ନ୍ୟୁୟର୍କ: ଆମେରିକାରେ କୋଭିଡ-19 ସଂକ୍ରମିତ ‘ଜର୍ମାନ ସେଫର୍ଡ’ କୁକୁରର ମୃତ୍ୟୁ ହୋଇଛି । କୁକୁରଙ୍କ ଠାରେ କୋରୋନା ଦେଖା ଦେଇଥିବାର ଏହା ଥିଲା ପ୍ରଥମ ମାମଲା । କୁକୁରକୁ ପାଳିଥିବା ଷ୍ଟୋଟେନ ଦ୍ବୀପର ରୋବର୍ଟ ଓ ଆଲିସନ ମହୋନି ନ୍ୟାସନାଲ ଜିଓଗ୍ରାଫିକକୁ ସୂଚନା ଦେଇଛନ୍ତି ।
ସାତ ବର୍ଷର କୁକୁର 'ବଡି' ଏପ୍ରିଲ ମଧ୍ୟଭାଗରେ ନିଶ୍ୱାସ ନେବାରେ ଅସୁବିଧା ଅନୁଭବ କରିଥିଲା । ଅନେକ ସପ୍ତାହ ଧରି ସଂକ୍ରମଣରେ ପୀଡିତ ଥିଲା। କୋରୋନା ଭୂତାଣୁ ସଂକ୍ରମିତ ଚିହ୍ନଟ ପାଇଁ ‘ବଡି’ର କୋରୋନା ଟେଷ୍ଟ କରାଯାଇଥିଲା । ଆମେରିକାର କୃଷି ବିଭାଗ ଜୁନ ମାସରେ ରିପୋର୍ଟ କରିଥିଲେ ନ୍ୟୁୟର୍କରେ ଥିବା ‘ଜର୍ମାନ ସେଫର୍ଡ’ ହେଉଛି ପ୍ରଥମ କୁକୁର ଯିଏକି କୋରୋନା ଆକ୍ରାନ୍ତ ହୋଇଛି ।
‘ବଡି’ର ସ୍ବାସ୍ଥ୍ୟବସ୍ଥା ବିଗିଡିବା ପରେ ଜୁଲାଇ 11ରେ ମୃତ୍ୟୁ ହୋଇଥିଲା । କୁକୁର ରକ୍ତ ନମୁନାରେ ପ୍ରତିରୋଧ ଯାଞ୍ଚ ସମୟରେ କ୍ୟାନସର ହୋଇଥିବା ଜଣାପଡିଥିଲା । ତେବେ କୁକୁରର ମୃତ୍ୟୁ କୋରୋନା ପାଇଁ ହୋଇଛି ନା ନାହିଁ ତାହା ସ୍ପଷ୍ଟ ହୋଇନାହିଁ ।
କୃଷି ବିଭାଗ ଆମେରିକାର ଅନେକ ପ୍ରାଣୀଙ୍କ ଠାରେ କୋରୋନା ସଂକ୍ରମଣକୁ ନିଶ୍ଚିତ କରିଛି। ବର୍ତ୍ତମାନ ପର୍ଯ୍ୟନ୍ତ 12 କୁକୁର, 10 ବିଲେଇ, ବାଘ ଏବଂ ସିଂହ କୋଭିଡ -19 ରେ ପୀଡିତ ଥିବା ଜଣାପଡିଛି। ବିଭାଗ କହିଛି ଯେ ପଶୁମାନଙ୍କଠାରୁ କୋରୋନା ଭୂତାଣୁ ବିସ୍ତାର ହେବାର କୌଣସି ପ୍ରମାଣ ନାହିଁ, କିନ୍ତୁ ଦେଖାଯାଉଛି ଯେ କେତେକ କ୍ଷେତ୍ରରେ ଏହି ସଂକ୍ରମଣ ଲୋକଙ୍କଠାରୁ ପଶୁଙ୍କ ନିକଟରେ ବ୍ୟାପିପାରେ।
ବ୍ୟୁରୋ ରିପୋର୍ଟ,ଇଟିଭି ଭାରତ
