ହାଇଦ୍ରାବାଦ: ଇତିହାସ ରଚିଲେ ଭାରତୀୟ ବ୍ୟାଡମିଣ୍ଟନ ଖେଳାଳି । ଗତକାଲି (ମେ 15) ଦିନ ପ୍ରଥମ ଥର ପାଇଁ ବେଡ୍ମିଣ୍ଟନ୍ରେ ପ୍ରତିଷ୍ଠିତ ଟୁର୍ଣ୍ଣାମେଣ୍ଟ ଥୋମାସ କପ୍ ଜିତିଛି ଭାରତୀୟ ବେଡମିଣ୍ଟନ ଟିମ୍ । ଫାଇନାଲ ମ୍ୟାଚରେ 14 ଥର ଚାମ୍ପିୟନ ଇଣ୍ଡୋନେସିଆ ଦଳକୁ 3-0ରେ ପରାସ୍ତ କରି ଭାରତର ସ୍ୱପ୍ନକୁ ସାକାର କରିଛି । ଏହି ବିଜୟ ସହିତ ଭାରତ ପୁରୁଷ ବେଡ୍ମିଣ୍ଟନ ଟିମର ଡବଲ କୋଚ ମାଥିଆସ୍ ବଇ ଚର୍ଚ୍ଚାକୁ ଆସିଯାଇଛନ୍ତି । ଭାରତୀୟ ଟିମ୍ର ଏହି ସଫଳତା ପାଇଁ ବିଜେତା ଟିମ୍ ପାଇଁ ଏକ କୋଟି ଟଙ୍କାର ପୁରସ୍କାର ରାଶି ଘୋଷଣା କରିଛନ୍ତି କେନ୍ଦ୍ର କୀଡ଼ା ମନ୍ତ୍ରୀ ଅନୁରାଗ ଠାକୁର । ତେବେ କହି ରଖୁଛୁ ଯେ, ମାଥିଆସ୍ ବଇ ଜଣେ ପ୍ରଶିକ୍ଷକ ତଥା ବଲିଉଡ ଅଭିନେତ୍ରୀ ତାପସୀ ପନ୍ନୁଙ୍କ ପ୍ରେମିକ । ତେବେ ଟିମ୍ ଇଣ୍ଡିଆର ଏହି ଐତିହାସିକ ବିଜୟ ପାଇଁ ଟିମ୍କୁ ଶୁଭେଚ୍ଛା ଜଣାଇବା ସହିତ ତାଙ୍କ ବୟଫ୍ରେଣ୍ଡ ମାଥିଆସ୍ ବଇଙ୍କୁ ଶୁଭେଚ୍ଛା ଜଣାଇଛନ୍ତି ଅଭିନେତ୍ରୀ ତାପସୀ ପନ୍ନୁ ।
ତାପସୀ ପନ୍ନୁ ଟିମ୍ ଇଣ୍ଡିଆର ବିଜୟ ପାଇଁ ତାଙ୍କ ବୟଫ୍ରେଣ୍ଡ ମାଥିଆସ ବାଇଙ୍କୁ ପ୍ରଶଂସା କରି ସୋସିଆଲ୍ ମିଡିଆରେ ଏକ ସ୍ୱତନ୍ତ୍ର ବାର୍ତ୍ତା ମଧ୍ୟ ଲେଖିଛନ୍ତି । ସେ ଲେଖିଛନ୍ତି ''ମିଷ୍ଟର କୋଚ୍ ତୁମେ ଆମକୁ ଗର୍ବିତ କଲ ।'' ତାପସୀ ଆରମ୍ଭରୁ ଟୁର୍ନାମେଣ୍ଟ ଫଲୋ କରୁଥିଲେ ଏବଂ ଖେଳ ସମ୍ପର୍କରେ ଅପଡେଟ ସେୟାର କରୁଥିଲେ । ତାପସୀ ଟ୍ୱିଟରରେ ଭାରତର ବିଜୟ ଉପରେ ଏକ ଛୋଟ ଭିଡିଓ ସେୟାର କରିଛନ୍ତି । ଏହି ଭିଡିଓ ତାଙ୍କ ଘରର କୁହାଯାଉଥିଲା, ଯେତେବେଳେ ମ୍ୟାଚ୍ ଟିଭିରେ ଚାଲିଥିଲା ଏବଂ ଭାରତୀୟ ଦଳ ଉତ୍ସବ ପାଳନ କରୁଥିଲେ ।
ତାପସୀ ଏହି ଭିଡିଓର କ୍ୟାପସନରେ ଲେଖିଛନ୍ତି, 'ଇତିହାସ ରଚିଲା ଭାରତ, ଭାରତ ପ୍ରଥମ ଥର ପାଇଁ ଫାଇନାଲରେ ପହଞ୍ଚିବା ପରେ ଥୋମାସ କପ୍ ଜିତିଛି, ସାବାସ୍ ବୟ' । ମାଥିଆସ୍ ତାପସୀଙ୍କ ଟ୍ୱିଟ୍ ଉପରେ ପ୍ରତିକ୍ରିୟା ପ୍ରକାଶ କରିଛନ୍ତି ଏବଂ ପତାକା ସମେତ ଅନେକ ଇମୋଜି ସେୟାର କରିଛନ୍ତି । ଏହା ପରେ ତାପସୀ ମାଥିଆସଙ୍କୁ ଟ୍ୟାଗ୍ କରି ଲେଖିଥିଲେ, 'ମିଷ୍ଟର କୋଚ୍ ତୁମେ ବେଷ୍ଟ' । ଉଲ୍ଲେଖନୀୟ ଯେ, ତାପସୀ ଏବଂ ମାଥିଆସ୍ ଅନେକ ବର୍ଷ ଧରି ପରସ୍ପରକୁ ଡେଟ୍ କରୁଛନ୍ତି । ଏକ ଖେଳ ସମୟରେ ଦୁହିଁଙ୍କର ସାକ୍ଷାତ ହୋଇଥିଲା । ତାପସୀ କହିଥିଲେ ଯେ ସେ ଇଣ୍ଡଷ୍ଟ୍ରିର କାହାକୁ ଡେଟ୍ କରିବାକୁ ଚାହୁଁନାହାଁନ୍ତି । ସେ ନିଜର ବ୍ୟକ୍ତିଗତ ଏବଂ ବୃତ୍ତିଗତ ଜୀବନକୁ ଅଲଗା ରଖିବାକୁ ଚାହାଁନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
