ୱାଶିଂଟନ: ଶନିବାର ଆତଙ୍କବାଦୀ ସଙ୍ଗଠନ ଇସଲାମିକ ଷ୍ଟେଟ୍(ଆଇଏସ)କୁ ସିରିୟାରୁ ମୂଳପୋଛ କରିଛି ଆମେରିକା ନେତୃତ୍ବାଧୀନ ମିଳିତ ବାହିନୀ । ଅନେକ ବର୍ଷ ଧରି ଏଠାରେ ଆଇଏସ ସାମ୍ରାଜ୍ୟ ବିସ୍ତାର କରିଥିଲା । ହେଲେ ଗତ ସାଢେ 4 ବର୍ଷ ଧରି ଆମେରିକା ପକ୍ଷରୁ ଚାଲିଥିଲା ସାମରିକ ଅପରେସନ । ଯାହା ଶନିବାର ଶେଷ ହେବା ସହ ଆଇଏସ ସାମ୍ରାଜ୍ୟର ମୂଳପୋଛ ହୋଇଛି ।
ତେବେ ଏହି ବିଜୟକୁ ବିରାଟ ବିଜୟ କହିବା ସହ ଆତଙ୍କବାଦୀ ବିରୋଧରେ ଏହି ଲଢେଇ ଜାରି ରହିବ ବୋଲି ଆମେରିକା ରାଷ୍ଟ୍ରପତି ଡୋନାଲଡ୍ ଟ୍ରମ୍ପ କହିଛନ୍ତି । ଏହି ଅପରେସନ ପରେ ହ୍ବାଇଟ୍ ହାଉସରୁ ଜାରି ଏକ ବିବୃତିରେ ଟ୍ରମ୍ପ ଏପରି ମନ୍ତବ୍ୟ ଦେଇଛନ୍ତି । ଏହା ଆତଙ୍କବାଦ ବିରୋଧରେ ଏକ ବଡ ବିଜୟ । ଆଇଏସ ବିରୋଧରେ ବିଶ୍ବବ୍ୟାପୀ ଚାଲିଥିବା ଲଢେଇ ଆଗକୁ ଜାରି ରହିବ । ଏହି ସଙ୍ଗଠନକୁ ସମୂଳେ ବିନାଶ କରାଯିବ ବୋଲି ଟ୍ରମ୍ପ ଚେତାବନୀ ଦେଇଛନ୍ତି ।
ଆଇଏସ ନିଜର ସମସ୍ତ କ୍ଷମତା ଓ ଗୌରବ ହରାଇଛି । ଏବେ ଇରାକ ଓ ସିରିୟା ଆଇଏସ ମୁକ୍ତ ହୋଇଥିବାବେଳେ ଆଗକୁ ଏହାର ସମସ୍ତ ସ୍ଲିପର ସେଲ୍ଙ୍କୁ ଖୋଜି ଖୋଜି ନିପାତ କରାଯିବ । ଅନଲାଇନରେ ସମର୍ଥନ ଯେଗାଡ କରୁଥିବା ଆତଙ୍କବାଦୀଙ୍କୁ ସମ୍ପୂର୍ଣ୍ଣ ନିପାତ କରାଯିବ ବୋଲି ଟ୍ରମ୍ପ କହିଛନ୍ତି । ଆମେରିକା ସବୁବେଳେ ଏହାର ସହଯୋଗୀ ଦେଶଙ୍କୁ ସାହାଯ୍ୟ କରିଆସିଛି । ଆଗକୁ ମଧ୍ୟ ଏପରି କାର୍ଯ୍ୟରେ ଆମେରିକା ନେତୃତ୍ବରେ ସାମରିକ ଅଭିଯାନ ଜାରି ରହିବ ବୋଲି ସେ କହିଛନ୍ତି ।
ଏହି ବିବୃତିରେ ସେ ଅପରେସନରେ ସାମିଲ ସମସ୍ତ ସେନାଙ୍କୁ ଧନ୍ୟବାଦ ଦେବା ସହ ଶୁଭେଚ୍ଛା ଜଣାଇଥିଲେ । ଆତ୍ମସମର୍ପଣ କରିଥିବା ଆଇଏସ ଆତଙ୍କୀଙ୍କ ମଧ୍ୟରେ ଅନେକ ଯୁବକ ରହିଛନ୍ତି । ଏମାନଙ୍କୁ ଧ୍ବଂସର ରାସ୍ତା ଛାଡି ଉତ୍ତମ ଭବିଷ୍ୟତ ବିଷୟରେ ଚିନ୍ତା କରିବାକୁ ଟ୍ରମ୍ପ ପରାମର୍ଶ ଦେଇଛନ୍ତି ।
