ସମ୍ବଲପୁର: ଜିଲ୍ଲାର କୁଚିଣ୍ଡା ଉପଖଣ୍ଡର ଲପଡା ଗାଁର ଟ୍ରିପଲ ମର୍ଡର ଘଟଣାରେ ଦୁଇ ଅଭିଯୁକ୍ତଙ୍କୁ ଗିରଫ କରିଛି ମହୁଲପାଲି ପୋଲିସ। ଅଭିଯୁକ୍ତ ମାନେ ହେଲେ ବାପା ନବୀନ ଦେହୁରୀ ଓ ପୁଅ ମଣ୍ଟୁ। ଏନେଇ ସମ୍ବଲପୁର ପୋଲିସ ବିଭାଗ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ ଯେ, ବୁଧବାର ଅପରାହ୍ନ ପ୍ରାୟ ୩ ଟା ସମୟରେ ଲପଡା ଗାଁର ଗୋଟିଏ ପରିବାରର ତିନି ଜଣଙ୍କୁ ଏହି ଦୁଇ ଅଭିଯୁକ୍ତ ହାଣି ହତ୍ୟା କରିଥିଲେ। ତେବେ ପୂର୍ବରୁ ଦୀର୍ଘ ଦିନ ଧରି ଜମି ବିବାଦକୁ କେନ୍ଦ୍ର କରି ଉଭୟ ପରିବାର ମଧ୍ୟରେ ଝଗଡା ଚାଲିଥିଲା ।
ମୄତକ ମାନେ ହେଲେ ଶାଶୁ ପିରୁବତି ବେହେରା, ଜ୍ବାଇଁ ଗିରିଧାରୀ ସାହୁ ଓ ଝିଅ ସାବିତ୍ରୀ ସାହୁ। ଏହି ହତ୍ୟାକାଣ୍ଡ ଘଟିବା ପରେ ମହୁଲପାଲି ପୋଲିସ ଓ କୁଚିଣ୍ଡା ଏସଡିପିଓ ଘଟଣା ସ୍ଥଳରେ ତତ୍ପରତା ସହ ତଦନ୍ତ କରିଥିବା ବେଳେ, ସମ୍ବଲପୁର ଏସପି କନୱର ବିଶାଲ ସିଂ ମଧ୍ୟ ଘଟଣାସ୍ଥଳ ପରିଦର୍ଶନ କରିଛନ୍ତି।
ଏହି ହତ୍ୟାକାଣ୍ଡ ଘଟଣାକୁ ସମ୍ବଲପୁର ପୋଲିସ ରେଡ ଫ୍ଲାଗ୍ କେସ ଭାବେ ଗ୍ରହଣ କରିଥିବା ସମ୍ବଲପୁର ଏସପି ସୂଚନା ଦେଇଛନ୍ତି।
ସମ୍ବଲପୁରରୁ ବାଦଶାହ ଜୁସ୍ମନ ରାଣା, ଇଟିଭି ଭାରତ
