ୱାଶିଂଟନ: ପୁଣି ଆମେରିକାରେ ଚମକିବେ ଭାରତୀୟ ବଂଶୋଦ୍ଭବ । ଅନ୍ତର୍ଜାତୀୟ ମୁଦ୍ରା ପାଣ୍ଠି(IMF)ରେ ନିଯୁକ୍ତ ହେବାକୁ ଯାଉଛନ୍ତି ଜଣେ ଭାରତୀୟ ମହିଳା । କେରଳର ମୂଳ ବାସିନ୍ଦା ଗୀତା ଗୋପୀନାଥ(Gita Gopinath) IMF ଉପପରିଚାଳନା ନିର୍ଦ୍ଦେଶକ ବା ଡେପୁଟି ଏମଡି(Deputy MD) ହେବାକୁ ଯାଉଛନ୍ତି ।
ତାଙ୍କ ନିଯୁକ୍ତି ପରେ ପ୍ରଥମ ଥର ପାଇଁ ଅନ୍ତର୍ଜାତୀୟ ଆର୍ଥିକ ପ୍ରତିଷ୍ଠାନର ଶ୍ରେଷ୍ଠ ୨ଟି ପଦରେ ମହିଳା ଅବସ୍ଥାପିତ ହେବେ । ଆସନ୍ତା ବର୍ଷ ଜାନୁଆରୀ ୨୧ ରୁ ଗୀତା ଗୋପୀନାଥ ଏହି ଦାୟିତ୍ବ ଗ୍ରହଣ କରିବେ । ସେ ଜେଫ୍ରି ଓକାମୋଟାଙ୍କ ସ୍ଥାନରେ ଅବସ୍ଥାପିତ ହେବେ ।
ତେବେ ଗୀତା ହେଉଛନ୍ତି କେରଳର ମୂଳ ବାସିନ୍ଦା । ସେ ୧୯୭୧ରେ କେରଳର କନ୍ନୁରରେ ଜନ୍ମଗ୍ରହଣ କରିଥିଲେ । ତାଙ୍କ ପାଖରେ ଉଭୟ ଭାରତ ଏବଂ ଆମେରିକାର ନାଗରିକତ୍ବ ଅଛି । ୨୦୧୬ ରୁ ୨୦୧୮ ମଧ୍ୟରେ ସେ କେରଳ ମୁଖ୍ୟମନ୍ତ୍ରୀଙ୍କ ଅର୍ଥନୈତିକ ଉପଦେଷ୍ଟା ଭାବେ କାର୍ଯ୍ୟ କରିଥିଲେ । ସେ ଦିଲ୍ଲୀ ବିଶ୍ବବିଦ୍ୟାଳୟର ଲେଡି ଶ୍ରୀରାମ କଲେଜରୁ ୧୯୯୨ ରେ ଅର୍ଥନୀତିରେ ପାଠପଢା ଆରମ୍ଭ କରିଥିଲେ । ପରେ ଦିଲ୍ଲୀ ସ୍କୁଲ୍ ଅଫ ଇକୋନୋମିକ୍ସରୁ ଅର୍ଥନୀତିରେ ମାଷ୍ଟର ଡିଗ୍ରୀ ସାରିବା ପରେ ଅଧିକ ପଢା ପାଇଁ ୱାଶିଂଟନ ଯାଇଥିଲେ ।
ସେଠାରେ ପିନ୍ସଟନ ବିଶ୍ବବିଦ୍ୟାଳୟରେ ପିଏଚ.ଡି କରିବା ପରେ ୨୦୦୧ ରୁ ୨୦୦୫ ପର୍ଯ୍ୟନ୍ତ ସିକାଗୋ ବିଶ୍ବବିଦ୍ୟାଳୟରେ ଆସିଷ୍ଟାଣ୍ଟ ପ୍ରଫେସର ଭାବେ କାର୍ଯ୍ୟ କରିଥିଲେ । ପରେ ହାବାର୍ଡ ୟୁନିଭରସିଟିରେ ମଧ୍ୟ ଆସିଷ୍ଟାଣ୍ଟ ପ୍ରଫେସର ଥିଲେ ।
୨୦୧୮ରେ ଗୋପୀନାଥ IMFର ମୁଖ୍ୟ ଅର୍ଥନୀତିଜ୍ଞ ଭାବେ ଯୋଗ ଦେଇଥିଲେ । ଏଠାରେ କାର୍ଯ୍ୟକାଳ ସମାପ୍ତ ହେବା ପରେ ସେ ହାବାର୍ଡ ଫେରିଯିବେ ବୋଲି ଅକ୍ଟୋବରରେ ଘୋଷଣା କରିଥିଲେ । କିନ୍ତୁ ବର୍ତ୍ତମାନ ସେ IMFର ଡେପୁଟି ଏମଡି ଭାବେ ନିଯୁକ୍ତ ହେବାକୁ ଯାଉଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
