ବୌଦ୍ଧ: ସରିଲା ଦ୍ବିତୀୟ ପର୍ଯ୍ୟାୟରେ ସାଧାରଣ ନିର୍ବାଚନ। ଆଉ ଏହାପରେ କନ୍ଧମାଳ ଲୋକସଭା ଅନ୍ତର୍ଗତ ବୌଦ୍ଧ ଜିଲ୍ଲାର ଦୁଇ ନିର୍ବାଚନ ମଣ୍ଡଳୀର ୧୨ ଜଣ ପ୍ରାର୍ଥୀଙ୍କ ଭାଗ୍ୟ ସିଲ ହୋଇଛି ଇଭିଏମରେ। ଗୁରୁବାର ଦିନ ୮୫ ନମ୍ବର କଣ୍ଟାମାଳ ଆସନ ଓ ୮୬ ନମ୍ବର ବୌଦ୍ଧ ଆସନ ନିମନ୍ତେ ଉତ୍ସାହର ସହ ମତଦାନ ହୋଇଥିଲା ।
ପ୍ରଶାସନର ସୂଚନା ଅନୁସାରେ, ୭୦ ପ୍ରତିଶତରୁ ଅଧିକ ମତଦାନ ହେବା ଅନୁମାନ କରାଯାଇଛି। ତେବେ ସନ୍ଧ୍ୟା ପରେ ବିଭିନ୍ନ ସ୍ଥାନରୁ ପୋଲିଂ ଅଧିକାରୀ ଓ କର୍ମଚାରୀ ସିଲ ଇଭିଏମ ତଥା ଭିଭିପ୍ୟାଟ ଧରି ଫେରିବା ଆରମ୍ଭ କରିଥିଲେ। ଏହି ପ୍ରକ୍ରିୟା ସାରା ରାତି ଚାଲିଥିଲା।
ଦୁଇ ନିର୍ବାଚନ ମଣ୍ଡଳୀରେ ୪୧୧ ଗୋଟି ବୁଥ ରହିଥିବା ବେଳେ ସମୁଦାୟ ୨୭୧୨ ଜଣ ସରକାରୀ କର୍ମଚାରୀ ବୌଦ୍ଧ ଓ କଣ୍ଟାମାଳ ଆସନରେ ଥିବା ସମସ୍ତ ବୁଥକୁ ପରିଚାଳନା କରିଥିଲେ। ଶୁକ୍ରବାର ସକାଳ ସାତଟାରୁ ମତଦାନ ଆରମ୍ଭ ହୋଇଥିଲେ ମଧ୍ୟ ଇଭିଏମ ଅଚଳ ଯୋଗୁଁ ଦୁଇ ନିର୍ବାଚନ ମଣ୍ଡଳୀର ପଚାଶରୁ ଉର୍ଦ୍ଧ୍ବ ମତଦାନ କେନ୍ଦ୍ରରେ ବିଳମ୍ବରେ ମତଦାନ ହୋଇଥିଲା। ସେହିପରି ମାଓ ଅଧ୍ୟୁଷିତ ଶଗଡା,ତଳଗାଁ, କୁଶଙ୍ଗ, ମହାଲିକପଡା, ଆଢେଣୀଗଡ ଓ ହରଭଙ୍ଗା ବ୍ଲକର ଅନ୍ୟ କେତେକ ସ୍ଥାନରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିଲା ।
ମତଦାନ କେନ୍ଦ୍ରରୁ ଆସିଥିବା ସମସ୍ତ ସିଲ ଇଭିଏମ ଗୁଡିକ ବୌଦ୍ଧ ପଞ୍ଚାୟତ ମହାବିଦ୍ୟାଳୟରେ ଚବିଶ ଘଣ୍ଟା କଡା ପହରା ମଧ୍ୟରେ ଦୁଇ ପୃଥକ କଠୋରୀରେ ରଖାଯାଇଛି।
ଏଠାରେ ସୂଚନାଯୋଗ୍ୟ, ଛୋଟ ମୋଟ ଘଟଣାକୁ ଛାଡିଦେଲେ ବୌଦ୍ଧ ଜିଲ୍ଲାର ଉଭୟ ନିର୍ବାଚନ ମଣ୍ଡଳୀରେ ମତଦାନ ଶାନ୍ତିପୂର୍ଣ୍ଣ ହୋଇଥିଲା।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
