ସମ୍ବଲପୁର : ଶୁଣିଲାନି ଜିଲ୍ଲା ପ୍ରଶାସନ । ପ୍ରଶାସନ ପାଖକୁ ଦୌଡ଼ି ଦୌଡ଼ି କୌଣସି ଫଳ ମିଳିଲାନି । ଶେଷରେ ଗ୍ରାମବାସୀ ନିଜ ପାଇଁ ନିଜେ ନିର୍ମାଣ କଲେ କାଠ ପୋଲ। ଶେଷରେ ହୋଇପାରିଲା ଯାତାୟତରେ ସୁବିଧା । ଏଭଳି ଦୃଶ୍ୟ ଦେଖିବାକୁ ମିଳିଛି ସମ୍ବଲପୁର ଜିଲ୍ଲା ରେଢ଼ାଖୋଲ ଉପଖଣ୍ଡ ନାକଟିଦେଉଳ ବ୍ଲକର ବଲମ ପଞ୍ଚାୟତରେ ।
ସୂଚନା ଅନୁଯାୟୀ ନାକଟିଦେଉଳ ବ୍ଲକର ବଲମ ପଞ୍ଚାୟତରେ ଯାତାୟତ ପାଇଁ ଭଲ ରାସ୍ତା ନଥିଲା । ଫଳରେ ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହେଉଥିଲେ । କେବଳ ଯିବାଆସିବା ପାଇଁ ଥିଲା ଏକ ନାଳ । ନାଳ ଉପରେ ବ୍ରିଜ ନଥିବାରୁ ବଲମ ଗ୍ରାମପଞ୍ଚାୟତର କାର୍ଯ୍ୟାଳୟ ତଥା ନାକଟିଦେଉଳ ବ୍ଲକ କାର୍ଯ୍ୟାଳୟକୁ ଆସିବାକୁ ଆଖପାଖ 6ଟି ଗାଁର ଲୋକଙ୍କୁ 30 କିମିର ରାସ୍ତା ଅଧିକ ବୁଲିକି ଯିବାକୁ ପଡିଥାଏ । ଏପରିକି କାହାର ସ୍ବାସ୍ଥ୍ୟ ଖରାପ ହେଲେ ରୋଗୀକୁ କାନ୍ଧରେ ବୋହି ନେବାକୁ ପଡ଼ିଥାଏ । ବିଭିନ୍ନ ସମୟରେ ଗାଁ ନାଳ ପାର ହୋଇ ଯିବା ଆସିବା କରିଥାନ୍ତି । ହେଲେ ସାମାନ୍ୟ ବର୍ଷା ହେଲେ ଏଠାରେ ଯାତାୟତ ଏକ ପ୍ରକାରର ଠପ୍ ହୋଇଯାଏ । ଫଳରେ ଗ୍ରାମବାସୀ 30 କିମିର ରାସ୍ତା ବୁଲିକି ଯିବାଆସିବା କରିଥାନ୍ତି ।
ଏହି ଅସୁବିଧା ଲାଗି ରହିଥିବାରୁ ସ୍ଥାୟୀ ସାମାଧାନ ପାଇଁ ଗ୍ରାମବାସୀ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ । ସବୁଦିନିଆ ରାସ୍ତା ଖଣ୍ଡିଏ ପାଇଁ ଗ୍ରାମବାସୀ ବାରମ୍ବାର ପ୍ରଶାସନ ନିକଟରେ ଗୁହାରି କରିଥିଲେ ହେଲେ ଜିଲ୍ଲା ପ୍ରଶାସନ କର୍ଣ୍ଣପାତ କଲାନାହିଁ । ତେଣୁ ଗ୍ରାମବାସୀ ଏକତ୍ରିତ ହୋଇ ଏକ କାଠ ପୋଲ ନିର୍ମାଣ କଲେ । ସମ୍ବଲପୁର ଜିଲ୍ଲା ରେଢ଼ାଖୋଲ ଉପଖଣ୍ଡ ନାକଟିଦେଉଳ ବ୍ଲକର ବଲମ ପଞ୍ଚାୟତର ଧଳତଇଲା, ଡିମିରିକୁଦା, ରଞ୍ଜା, ଗଞ୍ଜାବହାଲ, ବେତଝରଣ ଅଞ୍ଚଳର ଲୋକେ ଏକାଠି ହୋଇଥିଲେ । ବେତଝରଣ ଗାଁ ନାଳ ଉପରେ ନିର୍ମାଣ କଲେ କାଠ ପୋଲ । ପଞ୍ଚାୟତବାସୀ ଏବେ ନିଜ ଯିବା ଆସିବାର ବ୍ୟବସ୍ଥା ନିଜେ କରିଛନ୍ତି । ଆଉ କାହା ଉପରେ ତାଙ୍କୁ ନିର୍ଭର କରିବାକୁ ପଡ଼ିବନି ବୋଲି କହିଛନ୍ତି ଗ୍ରାମବାସୀ ।
ସରକାର ବିଭିନ୍ନ ଯୋଜନାରେ ସମସ୍ତ ଗାଁ ଓ ସାହିକୁ ଯାତାୟତ ପାଇଁ ରାସ୍ତାଘାଟ ପୋଲ ଆଦି ନିର୍ମାଣ କରୁଛନ୍ତି । ହେଲେ ସରକାରଙ୍କ ଦୃଷ୍ଟି ଆଢୁଅଳରେ ରହି ଯାଇଥିବା ଏହି ପଞ୍ଚାୟତର ପୋଲ କାମକୁ ଗ୍ରାମବାସୀ ନିଜ ଉଦ୍ୟମରେ ସମାଧାନ କରି ନିଆରା ଢଙ୍ଗରେ ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି ।
ଇଟିଭି ଭାରତ, ସମ୍ବଲପୁର
