ହାଇଦ୍ରାବାଦ: ରାମ ମନ୍ଦିର ପ୍ରାଣ ପ୍ରତିଷ୍ଠା ସମାରୋହ ପାଇଁ ସଜବାଜ ହୋଇଛି ଅଯୋଧ୍ୟା । ଏହି ଐତିହାସିକ ମୂହୁର୍ତ୍ତକୁ ସାରା ଦେଶ ଉତ୍ସାହର ସହ ଅପେକ୍ଷା କରି ରହିଛି ଏବଂ ଏଥିରେ ସାମିଲ ହେବା ପାଇଁ ରାଜନେତାଙ୍କ ଠାରୁ ଆରମ୍ଭ କରି ସେଲିବ୍ରିଟି ସମେତ ବହୁ ମାନଗଣ୍ୟ ବ୍ୟକ୍ତିଙ୍କୁ ନିମନ୍ତ୍ରଣ କରାଯାଇଛି । ଆସନ୍ତା ୨୨ରେ ପ୍ରଭୁ ଶ୍ରୀ ରାମଙ୍କ ପ୍ରାଣ ପ୍ରତିଷ୍ଠା ଉତ୍ସବ ଆୟୋଜିତ ହେବ । ତେବେ ଏଥିରେ ସାମିଲ ହେବାକୁ ରାମାୟଣ ଫେମ ତାରକା ଅରୁଣ ଗୋଭିଲ, ଦୀପିକା ଚିଖଲିଆ ଏବଂ ସୁନୀଲ ଲହରୀ ବର୍ତ୍ତମାନ ଅଯୋଧ୍ୟାରେ ପହଞ୍ଚିଛନ୍ତି । ଏହି ସମୟରେ ତାରକାମାନେ ଏହି ସମାରୋହରେ ସାମିଲ ହେବା ନେଇ ଖୁସିବ୍ୟକ୍ତ କରିଛନ୍ତି ।
ବାସ୍ତବରେ, ରାମାୟଣରେ ରାମ, ଲକ୍ଷ୍ମଣ ଏବଂ ସୀତା ଭୂମିକାରେ ଅଭିନୟ କରିଥିବା ଅଭିନେତା ଅରୁଣ ଗୋଭିଲ, ସୁନୀଲ ଲହରୀ ଏବଂ ଦୀପିକା ଚିଖଲିଆ 'ହମାରେ ରାମ ଆଏଙ୍ଗେ' ଏକ ଆଲବମ ଗୀତ ସୁଟିଂ ପାଇଁ ଅଯୋଧ୍ୟାରେ ପହଞ୍ଚିଛନ୍ତି । ଏଥିସହ ଏହି ତାରକାମାନେ ପ୍ରଭୁ ଶ୍ରୀ ରାମଙ୍କ ପ୍ରାଣ ପ୍ରତିଷ୍ଠା ଉତ୍ସବରେ ମଧ୍ୟ ସାମିଲ ହେବେ । ଏହି ସମୟରେ ତାରକାମାନେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ।
ଅରୁଣ ଗୋଭିଲ କହିଛନ୍ତି ଯେ, ଅଯୋଧ୍ୟାର ରାମ ମନ୍ଦିର ଆମର ରାଷ୍ଟ୍ର ମନ୍ଦିର ରୂପେ ବିବେଚିତ ହେବ । ଗତ କିଛି ବର୍ଷରେ ସାରା ଦୁନିଆରେ ସଂସ୍କୃତି ଦୁର୍ବଳ ହୋଇଯାଇଥିଲା । ତେବେ ଏହି ମନ୍ଦିର ପୁଣି ଏକ ବାର୍ତ୍ତା ଦେବ, ଯାହା ଆମର ସଂସ୍କୃତିକୁ ମଜବୁତ କରିବ । ଏହି ମନ୍ଦିର ଆସ୍ଥାର କେନ୍ଦ୍ର ଅଟେ । ଏହା ଆମର ଗୌରବ ହେବ ଏବଂ ଆମର ପରିଚୟ ହେବ । ରାମ ମନ୍ଦିର ପ୍ରାଣ ପ୍ରତିଷ୍ଠା ମଧ୍ୟ ଏପରି ହେବ ଅନ୍ଦାଜ ନଥିଲା । ସାରା ଦେଶବାସୀ ପ୍ରଭୁ ଶ୍ରୀ-ରାମଙ୍କ ଜପୁଛନ୍ତି । ମୁଁ ଏହି ମୁହୂର୍ତ୍ତକୁ ଲାଇଭ ଦେଖିବାକୁ ସୁଯୋଗ ପାଇଥିବା ନେଇ ବହୁତ ଖୁସି ।
ସେହିପରି ଦୀପିକା କହିଛନ୍ତି, 'ଆମର ଭାବମୂର୍ତ୍ତି ଲୋକଙ୍କ ହୃଦୟରେ ସ୍ଥିର ହୋଇଛି, ରାମ ମନ୍ଦିର ନିର୍ମାଣ ପରେ ମଧ୍ୟ ଏଥିରେ କୌଣସି ପରିବର୍ତ୍ତନ ହେବ ନାହିଁ, ରାମ ଲାଲାଙ୍କ ପ୍ରାଣ ପ୍ରତିଷ୍ଠା ହେଉଛି, ଲୋକମାନେ ବହୁତ ଭଲପାଇବା ଦେଇଛନ୍ତି । ସେପଟେ ସୁନୀଲ ଲହରୀ କହିଛନ୍ତି, 'ମୁଁ ବହୁତ ଭାଗ୍ୟବାନ ଯେ ମୁଁ ପ୍ରଭୁଙ୍କ ପ୍ରାଣ ପ୍ରତିଷ୍ଠା ଉତ୍ସବରେ ଯୋଗ ଦେବାର ସୁଯୋଗ ପାଇଛି । ଦେଶରେ ସୃଷ୍ଟି ହୋଇଥିବା ପରିବେଶ ଅତ୍ୟନ୍ତ ଧାର୍ମିକ ଏବଂ ଅତ୍ୟନ୍ତ ସକରାତ୍ମକ ଏବଂ ଏହା ବିଶ୍ବକୁ ଏକ ସକରାତ୍ମକ ଭାବନା ଦେଉଛି ।'
ଏହା ମଧ୍ୟ ପଢନ୍ତୁ: ରାମ ମନ୍ଦିର ପ୍ରତିଷ୍ଠା ଦିବସରେ ସାମିଲ ହେବେ ଏହି ସେଲିବ୍ରିଟି, ପଠାଯାଇଛି ନିମନ୍ତ୍ରଣ
କହିରଖୁଛୁ କି, ଏହି ତାରକାମାନେ 'ହମାରେ ରାମ ଆଏଙ୍ଗେ' ଆଲବମ ସୁଟିଂ କରିବେ । ଏହି ଗୀତକୁ ବଲିଉଡ ଲୋକପ୍ରିୟ ଗାୟକ ସୋନୁ ନିଗମ ଗାଇଛନ୍ତି । ଗୀତଟି ଅଯୋଧ୍ୟାର ଗୁପ୍ତାର ଘାଟ, ହନୁମାନଗଢି ଏବଂ ଲତା ଚୌକରେ ଏହାର ସୁଟିଂ ହେଉଛି । ଏଥିସହ ଏମାନେ ରାମ ମନ୍ଦିର ପ୍ରାଣ ପ୍ରତିଷ୍ଠାରେ ବି ସାମିଲ ହେବେ ।
