନ । ଆଉ ଏହାର ଠିକ ଗୋଟିଏ ଦିନ ପରେ ପୃଥିବୀର ସବୁଠାରୁ ଦୃଢ ସ୍ଥାନ ଭାବେ ଜଣାଯାଉଥିବା ଅଣସୈନ୍ୟଯୁକ୍ତ ସ୍ଥାନରେ ହୋଇଛି ଗୁଳି ବର୍ଷଣ । ଉତ୍ତର ଓ ଦକ୍ଷିଣ କୋରିଆ ମଧ୍ୟରେ ଉପଦ୍ବୀପକୁ ବିଭକ୍ତ କରୁଥିବା ଏହି ସ୍ଥାନରେ ରବିବାର ଅସ୍ତ୍ରବିରତି ଉଲଙ୍ଘନ କରିଛି ଉତ୍ତର କୋରିଆ ।
ଏହାର ପ୍ରତି ଜବାବରେ ଦକ୍ଷିଣ କୋରିଆ ଦୁଇ ରାଉଣ୍ଡ ଗୁଳି ବର୍ଷଣ ପରେ ଘଟଣାର ପୁନରାବୃତ୍ତି ନକରିବାକୁ ଚେତାବନୀ ଦେଇଛି । ଏନେଇ ସିଓଲସ୍ଥିତ କର୍ମଚାରୀଙ୍କ ସଂଯୁକ୍ତ ମୁଖ୍ୟ ସୂଚନା ଦେଇ କହିଛନ୍ତି କି ଉତ୍ତର କୋରିଆର ଗୁଳି ବର୍ଷଣ ଦ୍ବାରା ଦକ୍ଷିଣ କୋରିଆର ଏକ ଗାର୍ଡ ପୋଷ୍ଟରେ ଅନେକ ଗୁଳି ବାଜିଛି । ହେଲେ ଘଟଣାରେ କେହି ମୃତାହତ ହୋଇନାହାନ୍ତି । ସେପଟେ ଘଟଣା ପଛର ପ୍ରକୃତ ଉଦ୍ଦେଶ୍ୟ କ’ଣ ଜାଣିବା ପାଇଁ ମିଲିଟାରୀ ହଟଲାଇନ ଦ୍ବାରା ଉତ୍ତର କୋରିଆ ସହ ସମ୍ପର୍କ କରାଯାଇଛି ।
ସୂଚନା ଅନୁଯାୟୀ ଉଭଯ ଉତ୍ତର କୋରିଆ ଓ ଦକ୍ଷିଣ କୋରିଆ ମଧ୍ୟରେ 1953ରେ କୋରିଆ ଯୁଦ୍ଧର ସମାପ୍ତି ପରଠାରୁ ହିଁ ତିକ୍ତତା ଲାଗି ରହିଛି । ତେବେ ଉଭୟ ରାଷ୍ଟ୍ର ମଧ୍ୟରେ ରହିଥିବା ଏହି ଅଣସୈନ୍ୟଯୁକ୍ତ ଅଞ୍ଚଳରେ ଶାନ୍ତି ବଜାୟ ରଖିବା ଏକ ଶାନ୍ତି ଚୁକ୍ତିର ଅଂଶ । ହେଲେ ଏହାକୁ ଉତ୍ତର କୋରିଆ ବାରମ୍ବାର ଉଲଙ୍ଘନ କରିଚାଲିଛି । ଏଥିସହ ଦକ୍ଷିଣ କୋରିଆ ରାଜଧାନୀ ସିଓଲଠାରୁ ଉତ୍ତର କୋରିଆ ରାଜଧାନୀ ପ୍ୟୋଙ୍ଗ୍ୟାଙ୍ଗ ଦୂରତା ବଜାୟ ରଖିବାର ଚେଷ୍ଟା ଜାରି ରଖିଛି ।
