ନ୍ୟୁୟର୍କ: ମଙ୍ଗଳ ଗ୍ରହକୁ ନେଇ ଅନୁସନ୍ଧାନ ଗବେଷଣା ମହାକାଶ ବୈଜ୍ଞାନିକମାନଙ୍କ ପାଇଁ ଏକ ପସନ୍ଦର ବିଷୟ । ମଙ୍ଗଳ ଗ୍ରହରେ ଜୀବନ ସତ୍ତା ଓ ଜଳୀୟ ପଦାର୍ଥର ଅବସ୍ଥିତି ନେଇ ପୂର୍ବରୁ ଅନେକ ଗବେଷଣା ସରିଛି । ଏଥିରେ ଜଣା ପଡିଥିଲା କି ମଙ୍ଗଳ ଗ୍ରହରେ ଜୀବନର ସତ୍ତା କେବଳ ଯେ କଷ୍ଟକର ତାହା ନୁହେଁ, ଏହା ଅସମ୍ଭବ ପ୍ରାୟ । ଏମିତିରେ ନିକଟରେ ପ୍ରକାଶିତ ତଥ୍ୟ ମୁତାବକ ମଙ୍ଗଳ ଗ୍ରହରେ ଅନୁସନ୍ଧାନ କରିବା ଦ୍ବାରା ଏହାର ପରିବେଶରେ କୌଣସି କ୍ଷତି ପହଞ୍ଚିବ ନାହିଁ । ହେଲେ ଏଥିପାଇଁ କିଛି ବିଶେଷ ବିଷୟ ପ୍ରତି ସ୍ବତନ୍ତ୍ର ଧ୍ୟାନ ଦେବାକୁ ହେବ ।
ନିକଟରେ ନେଚର ଆଷ୍ଟ୍ରୋନୋମି ଜର୍ଣ୍ଣାଲରେ ଏନେକ ପ୍ରକାଶିତ ହୋଇଥିଲା ତଥ୍ୟାବଳୀ । ଏଥିରେ ଲେଖାଥିଲା କି ମଙ୍ଗଳ ଗ୍ରହରେ ଜଳ ବିନ୍ଦୁ କ୍ଷଣିକ ମଧ୍ୟରେ ବରଫ ପାଲଟିବ କିମ୍ବା ବାଷ୍ପରେ ପରିଣତ ହେବ । ଏହାର କାରଣ ହେଉଛି ମଙ୍ଗଳ ଗ୍ରହର କମ ତାପମାତ୍ରା । କିନ୍ତୁ ଯଦି ଜଳ ବିନ୍ଦୁରେ ଲୁଣ ଅଂଶ ରୁହେ ତେବେ ଏହା ବାଷ୍ପୀଭୂତ କିମ୍ବା ବରଫ ପାଲଟିବାରେ ସାଧା ଜଳ ଅପେକ୍ଷା ଅଧିକ ସମୟ ନେବ । ମଙ୍ଗଳ ଗ୍ରହରେ ଲୁଣର ସ୍ଥିତି ନେଇ ପୂର୍ବରୁ ବୈଜ୍ଞାନିକମାନେ ସନ୍ଧାନ କରିସାରିଛନ୍ତି ।
ତେବେ ଏହି ତଥ୍ୟ ପ୍ରକାଶ ପାଇବା ପରେ ବୈଜ୍ଞାନିକମାନେ ବର୍ତ୍ତମାନ ମଙ୍ଗଳପୃଷ୍ଠରେ ଏପରି ସ୍ଥାନର ସନ୍ଧାନ ଆରମ୍ଭ କରିଛନ୍ତି ଯେଉଁଠାରେ ସ୍ଥଳୀୟ ଜୀବ ପହଞ୍ଚି ଜଳୀୟ ପଦାର୍ଥର ତାପମାତ୍ରା ଓ ଏଠାରେ ପହଞ୍ଚିବାର କ୍ଷମତା ପରୀକ୍ଷା କରିପାରିବ । ଏଥିସହ ଏଠାରେ ଜୀବନସତ୍ତାର ସମ୍ଭାବନା ମଧ୍ୟ ପରୀକ୍ଷା କରିବା ପାଇଁ ବୈଜ୍ଞାନିକମାନେ ଯୋଜନା କରୁଛନ୍ତି । ଏନେଇ ମାର୍ସିଆନ ପାଣିପାଗକୁ ବୁଝିବା ପାଇଁ ଉଭୟ ପାଣିପାଗ ତଥ୍ୟ ଓ ସ୍ପେସକ୍ରାଫ୍ଟ ଉପଲବ୍ଧିକୁ ମିଶାଇ ଏକ ଆର୍ଟିଫିସିଆଲ ମଡେଲ ପ୍ରସ୍ତୁତ କରାଯାଇଛି ।
ଏହି ମଡେଲରୁ ସ୍ପଷ୍ଟ ହୋଇଛି ମଙ୍ଗଳ ଗ୍ରହରେ ଥିବା ଲବଣ ପରିବେଶ ପାଇଁ ଖାଲ ଢିପ ସ୍ଥାନରେ ଜୀବନ ସତ୍ତା ସମ୍ଭବ ନୁହେଁ । କାରଣ ଏହି ସ୍ଥାନ ଗୁଡିକରେ ତାପମାତ୍ରା ଅନ୍ୟ ସ୍ଥାନ ତୁଳନାରେ କମ ରହିବା ସହ ଏଠାରେ ଜଳ ଖୁବ ଶୀଘ୍ର ବରଫ ପାଲଟିଯାଏ । ଯାହା ମାନବସତ୍ତାର ସମ୍ଭାବନାକୁ ବିରୋଧ କରେ । ଏନେଇ ବୈଜ୍ଞାନିକମାନେ ମତ ଦେଇଛନ୍ତି କି ମଙ୍ଗଳ ଗ୍ରହର ପରିବେଶରେ ଲବଣରୁ ପ୍ରସ୍ତୁତ ବ୍ରାଇନ ବା ଲବଣ ପିଣ୍ଡ ଦ୍ବାରା ମଙ୍ଗଳ ପୃଷ୍ଠରେ 40 ପ୍ରତିଶତ ଜଳ ତରଳ ଅବସ୍ଥାରେ ରହିପାରିବ । କିନ୍ତୁ ଏହା ମଙ୍ଗଳଗ୍ରହର ମାର୍ସିଆନ ଇୟରର ମାତ୍ର 2 ପ୍ରତିଶତ ସମୟରେ ଦେଖିବାକୁ ମିଳେ ।
ତେଣୁ ଏହି ସନ୍ଧାନ ଆଗାମୀ ଦିନରେ ମଙ୍ଗଳ ଗ୍ରହକୁ ଅଧିକ ଭଲ ଭାବେ ବୁଝିବାରେ ନିଶ୍ଚୟ ସାହାଯ୍ୟ କରିବା ସହ ମଣିଷ ଏହାର ପୃଷ୍ଠରେ କିପରି ସୁରକ୍ଷିତ ଭାବେ ପହଞ୍ଚିପାରିବ ସେ ଦିଗରେ ଗବେଷଣାକୁ ମଧ୍ୟ ସାହାଯ୍ୟ କରିବ ।
@IANS
