ମୁମ୍ବାଇ: ବମ୍ବେ ହାଇକୋର୍ଟରୁ ଜଣାଶୁଣା ଗାୟକ ମିକା ସିଂଙ୍କୁ ଏକ ବଡ଼ ଆଶ୍ବସ୍ତି ମିଳିଛି । 2006ର ରାକ୍ଷୀ ସାୱନ୍ତ ବିବାଦ ମାମଲା ନେଇ କୋର୍ଟ ଗୁରୁତ୍ବପୂର୍ଣ୍ଣ ରାୟ ଦେଇଛନ୍ତି । ମିକା ସିଂଙ୍କ ବିରୋଧରେ ଦାଖଲ ହୋଇଥିବା ଏଫ୍ଆଇଆରକୁ ରଦ୍ଦ କରିଛନ୍ତି । 17 ବର୍ଷ ପୁରୁଣା ମାମଲାକୁ ଖାରଜ କରି କୋର୍ଟ କହିଛନ୍ତି ଯେ ମିକା ସିଂ ଏବଂ ରାକ୍ଷୀ ଏହି ସମସ୍ୟାର ସମାଧାନ କରିଛନ୍ତି ।
ମିକା ସିଂ କିଛି ମାସ ପୂର୍ବରୁ ହାଇକୋର୍ଟଙ୍କୁ ଆବେଦନ କରିଥିଲେ ଯେ ତାଙ୍କ ବିରୋଧରେ ଦାଖଲ ହୋଇଥିବା ଏଫ୍ଆଇଆର୍ ଏବଂ ଚାର୍ଜସିଟ୍ ରଦ୍ଦ କରାଯାଉ । ତେବେ ଗତକାଲି(ଗୁରୁବାର) ଜଷ୍ଟିସ୍ ଏ ଏସ୍ ଗଡକରୀ ଏବଂ ଏସ୍ ଜି ଦିଗେଙ୍କ ଏକ ଡିଭିଜନ୍ ବେଞ୍ଚ ଶୁଣାଣି କରିଥିଲେ । ରାକ୍ଷୀ ସାୱନ୍ତଙ୍କ ଦ୍ବାରା ଦାଖଲ ହୋଇଥିବା ଏକ ଆଫିଡେଭିଟ୍କୁ ବିଚାରକୁ ନେବା ପରେ ମାମଲାରେ ଦାଖଲ ହୋଇଥିବା ଏଫ୍ଆଇଆର୍ ଏବଂ ଚାର୍ଜସିଟ୍କୁ ଖାରଜ କରିଥିଲେ । ସେ ଏବଂ ମିକା ଏହି ସମସ୍ୟାର ସମାଧାନ କରିଛନ୍ତି ବୋଲି କହିଥିଲେ ।
ସୂଚନା ଥାଉ କି, 11 ଜୁନ୍ 2006ରେ ରାକ୍ଷୀ କଣ୍ଠଶିଳ୍ପୀଙ୍କ ବିରୋଧରେ ମାମଲା ଦାୟର କରିଥିଲେ । ସେ ଅଭିନେତ୍ରୀଙ୍କୁ ଜବରଦସ୍ତ କିସ ଦେଇଥିବା ଅଭିଯୋଗ ହୋଇଥିଲା । ଏହି ଘଟଣା ମିକା ସିଂଙ୍କ ଜନ୍ମଦିନ ଅବସରର ବୋଲି କୁହାଯାଉଛି । ଅଭିଯୋଗ ହୋଇଥିଲା ଯେ ମିକା ତାଙ୍କ ଜନ୍ମଦିନରେ ଏକ ରେସ୍ତୋରାଁରେ ଆୟୋଜିତ ଏକ ପାର୍ଟିରେ ରାକ୍ଷୀ ସାୱନ୍ତଙ୍କୁ ଜବରଦସ୍ତ ଚୁମ୍ବନ ଦେଇଥିଲେ । ମୁମ୍ବାଇର ଓସିୱାରା ପୋଲିସ ଷ୍ଟେସନରେ ଜୁନ୍ 11, 2006ରେ ଏକ ଅଭିଯୋଗ ହୋଇଥିଲା । ମିକାଙ୍କ ଉପରେ ଆଇପିସି ଧାରା 354 (ନିର୍ଯାତନା) ଏବଂ 323 (ଆକ୍ରମଣ) ଅଧୀନରେ ମାମଲା ରୁଜୁ କରାଯାଇଥିଲା।
ମିକା ସିଂ ଫିଲ୍ମ ଇଣ୍ଡଷ୍ଟ୍ରିର ଜଣେ ପ୍ରସିଦ୍ଧ ଲୋକପ୍ରିୟ ଗାୟକ ଅଟନ୍ତି । ସେ ଅନେକ ହିଟ୍ ଗୀତରେ ନିଜର ସ୍ୱର ଦେଇଛନ୍ତି। ତାଙ୍କର ଗୀତ ଗୁଡ଼ିକ ନୂଆ ପିଢିଙ୍କ ମଧ୍ୟରେ ବେଶ୍ ଲୋକପ୍ରିୟ ହୋଇଥାଏ । ସେପଟେ ରାକ୍ଷୀ ସାୱନ୍ତ ଏପରି ଜଣେ ଅଭିନେତ୍ରୀ ଯିଏ ସୋସିଆଲ ମିଡିଆରେ ସବୁବେଳେ ଚର୍ଚ୍ଚାରେ ଥାନ୍ତି । କିଛି ମାସ ଧରି ସେ ତାଙ୍କ ବ୍ୟକ୍ତିଗତ ଜୀବନ ବିଷୟରେ ବେଶ ଆଲୋଚନାରେ ରହିଛନ୍ତି । ସେ ଆଦିଲ ଖାନ ନାମକ ଜଣେ ବ୍ୟକ୍ତିଙ୍କୁ ବିବାହ କରିଥିଲେ । କିନ୍ତୁ ସେମାନଙ୍କ ସମ୍ପର୍କ ଅଧିକ ଦିନ ରହିଲା ନାହିଁ । ରାକ୍ଷୀ ଆଦିଲଙ୍କ ଉପରେ ପ୍ରତାରଣା ଏବଂ ଘରୋଇ ହିଂସା ଭଳି ଅଭିଯୋଗ କରିଛନ୍ତି, ଏହା ପରେ ଆଦିଲଙ୍କୁ ଜେଲ ଯିବାକୁ ପଡିଲା ।
ସୋସିଆଲ ମିଡିଆରେ ରାକ୍ଷୀଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି । ଏହି ଭିଡିଓରେ ରାକ୍ଷୀ ନାଚୁଥିବାର ନଜର ଆସିଛନ୍ତି ଏବଂ କହିଛନ୍ତି ଯେ ଜଜ ମୋତେ ଶୀଘ୍ର ଛାଡପତ୍ର କରାଇ ଦିଅନ୍ତୁ । ଜଜଙ୍କ ଆଗରେ ନାଚିବି । ଡ୍ରାମା ରାଣୀ ପ୍ୟାପ୍ସ ଆଗରେ ଡ୍ୟାନ୍ସ କରି ଏହି କଥା କହୁଥିବାର ଦେଖିବାକୁ ମିଳିଛି । ସେପଟେ ଆଉ ଏକ ଭିଡିଓରେ ସେ ନିଜକୁ ତୁୱାନ ବୋଲି ମଧ୍ୟ କହିଛନ୍ତି ।
