ୱାଶିଂଟନ: ଆମେରିକାରେ ରାଷ୍ଟ୍ରପତି ନିର୍ବାଚନ ଫଳାଫଳ ଘୋଷଣା ପୂର୍ବରୁ ଉତ୍ସବର ପ୍ରସ୍ତୁତି ଆରମ୍ଭ କରିଦେଇଛନ୍ତି ଡୋନାଲ୍ଡ ଟ୍ରମ୍ପ । ରାଷ୍ଟ୍ରପତି ଟ୍ରମ୍ପ ମଧ୍ୟରାତ୍ରିରେ ଦେଶକୁ ସମ୍ବୋଧିତ କରି ନିର୍ବାଚନ ଜିତିସାରିଥିବା ନେଇ ଦାବି କରିଛନ୍ତି । ଅନ୍ୟପକ୍ଷେ ଭୋଟ ଗଣତିରେ ଜାଲିଆତି ହୋଇଥିବା ନେଇ ଅଭିଯୋଗ କରିଛନ୍ତି । ତେବେ ରାଷ୍ଟ୍ରପତି ଟ୍ରମ୍ପ ଏହା ବିରୋଧରେ ସୁପ୍ରିମକୋର୍ଟ ଯିବେ ବୋଲି ଜଣାପଡିଛି ।
ଡୋନାଲ୍ଡ ଟ୍ରମ୍ପ ଆମେରିକାର ନାଗରିକମାନଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ ଆମେ ଏକ ବଡ ଉତ୍ସବ ପାଇଁ ପ୍ରସ୍ତୁତ ହେଉଛୁ, ଆମେ ସବୁକିଛି ଜିତୁଛୁ । ନିର୍ବାଚନର ଫଳାଫଳ ଆଶ୍ଚର୍ଯ୍ୟଜନକ ହେବ ବୋଲି ସେ କହିଛନ୍ତି।
ଆମେରିକାକୁ ସମ୍ବୋଧିତ କରି ଡୋନାଲ୍ଡ ଟ୍ରମ୍ପ ନିର୍ବାଚନରେ ତାଙ୍କ ବିଜୟ ଉପରେ ଆତ୍ମବିଶ୍ବାସ ପ୍ରକଟ କରିଛନ୍ତି। ସେ କହିଛନ୍ତି ଯେ ଆମେ ନିର୍ବାଚନରେ ସ୍ପଷ୍ଟ ଭାବେ ଜିତିଛୁ। ଏହି ସମୟ ମଧ୍ୟରେ ଟ୍ରମ୍ପ ଜୋ ବିଡେନଙ୍କ ଉପରେ ତାଙ୍କ ଭୋଟ ଗଣତିରେ ଜାଲିଆତି କରିଥିବା ଅଭିଯୋଗ କରିଛନ୍ତି। ଏହା ବିରୋଧରେ ସେ ସୁପ୍ରିମକୋର୍ଟ ଯିବେ ବୋଲି ଚେତାବନୀ ଦେଇଛନ୍ତି । ପେନସିଲଭାନିଆରେ ରାତାରାତି କାହିଁକି ଭୋଟ ଗଣାଯାଉଛି ବୋଲି ପ୍ରଶ୍ନ କରିଛନ୍ତି ଟ୍ରମ୍ପ ।
ଆମେରିକା ନିର୍ବାଚନରେ ବିଜୟ ଦାବି କରି ଟ୍ରମ୍ପ କହିଛନ୍ତି ଯେ ଆମେ ଟେକ୍ସାସ, ଜର୍ଜିଆ, ଉତ୍ତର କେରୋଲିନାରେ ଜିତିଛୁ। ଆଶା ଅନୁଯାୟୀ ଆମେ ଜିତିବୁ । ଆଶ୍ଚର୍ଯ୍ୟଜନକ ଫଳାଫଳ ଆସିବ । ପେନସିଲଭାନିଆ ବିଜୟ ନେଇ ମଧ୍ୟ ଦାବି କରିଛନ୍ତି ଟ୍ରମ୍ପ ।
ଡେମୋକ୍ରାଟ ପ୍ରାର୍ଥୀ ବିଡେନଙ୍କୁ ଟାର୍ଗେଟ କରି ଟ୍ରମ୍ପ କହିଛନ୍ତି, ସେ କୋର୍ଟକୁ ଯିବାକୁ ପ୍ରସ୍ତୁତ ହେଉଛନ୍ତି । ଟ୍ରମ୍ପଙ୍କ ଅଭିଯୋଗ ପରେ ବର୍ତ୍ତମାନ ପେନସିଲଭାନିଆରେ ଭୋଟ ଗଣନା ବନ୍ଦ ହୋଇଯାଇଛି।
