ୱାଶିଂଟନ: ସମଗ୍ର ବିଶ୍ୱରେ ମହାମାରୀ କୋରୋନା ଯୋଗୁଁ ଲକ ଡାଉନ ସ୍ଥିତି । ଏଭଳି ସ୍ଥିତିରେ ଲୋକମାନେ ଟଏଲେଟ ପେପର ମଧ୍ୟ ପାଇବା କଷ୍ଟକର ହେଲାଣି ।ଦୋକାନରେ ଖାଦ୍ୟ ଏବଂ ପାନୀୟ ଶେଷ ହୋଇ ଆସିଲାଣି । ଏପରିକି ଘରେ ଥିବା ଲୋକଙ୍କ ପାଖରୁ ମଧ୍ୟ ସରିଲାଣି ଜିନିଷ। ଇଟାଲୀରେ ଲୋକମାନେ ନିଜ ଘର ବାହାରେ ମଧ୍ୟ ଗରିବଙ୍କ ଉଦ୍ଦେଶ୍ୟରେ ଖାଦ୍ୟ ବ୍ୟାଗ ମଧ୍ୟ ଟାଙ୍ଗିଥିଲେ।
ବର୍ତ୍ତମାନ ଆମେରିକାର ୱିସ୍କୋସିନରୁ ଏଭଳି ଏକ ଖବର ଆସିଛି ଯାହା ଶୁଣିଲେ ଆପଣ ଆଶ୍ଚର୍ଯ୍ୟ ହେବେ । ଏଠାରେ ଏକ ପରିବାର ନିଜ ଘର ବାହାରେ ଖୋଲିଛନ୍ତି ଏକ ପ୍ୟାଣ୍ଟ୍ରି। ଯେଉଁଠି ଲୋକଙ୍କ ପାଇଁ ଖାଦ୍ୟ ଏବଂ ପାନୀୟ ରଖିଛନ୍ତି । ବିନା ମୂଲ୍ୟରେ ଲୋକେ ନିଜ ଆବଶ୍ୟକ ଅନୁସାରେ ଏଠାରୁ ଖାଦ୍ୟ ନେଇ ପାରିବେ । ଟେରି ଉରିବେ ଗଲଙ୍କ ପରିବାର ଏହି ବ୍ୟବସ୍ଥା କରିଛନ୍ତି । ଟେରି ନିଜ ଫେସବୁକ ପେଜରେ ଏନେଇ ସେୟାର କରିଛନ୍ତି କିଛି ଫଟୋ । ଆଉ ଏଥିରେ ଲେଖିଛନ୍ତି, 'ମୁଁ ଏବଂ ମୋ ପରିବାର ଏହି ସମୟରେ ଲୋକଙ୍କୁ ସାହାଯ୍ୟ କରିବା ପାଇଁ ଏହି ମିନି ପ୍ୟାଣ୍ଟ୍ରି ଖୋଲିଛୁ। ଜିନିଷ କିଣିବା ବନ୍ଦ କର, ଆବଶ୍ୟକ ହେଲେ ଏଠାରୁ ନିଅ ।
ଯଦି ତୁମେ କିଛି ଦାନ କରିପାରିବ ତେବେ ନିଶ୍ଚୟ କର । ଏହି ପ୍ୟାଣ୍ଟ୍ରି 24 ଘଣ୍ଟା ଖୋଲା ରହୁଛି । ଖାଦ୍ୟ ସାମଗ୍ରୀ ସହିତ ଏହା ମୃଦୁ ପାନୀୟ, ଡାଏପର, କାଗଜ ଦ୍ରବ୍ୟ, ଗୃହପାଳିତ ପଶୁମାନଙ୍କ ପାଇଁ ଖାଦ୍ୟ,ଜୁସ୍, ସୋଡା, ଚିପ୍ସ, ସାମ୍ପୁ, ପ୍ୟାନ କେକ୍, ଆଳୁ ଏବଂ ଅନ୍ୟାନ୍ୟ ପନିପରିବା ମଧ୍ୟ ରହିଛି । ଏପରିକି ଏହି ଦୋକାନରେ ମନୋରଞ୍ଜନ ଉଦ୍ଦେଶ୍ୟରେ କିଛି ପୁସ୍ତକ ମଧ୍ୟ ରଖାଯାଇଛି ।
