ଅମୃତସର: ସେଣ୍ଟ୍ରାଲ ଜେଲରୁ 3 ସଜା କାଟୁଥିବା ବନ୍ଦୀ ଫେରାର । କଡା ସୁରକ୍ଷା ବଳୟକୁ ଚକମା ଦେଇ ବିଳମ୍ବିତ ରାତ୍ରୀରେ ଅମୃତସର ସେଣ୍ଟ୍ରାଲ ଜେଲର ତିନି ଜଣ କଏଦୀ ମୁଖ୍ୟ କାରାଗାରରୁ ଚମ୍ପଟ ମାରିଛନ୍ତି । ଏହି ଘଟଣା ପରେ ଜେଲ୍ ପରିସରରେ ଚାଞ୍ଚଲ୍ୟ ଖେଳିଯାଇଛି । ଫେରାର କଏଦୀଙ୍କ ମଧ୍ୟରୁ ଜଣେ ଦୁଷ୍କର୍ମ ମାମଲାରେ ଓ ଅନ୍ୟ ଦୁଇଜଣ ଚୋରି ଅଭିଯୋଗରେ ସଜା କାଟୁଥିଲା । ପାଚେରୀ ଭାଙ୍ଗି ଜେଲରୁ ଫେରାର ହୋଇଛନ୍ତି ସେମାନେ ।
କଏଦୀ ଚମ୍ପଟ ମାରିବା ଖବର ରବିବାର ସକାଳେ ଜଣାପଡିଥିଲା । ଜେଲ୍ ରୁଟିନ ଅନୁସାରେ ସକାଳେ କଏଦୀଙ୍କ ଗଣିତ ସମୟରେ ତିନି କଏଦୀ କମ୍ ଥିବା ଜଣାପଡିଥିଲା । ଏହାପରେ ପୋଲିସ ଫେରାର କଏଦୀଙ୍କ ସନ୍ଧାନରେ ଏକ ବଡ ଧରଣର ଅପରେସନ ଜାରି ରଖିଛି ।
ଜେଲରୁ ଛୁ ମାରିଥିବା କଏଦୀ ଚିହ୍ନଟ ହୋଇଛନ୍ତି । ସେମାନେ ହେଲେ ଗୁରପ୍ରୀତ ସିଂହ, ଜରନୈଲ ସିଂହ ଓ ବିଶାଳ ଶର୍ମା । ଗୁରପ୍ରୀତ ଓ ଜରନୈଲ ଚୋରି ମାମଲାରେ ଜେଲରେ ବନ୍ଦ ଥିବା ବେଳେ ବିଶାଳ ଦୁଷ୍କର୍ମ ମାମଲାରେ ସଜା କାଟୁଥିଲା ।
ପ୍ରାଥମିକ ତଦନ୍ତରୁ ଏହି ତିନି କଏଦୀ ଜେଲ ପାଚେରୀ ଭାଙ୍ଗି ଫେରାର ହେବାରେ ସଫଳ ହୋଇଥିଲେ ବୋଲି ଜଣାପଡିଛି । ଏହି ଘଟଣା ପରେ ବରିଷ୍ଠ ପୋଲିସ ଅଧିକାରୀଙ୍କ କାନ୍ଧରେ ତଦନ୍ତ ଭାର ରହିଛି ।
