ସିଓଲ: ନିକଟରେ ଉତ୍ତର କୋରିଆର ସର୍ବୋଚ୍ଚ ନେତା କିମ ଜଙ୍ଗ ଉନଙ୍କ ସ୍ବାସ୍ଥ୍ୟାବସ୍ଥା ଓ ମୃତ୍ୟୁ ଖବର ନେଇ ଜୋର ଧରିଛି ଚର୍ଚ୍ଚା । ଏମିତିରେ ଚର୍ଚ୍ଚାକୁ ପୁଣି ବଢାଇଛି ଉତ୍ତର କୋରିଆରେ ପ୍ୟୋଙ୍ଗ୍ୟାଙ୍ଗ ଦଳ ଛାଡିଥିବା ଜଣେ ନେତାଙ୍କ ବୟାନ । ଦଳ ଛାଡି ସେ ବର୍ତ୍ତମାନ ଦକ୍ଷିଣ କୋରିଆରେ ବ୍ୟବସ୍ଥାପକ ଭାବେ କାର୍ଯ୍ୟରତ ଥିବା ବେଳେ ସେ କିମଙ୍କ ମୃତ୍ୟୁ ଖବର 99 ପ୍ରତିଶତ ସତ ବୋଲି ଦାବି କରିଛନ୍ତି ।
ଜାତୀୟ ଗଣମାଧ୍ୟମକୁ ଖବର ଦେଇ ସେ କହିଛନ୍ତି କି ଏକଥା କାହାକୁ ଅଛପା ନୁହେଁ କି କିମ ଗତ ତିନି ସପ୍ତାହ ହେବ ଅସୁସ୍ଥ ରହିଛନ୍ତି । ତାଙ୍କର କାର୍ଡିଓଭାସ୍କୁଲାର ସର୍ଜରୀ ପରେ ସ୍ବାସ୍ଥ୍ୟାବସ୍ଥାରେ ଅବନତି ଘଟିଥିଲା । ଏହାପରେ ଗତ ସପ୍ତାହ ଶେଷ ଆଡକୁ ତାଙ୍କର ମୃତ୍ୟୁ ହୋଇଥିବା ପ୍ରକାଶ କରିଛନ୍ତି ଜି ସିଓଙ୍ଗ-ହୋ । ତେବେ ଏହି ଖବର ସେ କାହାଠାରୁ ପାଇଛନ୍ତି ତାହା ସ୍ପଷ୍ଟ କରିନାହାନ୍ତି ।
ଜି ଗତ ଏପ୍ରିଲ 15ରେ ଦକ୍ଷିଣ କୋରିଆର ଏକ ସାଧାରଣ ଦଳୀୟ ନିର୍ବାଚନରେ ଆସନ ହାତେଇଥିବା ପରେ ଶୁକ୍ରବାର ଏହି ବୟାନ ଦେଇଛନ୍ତି । ହେଲେ ଖବର 100 ପ୍ରତିଶତ ସତ ନହେଲେ ବି ମିଛ ନୁହେଁ ବୋଲି ସେ ଦାବି କରିଛନ୍ତି । ସେ ଏହା ମଧ୍ୟ କହିଛନ୍ତି କି ଖୁବଶୀଘ୍ର ଏନେଇ ସରକାରୀ ଘୋଷଣା କରାଯିବ । ଆଉ କିମଙ୍କ ପରେ ତାଙ୍କ ଭଉଣୀ କିମ ୟୋ-ଜୋଙ୍ଗ ଉତ୍ତରାଧିକାରୀ ଭାବେ ପଦବୀ ଗ୍ରହଣ କରିବେ ।
ସେପଟେ ଏହାକୁ ଖଣ୍ଡନ କରିଛି ଦକ୍ଷିଣ କୋରିଆ ରାଷ୍ଟ୍ରପତି କାର୍ଯ୍ୟାଳୟ ସିଓଙ୍ଗ ୱା ଡେ । କାର୍ଯ୍ୟାଳୟ ପକ୍ଷରୁ ସ୍ପଷ୍ଟ ହୋଇଛି କି ଉତ୍ତର କୋରିଆରେ କିମଙ୍କ ମୃତ୍ୟୁ ନେଇ କୌଣସି ସୂଚନା ନାହିଁ । ଏପରି ସ୍ଥିତିରେ ଯେକୌଣସି ସୂତ୍ରରୁ ଆସିଥିବା ଖବର ଉପରେ ବିଶ୍ବାସ ନକରିବା ଉଚିତ ।
