କୋଲକାତା: ଆଖି ବୁଝିଲେ ପୁଣି ଜଣେ ବଙ୍ଗୀୟ ଅଭିନେତ୍ରୀ । ୨୧ ବର୍ଷୀୟ ମଡେଲ ତଥା ଅଭିନେତ୍ରୀ ବିଦିଶା ଦେ ମଜୁମଦାର ନିଜ ଫ୍ଲାଟରେ ଆତ୍ମହତ୍ୟା କରିଛନ୍ତି। ବୁଧବାର ରାତିରେ ବିଦିଶାଙ୍କ ମୃତଦେହ ତାଙ୍କ ଫ୍ଲାଟରେ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା । ପୋଲିସ ଘଟଣାର ତଦନ୍ତ କରୁଛି । ବଙ୍ଗୀୟ ଅଭିନେତା ବିଦିଶାଙ୍କ ବିଷୟରେ କୁହାଯାଉଛି ଯେ ସେ ତାଙ୍କ ପ୍ରେମିକଙ୍କ ସହ ଫ୍ଲାଟରେ ରହୁଥିଲେ ।
ଜଣେ ପୋଲିସ ଅଧିକାରୀ କହିଛନ୍ତି ଯେ, ବିଦିଶା ଗତ ୪ ମାସ ହେଲା ନଗର ବଜାରରେ ଏକ ଭଡ଼ା ଘରେ ରହୁଥିଲେ । ବୁଧବାର ସନ୍ଧ୍ୟାରେ ଏହି ବାସଭବନରେ ବିଦିଶାଙ୍କ ମୃତଦେହ ଝୁଲୁଥିବା ଦେଖିବାକୁ ମିଳିଥିଲା । କବାଟ ତାଲା ଭାଙ୍ଗି ପୋଲିସ ଘର ଭିତରକୁ ପଶିଥିଲା ଏବଂ ପରେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଥିଲା । ମୃତଦେହ ନିକଟରେ ଏକ ସୁସାଇଡ ନୋଟ ମିଳିଥିଲା, କ୍ୟାନସରରେ ପୀଡ଼ିତ ହେବାରୁ ସେ ଏପରି ପଦକ୍ଷେପ ନେଉଥିବା ଉଲ୍ଲେଖ ଅଛି । ହେଲେ ଏହାକୁ ତାଙ୍କ ପରିବାର ଲୋକ ଓ ସାଙ୍ଗମାନେ ଗ୍ରହଣ କରିପାରୁ ନ ଥିବାବେଳେ ବିଦିଶା କ୍ୟାନସରରେ ଆକ୍ରାନ୍ତ ହେବା ସମ୍ପୂର୍ଣ୍ଣ ମିଥ୍ୟା ଖବର ବୋଲି କହିଛନ୍ତି ।
ପୋଲିସର ସୂଚନାନୁସାରେ, ବିଦିଶାଙ୍କର ଜଣେ ପ୍ରେମିକ ଅଛନ୍ତି ଯାହାଙ୍କ ନାମ ଅନୁଭବ ବେରା । ବିଦିଶାଙ୍କ ସାଙ୍ଗମାନେ ଦାବି କରିଛନ୍ତି ଯେ, ସେ ସଂପର୍କ ଯୋଗୁଁ ଅସନ୍ତୁଷ୍ଟ ଏବଂ ଡିପ୍ରେସନରେ ଥିଲେ । ଅଭିନେତ୍ରୀଙ୍କ ଫ୍ଲାଟରୁ ଏକ ଆତ୍ମହତ୍ୟା ନୋଟ ମିଳିଥିବା ଜଣାପଡିଛି ଏବଂ ଅଧିକ ତଦନ୍ତ ଚାଲିଛି। ତେବେ ଆତ୍ମହତ୍ୟା ପଛର କାରଣ କ’ଣ ତାହା ଉପରେ ଏବେବି ଲାଗି ରହିଛି ସସ୍ପେନ୍ସ । 2021 ମସିହାରେ, ବିଦିଶା ଦେ ମଜୁମଦାର ଅନିର୍ବେଦ ଚାଟୋପାଧ୍ୟାୟଙ୍କ କ୍ଷୁଦ୍ର ଚଳଚ୍ଚିତ୍ର ଭାର-ଦ କ୍ଲାଉନ୍ ସହିତ ଡେବ୍ୟୁ କରିଥିଲେ । ଏହି ଚଳଚ୍ଚିତ୍ରରେ ପ୍ରସିଦ୍ଧ ଅଭିନେତା ଦେବରାଜ ମୁଖାର୍ଜୀ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
