ଭୁବନେଶ୍ବର: ନୂଆବର୍ଷରେ ପରଦାକୁ ଆସୁଛି ଓଡ଼ିଆ ଫିଲ୍ମ ‘ମାମା ୱେଡ୍ସ ପାପା’ । ଫିଲ୍ମର ଟ୍ରେଲର ଭୁବନେଶ୍ବର ପ୍ରେସ କ୍ଲୁବଠାରେ ରିଲିଜ ହୋଇଯାଇଛି। ଶ୍ରୀହାନ ସିନେ କ୍ରିଏସନ ବ୍ୟାନରରେ ଚଳଚ୍ଚିତ୍ରଟି ପ୍ରସ୍ତୁତ ହୋଇଥିବା ବେଳେ ମୁଖ୍ୟ ଭୂମିକାରେ ଅଛନ୍ତି ଅଭିଷେକ, ବଙ୍ଗୀୟ ଅଭିନେତ୍ରୀ ରିତିଶା ଓ ଅଭିନେତ୍ରୀ ପ୍ରିୟଙ୍କା ପାଣିଗ୍ରାହୀ । ପ୍ରଯୋଜକ ଚନ୍ଦ୍ର ପ୍ରିୟ ସୁବୁଦ୍ଧି ରହିଥିବା ବେଳେ ଆପୁ କାନୁନଗୋଙ୍କ ନିର୍ଦ୍ଦେଶନାରେ ଚଳଚ୍ଚିତ୍ରଟି ପ୍ରସ୍ତୁତ ହୋଇଛି। ଏହି ଫିଲ୍ମ ଜାନୁଆରୀରେ ପ୍ରେକ୍ଷାଳୟରେ ରିଲିଜ ହେବ ।
ସାଧାରଣତଃ ବାପା ମାଆ ସେମାନଙ୍କ ପୁଅ ଝିଅଙ୍କର ବିବାହ କରାଇଥାନ୍ତି, ହେଲେ ଏଇ ଚଳଚ୍ଚିତ୍ରରେ ପିଲାମାନେ ମିଶି ବାପା ଓ ମାଆଙ୍କ ବିବାହ କରୁଥିବାର ଦେଖିବାକୁ ମିଳିବ। ହାସ୍ୟରସ, ପ୍ରେମ ବିରହ ଓ ରହସ୍ୟ ରୋମାଞ୍ଚରେ ଭରପୂର ଏହି କାହାଣୀ। ଏହି ଫିଲ୍ମରେ ପ୍ରମୁଖ ଭୂମିକାରେ ରହିଛନ୍ତି କୁନି କଳାକାର ମୁନି । ସେ ଅତି ସୁନ୍ଦର ଭାବରେ ନିଜର ଚରିତ୍ରକୁ ଏଥିରେ ନିଭାଇଥିବା ବେଳେ ବଲିଉଡ୍ ହାସ୍ୟ ଅଭିନେତା କ୍ରିଷ୍ଣା ଅଭିଷେକ ସିନେମାରେ ଟିକେ ତଡକା ଲଗାଇଛନ୍ତି ।
କୃଷ୍ଣ ଅଭିଷେକଙ୍କ ସହ ଜ୍ୟୋତି ମିଶ୍ର, ଦେବୁ ପଟ୍ଟନାୟକ ଓ ଗୁଡ୍ଡୁ ନିଖୁଣ ଅଭିନୟ କରିଛନ୍ତି । ଏହି ସିନେମାଟି ଜାନୁଆରୀରେ ରିଲିଜ ହେବାକୁ ଥିବା ବେଳେ ଏହାର ପୋଷ୍ଟର ଓ ଟ୍ରେଲର ରିଲିଜ ହୋଇଯାଇଛି । ତେବେ ତିନି ବର୍ଷର ପରିଶ୍ରମ ଓ ପ୍ରସ୍ତୁତି ପରେ ସିନେମାଟି ଆସୁଥିବାର ବିଶେଷ କରି ଏହାର କାହାଣୀକୁ ନେଇ ବେଶ ଆଶାବାଦୀ ଅଛି ପ୍ରଯୋଜକ ସଂସ୍ଥା । ତେଣୁ ଓଡ଼ିଆ ଦର୍ଶକ ଅନ୍ୟ ସିନେମା ଭଳି ଏହି ସିନେମାକୁ ବି ଭଲପାଇବା ଦେବା ସହ ହଲକୁ ଆସି ଦେଖନ୍ତୁ ବୋଲି କହିଛି ପ୍ରଯୋଜନା ସଂସ୍ଥା ।
ଇଟିଭି ଭାରତ, ଭୁବନେଶ୍ବର
