ବେଜିଂ: ଚୀନରେ କୋରୋନା ଦ୍ବିତୀୟ ଲହରୀ ଭାବେ ବେଜିଂସ୍ଥିତ ହୋଲସେଲ ଫୁଡ ମାର୍କେଟରେ ଆରମ୍ଭ ହୋଇଥିବା କ୍ଲଷ୍ଟର ସଂକ୍ରମଣ । ଏହି ସଂକ୍ରମଣର ପ୍ରଥମ ଶିକାର ସୋମବାର ସୁସ୍ଥ ହେବା ପରେ ତାଙ୍କୁ ଡାକ୍ତରଖାନାରୁ ଘରକୁ ପଠାଯାଇଥିବା ଜଣା ପଡିଛି । ଯାହା ବେଜିଂରେ ଆରମ୍ଭ ହୋଇଥିବା କୋରୋନା ସଂକ୍ରମଣର ଦ୍ବିତୀୟ ଲହରୀରେ ପ୍ରଥମ ସଫଳତା ।
ସୂଚନା ମୁତାବକ ଜୁନ 3ରେ ସମ୍ପୃ୍କ୍ତ 56 ବର୍ଷୀୟ ବ୍ୟକ୍ତି ଜିନଫାଦି ହୋଲସେଲ ଫୁଡ ମାର୍କେଟର ଗୋମାଂସ ଦୋକାନରେ 20 ମିନିଟ ରହିଥିଲେ । ଏହାପରେ ସେ ଅନ୍ୟ ଦୋକାନରେ ମଧ୍ୟ କିଛି ସମୟ ରହି ବେଜିଂର ଦକ୍ଷିଣାଞ୍ଚଳରେ ଥିବା ଫେଙ୍ଗତାଇ ଜିଲ୍ଲାସ୍ଥିତ ନିଜ ଘରକୁ ଫେରିଥିଲେ । କିଛି ଦିନ ମଧ୍ୟରେ ସେ ଜ୍ବର ଓ ଥକାପଣ ଆଦି ଲକ୍ଷଣ ଅନୂଭବ କରିବାରୁ ଜୁନ 12ରେ ଡାକ୍ତରଖାନା ଯାଇ ରକ୍ତ ନମୂନା ପରୀକ୍ଷା କରାଇଥିଲେ । ସେଠାରେ ସେ ପଜିଟିଭ ବୋଲି ଚିହ୍ନଟ ହୋଇଥିଲେ ।
ଏହାପରେ ଜୁନ 13ରୁ ବେଜିଂ ଦିତାନ ହସ୍ପିଟାଲରେ ତାଙ୍କର ଚିକିତ୍ସା ଆରମ୍ଭ ହୋଇଥିଲା । ଜୁନ 16 ସୁଦ୍ଧା ତାଙ୍କର ସ୍ବାସ୍ଥ୍ୟୂବସ୍ଥାରେ ଉନ୍ନତି ପରିଲକ୍ଷିତ ହେବା ପରେ ଜୁନ 21 ଓ 26ରେ ତାଙ୍କର ନ୍ୟୁକ୍ଲିକ ଏସିଡ ଟେଷ୍ଟ କରାଯାଇଥିଲା । ଏଥିରେ ରିପୋର୍ଟ ନେଗେଟିଭ ଆସିଥିଲା । ସୋମବାର ସେ ସମ୍ପୂର୍ଣ୍ଣ ସୁସ୍ଥ ହେବା ପରେ ତାଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଛି ।
ତେବେ ଜୁନ 11ରୁ ଜୁନ 28 ମଧ୍ୟରେ ବେଜିଂରେ 318ଟି ପଜିଟିଭ ମାମଲା ସାମ୍ନାକୁ ଆସିଛି । ଏସମସ୍ତ ମାମଲା ସ୍ଥାନୀୟ ସଂକ୍ରମଣ ଯୋଗୁଁ ସୃଷ୍ଟି ହୋଇଥିବା କୁହାଯାଇଛି । ଏହି ସମସ୍ତ ଆକ୍ରାନ୍ତଙ୍କ ଚିକିତ୍ସା ପାଇଁ ଅତିରିକ୍ତ 108 ଜଣ ଡାକ୍ତରୀ କର୍ମଚାରୀ ବେଜିଂ ପହଞ୍ଚି ଚିକିତ୍ସା ପ୍ରକ୍ରିୟାରେ ସାହାଯ୍ୟ କରିଥିଲେ । ସେପଟେ ଗତବର୍ଷ ଡିସେମ୍ବରରେ ଉହାନର ହୁବେଇ ପ୍ରାନ୍ତରେ ଏହି ସଂକ୍ରମଣ ଆରମ୍ଭ ହୋଇଥିବା ବିଶ୍ବାସ କରାଯାଉଥିବା ସତ୍ତ୍ବେ ଅନ୍ୟ ଦେଶଙ୍କ ତୁଳନାରେ ଚୀନରେ ଉଭୟ ଆକ୍ରାନ୍ତ ଓ ମୃତ୍ୟୁ ହାର ଅପେକ୍ଷାକୃତ କମ ରହିଥିବା ଦେଖାଯାଇଛି ।
ଚୀନରେ ବର୍ତ୍ତମାନ ସୁଦ୍ଧା କୋରୋନା ଆକ୍ରାନ୍ତ ସଂଖ୍ୟା 83,512ରେ ପହଞ୍ଚିଥିବା ବେଳେ ମୃତ୍ୟୁ 4634 ରହିଛି ।
@IANS
