ନୂଆଦିଲ୍ଲୀ: ଶାହାରୁଖ ଖାନଙ୍କ ଆଗାମୀ ଫିଲ୍ମ 'ଜବାନ'ର କ୍ଲିପ ଲିକ ମାମଲା । ମାମାଲାର ଶୁଣାଣୀ କରି ରାୟ ଶୁଣାଇଲେ ଦିଲ୍ଲୀ ହାଇକୋର୍ଟ । ଶାହାରୁଖ ଖାନ ଏବଂ ତାଙ୍କ ପତ୍ନୀ ଗୌରୀ ଖାନଙ୍କ ପ୍ରଡକ୍ସନ୍ ହାଉସ୍ ରେଡ୍ ଚିଲିସ୍ ଏଣ୍ଟରଟେନମେଣ୍ଟ ପ୍ରାଇଭେଟ ଲିମିଟେଡ୍ ଏନେଇ ଦିଲ୍ଲୀ ହାଇକୋର୍ଟରେ ଏକ ମାମଲା ଦାୟର କରିଥିଲେ । ଏହାର ଶୁଣାଣି କରି ହାଇକୋର୍ଟ ସୋସିଆଲ ମିଡିଆ ପ୍ଲାଟଫର୍ମ, ୱେବସାଇଟ୍, କେବୁଲ ଟିଭି ଆଉଟଲେଟ୍ ଏବଂ ଅନ୍ୟାନ୍ୟ ପ୍ଲାଟଫର୍ମକୁ ଲିକ୍ ହୋଇଥିବା କ୍ଲିପ୍ ହଟାଇବାକୁ ନିର୍ଦ୍ଦେଶ ଦେଇଛନ୍ତି । ଏଥିସହ ସେମାନଙ୍କ ପ୍ରସାର ବନ୍ଦ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ।
ଗତକାଲି (ମଙ୍ଗଳବାର) ଦିନ ଜଷ୍ଟିସ୍ ସି ହରି ଶଙ୍କରଙ୍କ ନେତୃତ୍ବରେ ଦିଲ୍ଲୀ ହାଇକୋର୍ଟର ଏକ ବେଞ୍ଚ ୟୁଟ୍ୟୁବ୍, ଗୁଗୁଲ୍, ଟ୍ବିଟର ଏବଂ ରେଡ୍ଡିଟ୍ ଭଳି ସୋସିଆଲ ମିଡିଆ ସାଇଟକୁ ଫିଲ୍ମର କପିରାଇଟ୍ ଦୃଶ୍ୟକୁ ପ୍ରସାରକୁ ରୋକିବା ପାଇଁ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛି । ଏଥିସହ ଫିଲ୍ମ ଦେଖିବା କିମ୍ବା ଡାଉନଲୋଡ୍ କରିବା ପାଇଁ ଫିଲ୍ମର ଫୁଟେଜ୍ ଦେଖାଉଥିବା ୱେବସାଇଟରେ ପହଞ୍ଚିବା ଉପରେ ପ୍ରତିବନ୍ଧକ ଲଗାଇବାକୁ କୋର୍ଟ ଅନେକ ଇଣ୍ଟରନେଟ୍ ସେବା ପ୍ରଦାନକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଆବେଦନକାରୀଙ୍କ ଅନୁଯାୟୀ ଏହି ଫିଲ୍ମ ସହ ଜଡିତ ଦୁଇଟି ଭିଡିଓ ସୋସିଆଲ ମିଡିଆରେ ଲିକ୍ ହୋଇଛି । ଗୋଟିଏ ଶାହାରୁଖ ଖାନଙ୍କୁ ଆକ୍ସନ ସିନର ଦୃଶ୍ୟ ଦେଖିବାକୁ ମିଳିଛି ଏବଂ ଅନ୍ୟଟି ଡ୍ୟାନ୍ସର ଦୃଶ୍ୟ ଦେଖିବାକୁ ମିଳିଛି ।
କୋର୍ଟ ଆହୁରି ମଧ୍ୟ କହିଛନ୍ତି ଯେ, ଏହା ହେଉଛି ଆବେଦନକାରୀଙ୍କ (ରେଡ୍ ଚିଲିଜ୍) ମାମଲା ଯେ ଏହି ଲିକ୍ ହୋଇଥିବା ଭିଡିଓ କ୍ଲିପ୍ ଗୁଡିକ ଆବେଦନକାରୀଙ୍କ କପିରାଇଟ୍ ଅଧିକାରର ସ୍ପଷ୍ଟ ଉଲ୍ଲଘଂନ ବ୍ୟତୀତ ଅନ୍ୟ କିଛି ନୁହେଁ ଯାହା କ୍ଷତି ଘଟାଉଛି । ଲିକ୍ ହୋଇଥିବା ଭିଡିଓ କ୍ଲିପ୍ ଗୁଡିକ ମିଳିତ ଭାବରେ ଉକ୍ତ ଫିଲ୍ମର ଅଭିନେତାମାନଙ୍କ ଲୁକ ଏବଂ ସଙ୍ଗୀତ ମଧ୍ୟ ଦେଇଥାଏ । ଉଭୟେ ଫିଲ୍ମର ସାଧାରଣତଃ ଷ୍ଟ୍ରାଟେଜିକ୍ ପଏଣ୍ଟରେ ଖୁବ୍ ଶୀଘ୍ର ପ୍ରକାଶିତ ମାର୍କେଟିଂ କୌଶଳର ଏକ ଅଂଶ ଭାବରେ ପ୍ରକାଶ ପାଇଥାଏ ।"
ଏହି ମକଦ୍ଦମା ଅନୁଯାୟୀ ଦାବି କରାଯାଇଛି ଯେ ଷ୍ଟୁଡିଓରେ ପଛରେ ସୁଟ କରାଯାଇଥିଲା । ଏବଂ ଫିଲ୍ମର ସେଟରୁ ନିର୍ଦ୍ଦିଷ୍ଟ ଫଟୋ କିଛି ଲୋକ ଲିକ୍ କରିଛନ୍ତି । ଏହି ଆବେଦନରେ ଦର୍ଶାଯାଇଛି ଯେ ସୋସିଆଲ ମିଡିଆ ହ୍ୟାଣ୍ଡେଲ ଗୁଡିକ ବିଭିନ୍ନ ପ୍ଲାଟଫର୍ମରେ ଏହାକୁ ପୁନଃପ୍ରକାଶନ ଏବଂ ପ୍ରସାରଣ କରିବେ ବୋଲି ଆଶଙ୍କା କରାଯାଉଛି । ତେବେ ଲିକ୍ ହୋଇଥିବା ଭିଡିଓ କ୍ଲିପ୍ର ଏପରି ପ୍ରକାଶିତ ତଥା ପ୍ରସାରଣ ଦ୍ବାରା ଫିଲ୍ମର ପ୍ରଚାରକୁ ମଧ୍ୟ ବିପଦରେ ପକାଇବ । ତେବେ ଏନେଇ କୋର୍ଟର ଦ୍ବାରସ୍ଥ ହୋଇଥିଲେ ଆବେଦନକାରୀ । ଯାହାର ଶୁଣାଣି କରି କ୍ଲିପ ହଟାଇବାକୁ ସୋସିଆଲ ମିଡିଆ ପ୍ଲାଟଫର୍ମକୁ ନିର୍ଦ୍ଦେଶ ଦେଇଛନ୍ତି କୋର୍ଟ ।
