ସମ୍ବଲପୁର: ଦାବି ମାନିବାକୁ ଲିଖିତ ପ୍ରତିଶୃତି ଦେବା ପରେ ରେଳରୋକ ଆନ୍ଦୋଳନରୁ ଓହରିଛି ବିଜେପି । ସମ୍ବଲପୁର ରେଙ୍ଗାଲି ଷ୍ଟେସନରେ 6ଟି ଟ୍ରେନର ପୁନଃରହଣି ଦାବି ନେଇ ଆଜି ରେଙ୍ଗାଲି ମଣ୍ଡଳ BJP ପକ୍ଷରୁ ରେଳରୋକ ଆନ୍ଦୋଳନ କରିବାକୁ ଚେତାବନୀ ଦିଆଯାଇଥିଲା । ତେବେ ଆଜି ଦଳୀୟ କର୍ମକର୍ତ୍ତା ଷ୍ଟେସନରେ ପହଞ୍ଚିବା ପରେ ସେମାନଙ୍କ ଦାବି ସମ୍ପର୍କରେ ଆଲୋଚନା କରିଥିଲେ ରେଳବାଇ କର୍ତ୍ତୃପକ୍ଷ । ଆଲୋଚନା ପରେ ରେଳ ବିଭାଗ ପକ୍ଷରୁ 3ଟି ଟ୍ରେନ ରହଣୀ ପାଇଁ ପ୍ରତିଶ୍ରୁତି ପତ୍ର ଦିଆଯାଇଛି । ଲିଖିତ ପ୍ରତିଶୃତି ପାଇବା ପରେ ରେଳ ରୋକ ନିଷ୍ପତ୍ତିରୁ ଓହରିଛି ବିଜେପି ।
କୋଭିଡ ଆସିବା ପରଠାରୁ ଦୀର୍ଘ ୨ ବର୍ଷ ହେବ ରେଙ୍ଗାଲିରେ ପ୍ରାୟ 6ଟି ଯାତ୍ରୀବାହୀ ଟ୍ରେନର ରହଣିକୁ ବାତିଲ କରାଯାଇଥିଲା। ତେଣୁ ବିଭିନ୍ନ ସମୟରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି l ରେଙ୍ଗାଲି ଅଞ୍ଚଳଟି ଗୋଟେ ଶିଳ୍ପ ବହୁଳ ଅଞ୍ଚଳ ହୋଇଥିବାବେଳେ ଏହି ଷ୍ଟେସନ ଉପରେ ରେଙ୍ଗାଲି ବ୍ଲକର 16ଟି ପଞ୍ଚାୟତବାସୀଙ୍କ ସମେତ ବିଭିନ୍ନ ଶିଳ୍ପାନୁଷ୍ଠାନର କର୍ମଚାରୀମାନେ ଯାତାୟତ ପାଇଁ ନିର୍ଭର କରନ୍ତି ।
ତେବେ କୋଭିଡ କଟକଣା ଜାରି ହେବା ପରଠାରୁ ଏଠାରେ ଅଟକୁଥିବା 6ଟି ଟ୍ରେନର ରହଣିକୁ ବାତିଲ କରାଯାଇଛି । ଏହି ଟ୍ରେନ ଗୁଡ଼ିକର ପୁନଃରହଣି ଦାବି କରି ଆଜି ରେଳରୋକ କରାଯିବା ନେଇ ଗତ ୧୬ ତାରିଖରେ ରେଙ୍ଗାଲି ବିଜେପି ମଣ୍ଡଳ ପକ୍ଷରୁ ନିଷ୍ପତ୍ତି ହୋଇଥିଲା । ତେବେ ଆଜି ରେଳବାଇ ପକ୍ଷରୁ ଲିିଖିତ ପ୍ରତିଶୃତି ପରେ ନିଷ୍ପତ୍ତି ବଦଳାଇଛି ବିଜେପି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
