ମୁମ୍ବାଇ: ବଲିଉଡ ସିଙ୍ଗର ସୋନୁ ନିଗମଙ୍କ ଲାଇଭ କନସର୍ଟ ପ୍ରୋଗ୍ରାମରେ ହଙ୍ଗମା । ସେଲଫି ଉଠାଇବାକୁ ନେଇ ସୋନୁଙ୍କୁ ଶିବସେନା ବିଧାୟକଙ୍କ ପୁଅ ଆକ୍ରମଣ କରିଥିବା ଅଭିଯୋଗ । ଷ୍ଟେଜ ତଳକୁ ଖସିପଡିଲେ ସୋନୁ ନିଗମ । ଏନେଇ ଥାନାରେ ପହଞ୍ଚି ଅଭିଯୋଗ ପରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ସୂଚନା ମିଳିଛି । ଏନେଇ ପୋଲିସ କହିଛି ଯେ, ଗତକାଲି ମୁମ୍ବାଇର ଚେମ୍ବୁର ଅଞ୍ଚଳରେ ସୋନୁ ନିଗମଙ୍କ ଲାଇଭ କନସର୍ଟ ପ୍ରୋଗ୍ରାମ ଚାଲିଥିଲା । ଏହି ସମୟରେ ଶିବସେନାର ଜଣେ ବିଧାୟକଙ୍କ ପୁଅ ସୋନୁଙ୍କ ସହ ସେଲଫି ଉଠାଇବାକୁ ଯାଇଥିବା ବେଳେ ବଚସା ଆରମ୍ଭ ହୋଇଥିଲା । ପୋଲିସ ଏନେଇ ଏକ ମାମଲା ପଞ୍ଜିକୃତ କରିଛି । ତେବେ ବର୍ତ୍ତମାନ ସୁଦ୍ଧା କାହାକୁ ଗିରଫ କରାଯାଇ ନାହିଁ।
ଏନେଇ ଗାୟକ ସୋନୁ ନିଗମ କହିଛନ୍ତି, ''ମୁଁ କନସର୍ଟ ପରେ ମଞ୍ଚରୁ ଓହ୍ଲାଉଥିବା ବେଳେ ସ୍ବପ୍ନିଲ ନାମକ ଜଣେ ବ୍ୟକ୍ତି ମୋତେ ଧରି ପକାଇଥିଲେ । ଏହି ସମୟରେ ମୋତେ ବଞ୍ଚାଇବାକୁ ଆସୁଥିବା ଅଙ୍ଗରକ୍ଷୀ ହରି ଏବଂ ରାବନୀଙ୍କୁ ଧକ୍କା ଦେଇଥିଲେ । ମୋତେ ମଧ୍ୟ ଧକ୍କା ଦେବାରୁ ମୁଁ ପାହାଚରେ ପଡିଯାଇଥିଲି । ମୋ ସହ ସେଲଫି ଉଠାଇବାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବାରୁ ମୁଁ ଥାନାରେ ଅଭିଯୋଗ କରିଛି । ''
ଏନେଇ ଶିବସେନା ନେତ୍ରୀ ପ୍ରିୟଙ୍କା ଚତୁର୍ବେଦୀ କହିଛନ୍ତି ଯେ, ସୋନୁ ନିଗମ ଷ୍ଟେଜ ତଳକୁ ଆସୁଥିବାବେଳେ ସ୍ଥାନୀୟ ବିଧାୟକଙ୍କ ପୁଅ ତାଙ୍କ ନିକଟକୁ ଯାଇଥିଲେ। ଏହି ସମୟରେ ସୋନୁଙ୍କ ଅଙ୍ଗରକ୍ଷୀ ତାଙ୍କ ପରିଚୟ ଜାଣି ନଥିବାରୁ ତାଙ୍କୁ ଅଟକାଇଥିଲେ । ପରେ ଅଙ୍ଗରକ୍ଷୀ ଏବଂ ବିଧାୟକଙ୍କ ପୁଅ ମଧ୍ୟରେ ସାମାନ୍ୟ ବଚସା ହୋଇଥିଲା, ଏହି କାରଣରୁ ଜଣେ କିମ୍ବା ଦୁଇ ଜଣ ମଞ୍ଚରୁ ଖସି ପଡିଥିଲେ । ଏହି ସମୟରେ ବିଏମସିର ପୂର୍ବତନ କର୍ପୋରେଟର ଥିବା ବିଧାୟକଙ୍କ ଝିଅ ଏଥିରେ ହସ୍ତକ୍ଷେପ କରି ତାଙ୍କୁ ଅଟକାଇ ଦେଇଥିଲେ । ଏହାପରେ ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେଣୁ ଏହା ଏକ ଆକ୍ରମଣ ନୁହେଁ ବୋଲି କହିଛନ୍ତି ଶିବସେନା ନେତ୍ରୀ । ''
ଏହି ଘଟଣାରେ ଜୋନ 6 ଡିସିପି ହେମରାଜ ସିଂ ରାଜପୁତ କହିଛନ୍ତି ଯେ, ଲାଇଭ୍ କନସର୍ଟ ପରେ ସୋନୁ ନିଗମ ମଞ୍ଚରୁ ଓହ୍ଲାଉଥିଲେ, ଏହି ସମୟରେ ଜଣେ ବ୍ୟକ୍ତି ତାଙ୍କୁ ଜାବୁଡି ଧରିଥିଲେ । ଏହାକୁ ବିରୋଧ କରିବାରୁ ସୋନୁ ନିଗମ ଏବଂ ତାଙ୍କ ସହ ଥିବା ଅନ୍ୟ ଦୁଇଜଣଙ୍କୁ ପାହାଚରୁ ଠେଲି ଦେଇଥିଲେ ବ୍ୟକ୍ତି ଜଣକ । ସେହି ଦୁଇ ଜଣଙ୍କ ମଧ୍ୟରୁ ଜଣେ ଆହତ ହୋଇଥିଲେ । ସୋନୁଙ୍କୁ ଧରିଥିବା ଯୁବକ ହେଉଛନ୍ତି ସ୍ବପ୍ନିଲ ଫଟେରପେକର । ଏହି ଘଟଣା ପରେ ସୋନୁ ନିଗମ ସୁରକ୍ଷିତ ଅଛନ୍ତି ।
