ହାଇଦ୍ରାବାଦ: ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲାକ୍ଷାଦ୍ବୀପ ଗସ୍ତ କରି ସେଠାକାର ରୋମାଞ୍ଚକର ଅନୁଭୂତି ସୋସିଆଲ ମିଡିଆରେ ସେୟାର କରିଥିଲେ । ଯାହାପରେ ମାଳଦ୍ବୀପର କିଛି ମନ୍ତ୍ରୀ ମୋଦିଙ୍କୁ କଟାକ୍ଷ କରିବା ସହ ଭାରତକୁ ନେଇ ବିବାଦୀୟ ମନ୍ତବ୍ୟ ଦେଇଥିଲେ । ଯାହା ପରେ ଏହି ବିବାଦ ଆରମ୍ଭ ହୋଇଥିଲା ଏବଂ ସୋସିଆଲ ମିଡିଆରେ ବୟକଟ ମାଳଦ୍ବୀପ ଟ୍ରେଣ୍ଡ ଜୋର ଧରିଛି । ଏଥିସହ ସାରା ଦେଶରେ ଓ ବିଶ୍ବରେ ଏବେ ଲାକ୍ଷାଦ୍ବୀପ ସୌନ୍ଦର୍ଯ୍ୟକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଅନେକ ସେଲିବ୍ରିଟି ମଧ୍ୟ ଲାକ୍ଷାଦ୍ବୀପକୁ ସମର୍ଥନ କରିବା ସହ ଭାରତୀୟ ଟ୍ୟୁରିଜିମ ଉପରେ ଗୁରୁତ୍ବାରୋପ କରିଥିଲେ । ଏହାରି ମଧ୍ୟରେ ବର୍ତ୍ତମାନ ଅନେକ ବଲିଉଡ ସେଲିବ୍ରିଟି ଟ୍ରୋଲର ଶିକାର ହୋଇଛନ୍ତି । ବଲିଉଡ ଅଭିନେତା ରଣଭୀର ସିଂ ଏବଂ ବିପାଶା ବାସୁ ଟ୍ରୋଲର ଶିକାର ହୋଇଛନ୍ତି । ଯାହା ପରେ ଉଭୟ ନିଜ ପୋଷ୍ଟ ସୋସିଆଲ ମିଡିଆରୁ ହଟାଇ ଦେଇଛନ୍ତି ।
ବଲିଉଡ ଅଭିନେତ୍ରୀ ବିପାଶା ବସୁ ନିକଟରେ ନିଜ ୪୪ତମ ଜନ୍ମଦିନ ପାଳନ କରିଥିଲେ । ସେ ସପରିବାର ସହ ମାଳଦ୍ବୀପରେ ଜନ୍ମଦିନକୁ ସେଲିବ୍ରେଟ କରିଥିଲେ । ଯାହାର ଫଟୋ ସେ ନିଜ ଇନଷ୍ଟାଗ୍ରାମରେ ମଧ୍ୟ ସେୟାର କରି ସେଠାକାର ସୌନ୍ଦଯ୍ୟକୁ ଉପଭୋଗ ମଧ୍ୟ କରୁଥିବାର ଝଲକ ଦେଖାଇଥିଲେ । ତେବେ ବର୍ତ୍ତମାନ ଏହାକୁ ନେଇ ଟ୍ରୋଲର ଶିକାର ହୋଇଛନ୍ତି ଅଭିନେତ୍ରୀ । ମାଳଦ୍ବୀପ- ଲାକ୍ଷାଦ୍ବୀପ ବିବାଦ ମଧ୍ୟରେ ଅଭିନେତ୍ରୀଙ୍କ ଏପରି ମାଳଦ୍ବୀପ ଭ୍ୟାକେସନ ନେଇ ୟୁଜର୍ସ ତାଙ୍କୁ ଟ୍ରୋଲ କରିଛନ୍ତି । ଆଉ କିଛି ୟୁଜର୍ସ ତାଙ୍କୁ ମାଳଦ୍ବୀପ ବଦଳରେ ଲାକ୍ଷାଦ୍ବୀପ ଯିବାକୁ ପରାମର୍ଶ ଦେଇଛନ୍ତି ।
ଜଣେ ୟୁଜର୍ସ ଲେଖିଛନ୍ତି, ଆପଣଙ୍କୁ ଜଣା ଥିବା ଦରକାର ଯେ, ଦେଶରେ କଣ ଚାଲିଛି । ଆଉ ଜଣେ ୟୁଜର୍ସ ଲେଖିଛନ୍ତି, ବୟକଟ ମାଳଦ୍ବୀପ । ଅନ୍ୟ ଜଣେ ଲେଖିଛନ୍ତି, ତୁମକୁ ଲାଜ ଲାଗିବା କଥା । ଆତ୍ମସମ୍ମାନ ପ୍ରଥମେ । ଆଉ ଜଣେ ଲେଖିଛନ୍ତି, ମାଳଦ୍ବୀପ ଛାଡ, ଲାକ୍ଷାଦ୍ବୀପ ଯାଅ । ଅନ୍ୟ ଜଣେ ଲେଖିଛନ୍ତି, ସମସ୍ତ ଭାରତୀୟ ଫିଲ୍ମ ଇଣ୍ଡଷ୍ଟ୍ରି ମାଳଦ୍ବୀପକୁ ବୟକଟ କରୁଛି ଆଉ ଆପଣ ମାଳଦ୍ବୀପକୁ ପ୍ରୋତ୍ସୋହିତ କରୁଛନ୍ତି । ଆପଣଙ୍କୁ ଲଜ୍ଜା । ଅନ୍ୟ ଜଣେ ଲେଖିଛନ୍ତି, ମାଳଦ୍ବୀପ ସରକାର ଆମକୁ ଅପମାନିତ କରିଛନ୍ତି ଏବଂ ଆପଣ ମାଳଦ୍ବୀପରେ ବୁଲୁଛନ୍ତି । ତେବେ ଟ୍ରୋଲ ପରେ ବିପାଶା ମଧ୍ୟ ଏହି ପୋଷ୍ଟକୁ ଡିଲିଟ କରିଛନ୍ତି ।
ଏହା ମଧ୍ୟ ପଢନ୍ତୁ: ଲାକ୍ଷାଦ୍ବୀପ ମାଳଦ୍ବୀପ ବିବାଦ ପ୍ରସଙ୍ଗ, ବିଗ ବି କହିଲେ ଆମ ଆତ୍ମନିର୍ଭରତାକୁ ପରୀକ୍ଷା କରନାହିଁ
ସେହିପରି ରଣଭୀର ସିଂ ନିକଟରେ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରିଥିଲେ । ସେ ଏକ ଫଟୋ ସେୟାର କରି ଲାକ୍ଷାଦ୍ବୀପକୁ ସମର୍ଥନ କରିଥିଲେ । ହେଲେ ସେହି ଫଟୋ ମାଳଦ୍ବୀପର ହୋଇଥିଲା । ଯାହାକୁ ନେଇ ସେ ଟ୍ରୋଲର ଶିକାର ହୋଇଥିଲେ । ଯାହ ପରେ ସେ ସେ ସେହି ପୋଷ୍ଟକୁ ସୋସିଆଲ ମିଡିଆରୁ ହଟାଇଥିଲେ । ସୂଚନା ଥାଉ କି, ବଲିଉଡରୁ ଟଲିଉଡ ଯାଏଁ ସମସ୍ତ ସେଲିବ୍ରିଟି ବୟକଟ ମାଳଦ୍ବୀପକୁ ସମର୍ଥନ କରିବା ସହ ଭାରତୀୟ ଟୁରିଜିମକୁ ଗୁରୁତ୍ବ ଦେଇଥିଲେ ।
