ହାଇଦ୍ରାବାଦ: ବଲିଉଡରେ ନିଜର ଛାପ ଛାଡିଥିବା ସୁନୀଲ ଶେଟ୍ଟୀଙ୍କ ଝିଅ ତଥା ଅଭିନେତ୍ରୀ ଆଥିଆ ଶେଟ୍ଟୀ ବହୁତ କମ୍ ଫିଲ୍ମରେ ଅଭିନୟ କରିଛନ୍ତି, ତଥାପି ସେ ସବୁବେଳେ ଚର୍ଚ୍ଚାରେ ଥାନ୍ତି । ଅଭିନେତ୍ରୀ ଚର୍ଚ୍ଚାରେ ରହିବାର କାରଣ ବୃତ୍ତିଗତ ନୁହେଁ ବରଂ ତାଙ୍କର ବ୍ୟକ୍ତିଗତ ଜୀବନ । ଆଥିଆ ଏବଂ ଭାରତୀୟ କ୍ରିକେଟ୍ ଦଳର ଖେଳାଳି କେ.ଏଲ୍ ରାହୁଲଙ୍କ ସମ୍ପର୍କ ସମସ୍ତଙ୍କୁ ଜଣା । ଉଭୟଙ୍କ ବିବାହ ଖବର ବର୍ତ୍ତମାନ ଲାଇମଲାଇଟରେ ରହିଛି । ବିଗତ ଅନେକ ବର୍ଷ ଧରି ପରସ୍ପରକୁ ଡେଟ୍ କରୁଥିବା କେ.ଏଲ୍ ରାହୁଲ ଏବଂ ଆଥିଆ ଶେଟ୍ଟୀଙ୍କ ପ୍ରଶଂସକଙ୍କ ପାଇଁ ଆଉ ଏକ ଖୁସି ଖବର ରହିଛି । ଆଜି ଦମ୍ପତିଙ୍କ ବିବାହ ତାରିଖ ସାମ୍ନାକୁ ଆସିଛି ।
ବର୍ଷ ବର୍ଷ ଧରି ପରସ୍ପର ସହ ସମ୍ପର୍କରେ ଥିବା ଆଥିଆ ଶେଟ୍ଟୀ ଏବଂ କେ.ଏଲ୍ ରାହୁଲଙ୍କ ପ୍ରେମ କାହାକୁ ଅଛପା ନାହିଁ । ଉଭୟ ପ୍ରାୟତଃ ପରସ୍ପର ଉପରେ ପ୍ରେମ ବର୍ଷା କରୁଥିବା ଦେଖାଯାଏ । ଦୀର୍ଘ ସମୟ ଧରି ଉଭୟଙ୍କ ବିବାହକୁ ନେଇ ବିଭିନ୍ନ କଳ୍ପନାଜଳ୍ପନା କରାଯାଉଛି। ସୁନୀଲ ଶେଟ୍ଟୀ ଏହା ମଧ୍ୟ କହିଛନ୍ତି ଯେ ତାଙ୍କ ଝିଅ ଏବଂ ରାହୁଲ ଶୀଘ୍ର ବିବାହ କରିବାକୁ ଯାଉଛନ୍ତି ଏବଂ କିଛି ଦିନ ପୂର୍ବରୁ ଖବର ଆସିଥିଲା ଯେ ଉଭୟ ନୂଆ ବର୍ଷ ଆରମ୍ଭରେ ଅର୍ଥାତ୍ ଜାନୁଆରୀ ମାସରେ ଉଭୟ ବିବାହ କରିବେ । ଏହି ଖବର ଶୁଣି ପ୍ରଶଂସକମାନେ ବହୁତ ଖୁସି ହୋଇଥିଲେ । କିନ୍ତୁ ବର୍ତ୍ତମାନ ପ୍ରକାଶ ପାଇଥିବା ରିପୋର୍ଟରେ ଉଭୟଙ୍କ ବିବାହ ତାରିଖ ମଧ୍ୟ ପ୍ରକାଶ ପାଇଛି।
ଏକ ମିଡିଆ ସଂଗଠନର ରିପୋର୍ଟ ଅନୁଯାୟୀ, କେ.ଏଲ୍ ରାହୁଲ ଏବଂ ଆଥିଆ ଶେଟ୍ଟୀଙ୍କ ବିବାହ ରୀତିନୀତି 2023 ଜାନୁୟାରୀ 21 ରୁ 23 ପର୍ଯ୍ୟନ୍ତ ଅନୁଷ୍ଠିତ ହେବ । ଏମାନଙ୍କ ବିବାହରେ ପରିବାର ସଦସ୍ୟ ଏବଂ ଘନିଷ୍ଠ ବନ୍ଧୁମାନେ ଯୋଗଦେବେ । କେ.ଏଲ୍ ରାହୁଲଙ୍କ ସହ ଜଡିତ ଏକ ସୂତ୍ରରୁ ପ୍ରକାଶ ଯେ ଡିସେମ୍ବର ଶେଷରେ ଉଭୟଙ୍କ ବିବାହ ନିମନ୍ତ୍ରଣ ପଠାଯିବ । ଏହି ରିପୋର୍ଟରେ ଏହା ମଧ୍ୟ କୁହାଯାଇଛି ଯେ 21 ତାରିଖରୁ ହଳଦୀ, ମେହେନ୍ଦି ଏବଂ ସଙ୍ଗୀତ କାର୍ଯ୍ୟକ୍ରମ ରଖାଯିବ । ଏହା ସହିତ କେଏଲ ରାହୁଲ ଏବଂ ଆଥିଆ ଦକ୍ଷିଣ ଭାରତୀୟ ରୀତିନୀତି ସହିତ ବିବାହ କରିବେ ବୋଲି ମଧ୍ୟ କୁହାଯାଇଛି । ତେବେ ଏପର୍ଯ୍ୟନ୍ତ ଏ ସମ୍ପର୍କରେ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ।
କେ.ଏଲ୍ ରାହୁଲ ଏବଂ ଆଥିଆ ଶେଟ୍ଟୀଙ୍କ ବିବାହ ପରେ ଏକ ଗ୍ରାଣ୍ଡ ରିସେପ୍ସନ୍ ଅନୁଷ୍ଠିତ ହେବ, ଯେଉଁଥିରେ ବଲିଉଡ ଏବଂ କ୍ରୀଡା ସହ ଜଡିତ ସମସ୍ତ ସେଲିବ୍ରିଟି ଏଥିରେ ସାମିଲ ହେବେ । କେ.ଏଲ୍ ରାହୁଲ ବିବାହ ପାଇଁ ବିସିସିଆଇରୁ ଛୁଟି ନେଇଛନ୍ତି । ବାସ୍ତବରେ ବାଂଲାଦେଶ ଟେଷ୍ଟ ସିରିଜ ପରେ କ୍ରିକେଟ୍ ଖେଳାଳି ବିରତି ମାଗିଛନ୍ତି । କିନ୍ତୁ ବିସିସିଆଇ ଜଣେ ସଦସ୍ୟ କହିଛନ୍ତି ଯେ ରାହୁଲ ବ୍ୟକ୍ତିଗତ କାରଣରୁ ଛୁଟି ମାଗିଛନ୍ତି ।
