ନିଆଳି: ଉଗ୍ର ହେଉଛି ଜମି ବାଡ଼ି ବିବାଦ । ସମ୍ପତ୍ତି ପାଇଁ ଫିକା ପଡୁଛି ରକ୍ତ ସମ୍ପର୍କ । ମାହାଙ୍ଗା ପରେ ଏବେ ନିଆଳିରେ ଗଡିଲା ମୁଣ୍ଡ । ଜମିବାଡି ବିବାଦକୁ ନେଇ ଭାଇକୁ ଭୁଜାଲିରେ ଆକ୍ରମଣକରି ହତ୍ୟା କଲା ଭାଇ । ଏଭଳି ଘଟଣା ଘଟିଛି ନିଆଳି ଥାନା ଟୋଲା ଗାଁରେ । ମୃତକ ଜଣଙ୍କ ହେଉଛନ୍ତି ଅର୍ଜୁନ ସାହୁ ।
ସୂଚନାନୁଯାୟୀ, ଟୋଲା ଗାଁର ଅର୍ଜୁନ ସାହୁ ଓ ନୃସିଂହ ସାହୁ ଦୁଇ ଭାଇଙ୍କ ମଧ୍ୟରେ ପୂର୍ବରୁ ଜମିବାଡି ବିବାଦ ଲାଗି ରହିଥିଲା । ଗତକାଲି ଅପରାହ୍ନରେ ଦୁଇ ଭାଇଙ୍କ ମଧ୍ୟରେ ଧାରୁଆ ଅସ୍ତ୍ରରେ ଆକ୍ରମଣ ଓ ପ୍ରତିଆକ୍ରମଣ ହୋଇଥିଲା । ଫଳରେ ନୃସିଂହଙ୍କ ଛୁରାମାଡ କରିବାରୁ ଅର୍ଜୁନଙ୍କୁ ଗୁରୁତର ଅବସ୍ଥାରେ ପ୍ରଥମେ ନିଆଳି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ପରେ କଟକ ଏସସିବି ମେଡିକାଲ ସ୍ଥାନାନ୍ତରିତ କରାଯାଇଥିଲା । ଗତକାଲି ବିଳମ୍ବିତ ରାତିରେ ଅର୍ଜୁନଙ୍କ ମୃତ୍ୟୁ ହୋଇଥିବା ସୂଚନା ମିଳିଛି ।
ଏହା ମଧ୍ୟ ପଢନ୍ତୁ :-କଟକରେ ଚାଞ୍ଚଲ୍ୟ: ବଡଭାଇ ପରିବାରକୁ ନିପାତ କରିଦେଲା ସାନଭାଇ
ସେହିପରି ନୃସିଂହଙ୍କ ଗୋଡ, ହାତ ଓ ମୁଣ୍ଡରେ ଗୁରୁତର ଆଘାତ ଲାଗିଥିବାରୁ ଏସସିବି ମେଡିକାଲ ଚିକିତ୍ସା ହେଉଛନ୍ତି, ତାଙ୍କ ଅବସ୍ଥା ମଧ୍ୟ ସଙ୍କଟାପନ୍ନ ରହିଛି । ଉଭୟ ପରିବାରଙ୍କ ପକ୍ଷରୁ ନିଆଳି ଥାନାରେ କୌଣସି ଏତଲା ଦିଆଯାଇନଥିବା ସୂଚନା ମିଳିଛି । ତେବେ ଗତ ସପ୍ତାହରେ କଟକ ମାହାଙ୍ଗାରେ ଜମିବାଡି ବିବାଦକୁ ନେଇ ସାନ ଭାଇ ବଡ ଭାଇ ପରିବାରର ୫ଜଣଙ୍କୁ ଅତି ନିର୍ମମ ଭାବେ ହତ୍ୟା କରିଥିଲା ।
ନିଆଳିରୁ ଉମେଶଚନ୍ଦ୍ର ମଲ୍ଲିକ, ଇଟିଭି ଭାରତ
